أميمتي ...وين اروح منها اذا جيت أولد

صباح الخير يا حلوات
ان شاء الله تكونوا بخيرا
موضوعي اليوم هي أمي .......الله يطول في عمرها
ما أدري وين اروح منها اذا جيت أولد
أمي من النوع الي تخلي الواحد يتمنى انه ما انخلق اصلاً من كثر ما تتوتر وتبكي وترجف اذا شافت اي واحد من عيالها تعبان اويحس بشووووي ألم
في الاول كانت احسب الامهات كلهم كذا يخافون على عيالهم الى ان دخلت المستشفى قبل ولادتي بأسبوعين بسبب ارتفاع في ضغط الدم
كان معي في الغرفة وحدة معطينها طلق صناعي وهي بكر مثلي وكانت تتألم بشكل فظيع الي شدني أمها كانت قمة في الهدوء والسكينة كانت اذا اشتد الطلق على بنتها تقرأ عليها بصوت رخيم جداً وتذكرها بالدعاء والله كنت انتظر وقت الزيارة بس عشان اسمع صوتها وارتاح لقرأتها وكانت امي وقت الزيارة موجودة وسمعتها قلت لها ياليتك يمه مثلها
ضحكت وقالت: هذا شي من الله ما ياخذه الواحد بيده
وتعالوا يوم جات الدكتورة وقالت لي لازم نسوي العملية اليوم والله يابنات كأنها هي الي راح يسوون لها العملية وانا كنت موكلة امري لله وكنت اقول لها يمه عادي كل الحريم الي نعرفهم سووا عملية وماعليهم الا العافية وهي طبعا ما ترد علي بس دموع وايدين ترتجف والله دخلت العمليات وانا خايفة لا يغمى عليه ما عندها أحد من كثر ما كانت منهارة
ولادتي الثانية سويت نفسي قويه ورحت ما قلت لها ويوم درت اتصلت علي وهي معصبة وتخانق والله يابنات كانت تتصل كل 10 دقائق تتطمن في الاخير قلت لها يمه راح يدخلوني غرفة الولادة لاعاد تتصلين انا بأتصل اذا ولدت طبعا ما كنت اسمع الا صوت حشرجة صوتها من كثر ما كانت تبكي المهم بعد ما دخلت غرفة الولادة قرروا عملية مستعجلة واول ما صحيت في غرفة الافاقة ما جاء على بالي الا امي فما كان على لساني الا: ابي تلفون
الممرضة قالت ما فيه تلفون اذا طلعتي لغرفة التنويم تقدرين تتصلين وكنت ابي اطلع بأسرع وقت عشان اكلم امي واطمنها ويوم طلعوني من قسم العمليات كانت اميمتي واقفة عند باب العمليات تتنظر والله يا بنات يوم شفتها ما قدرت اتمالك نفسي كنت اصيح بشكل مو طبيعي وكانوا الممرضات يحاولون يهدوون عشان الجرح ويوم حطوني في غرفتي قالوالي الممرضات ان الوالدة ازعجتهم من كثر ما كانت تسألهم وتناديهم من غير الصياح والدموع وطبعاً هاذا الكلام كله بالأنجليزي والوالدة كانت حاسة انهم يعلموني بالي سوته وكانت تقول ايش يقولو ا
قلت لها :ابداً يمه قولون انك ونستيهم الليلة
الله يخليها لي ولا يحرمني منها
انا ودي انها ما تحاتي ولا تفكر وهي عندها الضغط والسكر وما هي ناقصة أنا الحين حامل وقاعدة افكر ايش اسوي ؟شوروا علي والي امها مثل امي تقول لي كيف تتصرف معها عشان ما تحاتيها
افكر اولد عند زوجي بعدين اروح لها لكن صعبة علي لان ولادتي قيصرية وراح اجلس 5 ايام في المستشفى عيالي ما عندهم احد وهم صغار والسفر بعد الولادة صعب ما أدري ايش أسوي