السلااااام عليكم ومبروك دخول العشر الله يتقبل منا ومنكم
وكيف كتاكيتكم عساهم بخير يارب الله يطمنكم عليهم ويقر عيونكم بشوفتهم وهم بعافيه وصحه اللهم امين
معليش غيبت عنكم كم يوم واكيد بتعذروني الحين اقول لكم السبب
هذا ولدي ربي يحفظه طلعته يوم السبت الظهر والدنيا كلها مهي واسعتني من الفرحه وقسم بالله لو احد قرصني يمكن مااحس بعمري طبعا كان مرقد بحضانة الشميسي واموره كلها تمام
طلعته للبيت وحطيته بمهاده وهات يا تعليمات على عيالي ممنوع تشيلونه وممنوع تبوسونه ولا احد يتعطر ويقرب منه واللي مزكم يبعد عنه وهم حاضر حاضر ياقلبي من فرحتهم في اخوهم ماعارضوا
المهم عدى اول يوم على خير وجاء يوم الاحد وحممته الظهر والمكيف مااقعده تحته اروح بنهاية الغرفه واصلا الرياض هالسنه الله يرحمنا برحمته حتى المكيفات كنها مراوح مع ذا الحر
المهم وعلى 10 بالليل ارتفعت حرارة الولد وقام يسهل ويبكي شكله يتموغص وانا هنا جن جنوني لان اصلا انا خايفه من يوم طلعته وكانه اول بيبي يجيني ماادري كيف اتصرف طبعا قعدت الى 3 الفجر وانا اراقب حالته وكل مالها تزيد الحراره والاسهال نفس الشي حفاظه ورى حفاظه
اخيرا اخذناه على مستشفى الملك فهد وهناك قالوا لازم تنويم لاحوووول انا طاقني القرف من هالمستشفيات وهم يبوني اترقد به حاولنا شمال يمين عطوه علاج ومانبي ترقيد قعد الاستشاري يشرح لنا السالفه وانه طفل خديج ووضعه صعب مايقدر بكشف عادي يعرف وش عنده رضخنا للامر الواقع وقاموا هم بالفحوصات اللا زمه بس ياربي بهذله وقسم بالله تخيلوا طفل وزنه كيلوو900 قرام وشغالين فيه 3 ممرضات يدورون هالشرايين وكل شوي الابره تنغز بجهه واخيرا يعبون 3 براويز دم وقصطره للبول وربي دمعت عيوني عليه احسه يتعذب ياقلبي وبعدين خزعه من الظهر من السائل في النخاع الشوكي لان الدكتور قال ممكن حمى شوكيه وخوفني مع ان كنت رافضه هالشي بس خفت اندم على اي شي بيصير لولدي لا قدر الله واكون انا السبب توكلت على الله وقلت اسحبوا وبعدين حطوله مغذي ودخلونا للتنويم الحراره اخذ لها خافض مرتين والحمد لله توقفت من حالها اما الاسهال كان مستمر يمكن بذاك اليوم من 10 بالليل ل10 الصبح اكثر من 12 حفاضه وانخفض عنده بعض الاملاح وارتفع نسبة حموضة الدم وطلع عنده التهاب بالبول ونسبة كريات الدم البيضاء مرتفعه وهو دليل على وجود التهاب بالجسم
يوم الاثنين المغرب خف الاسهال الحمد لله بس قاعد يعطونه مغذي مع فيتامينات ومضاد حيوي والحمد لله وضعه مستقر واليوم قبل لااطلعه سوا الدكتور اشعه للصدر وقال لي ان عنده فتحه في القلب ما تسكرت وعنده مراجعه بعد 6 شهور يشوفون الحاله كيف تطورها
اليوم طلعنا 3 العصر وبس نايم ورضاعته تجيب الهم يا شرقان والا 20 مللي رضا لو شربها يمص شوي وينام على طول
ياربي يفرج همي وهمكم يابنات ويطمن قلوبكم على عيالكم ويطمن قلبي على ولدي وتتسكر هالفتحه بدون جراحه ياحي ياقيوم
السلااااام عليكم ومبروك دخول العشر الله يتقبل منا ومنكم
وكيف كتاكيتكم عساهم بخير يارب الله يطمنكم...
هلا والله فيكم أكثر الحمدلله بخير اللهم لك الحمد