أمي (( اجنبيه )) وهي سبب ضياعي

بسم الله وعليه الاتكال



في الصيف الي فات تعرفت على خليجيه في (( المول )) .. اممم و تبادلنا انا وياها الارقام .. و صار بينا علاقه صداقه .. والبنت من قبيله معروفه وعائله لها اسمها وهي عايشه براء مع اهلها تربت طول عمرها وما تروح لبلدها الا زيارات وهذا الشي اثر عليها فـهي (( سافره )) ما تتحجب وطريقة لبسها مره غريبه مثل لبس الغرب وحتى اسلوبها في الكلام وكل شي مثل الغرب ولكن لسانها عربي...
بس من جد البنت مره حبوبه ومتعاونه
مع الوقت اكتشفت ان امها اجنبيه .. ومع الوقت برضوه بديت اكتشف اشياء فيها(( تشيب الراس ))
البنت ماتصلي ولا تصوم مدمنه مخدرات .. وتشرب دخان ,, وتسكر وتروح (( الكلب )) المقهى الليلي .. وتنام مع شباب وعندها (( بوي فريند ))

وسمعتها بين الشباب الخليجين رايحه فيها (( تطلع معهم وتشيش .. و ... و ... ))

المهم ابوي سئل عنها وكلهم سبوها ونصحوه ان حنا نبتعد عنها

جاني ابوي وقالي اني سئلت عنها وكلهم قالوا انها الله يستر علينا وعليها
بصراحه انا تائثرت جدا وزاد تمسكي فيها اكثر
وقلت لبوي لا تخاف انا متكله على الله والبنت باشد الحاجه لنا والمفروض ما نتركها

استمريت على علاقتي معها واطلع معها ونروح (( للمول ))
بيني وبينكم ما يهمني كلام الناس وحكيهم اذا شافوني معها .. انا متكله على ربي والله سبحانه هو الي عالم بالنيات

فجلست مره انا وهي وامي وبدت امي تناقش معنا وامي هدفها من المناقشه (( نصحها ))
البنت بكت بكاء والله انها تحزن وتضيق الصدر .. وهي تبكي بدت شكواها
7
7
وقالت كله من ابوي .. لو ان امي عربيه .. لو ان امي مسلمه و من نفس عاداتنا وتقاليدنا .. لو اني جالسه في ديرتي ومتربيه فيها ..
قالت .. ليه تستنكرون علي هذا الشي والشي هذا عادي في بيتنا الشرب وعدم الصلاه والطلعه والدخله ... و .. و ... الخ
لا تلوموني وانا ما عمري شفت امي او ابوي يركعون فرض لوجه الله
لا تلوموني وانا اغيب عن البيت شهور واسابيع ولا احد يرفع السماعه يسئل عني
لا تلوموني وانا يشوفوني طالعه من البيت الساعه 12 بالليل رايحه (( الكلب )) وهو عادي عندهم كني رايحه السوبر ماركت الساعه 12 الظهر
لا تلوموني وانا اشرب دخان واسكر قدام اهلي ولا عمرهم فتحو فهمهم بشي
لاتلوموني وابوي اول ما كملت 21 سنه علمني وشلون العب قمار

هذي بيئتي الي تربيت فيها وعشت فيها
انا اعرف (( البايبل )) اكثر من القران .. اعرف في الديانه المسيحيه اكثر من الاسلاميه

لا تلوموني تكفوووون وانا اشوف نظرات الخليجيات لي باستحقار و كره واشمئزار وهم مع الاجنبيات يضحكون ويسولفون
وانا حالي حال الاجنبيه او بالاصح ظروفي جبرتني اكون مثلها ومع كذا ينظرون لي على اني خليجيه ولكن خليجيه ضايعه وفاسده

لا تلوموني وكل الخليجيات اذا علمتهم عني وعن الي اسويه هربو عني ولا عاد كلموني او على الاقل يا ليتهم نصحوني بالعكس كل وحده خافت على سمعتها مني

ليه انتم كذا يا المسلمات ليه ..!!

بصراحه البنت قطعت قلبي .. وقلنا لها بس لازم تغيرين ..
كم عمرك الحين مشالله
خلاص يكفي والله انتي كبيره وتعرفين الصح والخطاء ..

قالت انا ودي اتوب و ارجع لديرتي واتزوج .. وابطل الي انا فيه

ما انكر انها تغيرت مع الوقت وصارت ماتروح للكلب الا ماندر ولا عاد صارت تشرب الا قليل وبطلت دخان
بس مازالت تحن للماضي .. فالنفس اماره بالسوء وغير كذا صديقتها (( الغير مسلمات )) يغرونها بالطلعه معهم


من جد انا محتاره .. وتعبت وانا انصح فيها .. على اني شفت النتيجه بس ولو مو المشفيه (( فلا الجو يساعد .. ولا حتى صديقاتها لان كلهم اجنبيات .. والله مدري وش اسوي ))
يشهد الله اني انا وامي ندعي لها ليل نهار ان الله يتوب عليها ويهديها ويعصمها عن ما يغضب وجهه
ولا انكر ان البنت ودها وتحاول انها تتغير وتحاول .. وما انكر انها تغيرت بس ما زالت تحتاج لتغيرات كثيره وكبيره

وش تنصحون فيه اخواتي نكمل والا نتركها والا وش السوات؟؟


اتمنى انكم تدعون لها بالهداااااااااااااااااااااايه
وتدعون لي بالتووووفيق


واسفه على الاطاله .. والسلام عليكم ورحمة الله وبركاته