أمي الغالية هل تمارسين دور الأم ......على مضض

السلام عليكم
كل وحده تدخل هالموضوع شرف لي لانها تثريه بافكارها البناءه وانا بكتب تجربتي ليست لتنفيس عن شجن القلب بل لتكون عبره لكل أم .
من خلال تجربتي المتواضعه خلال 19 سنه في هذه الحياه المشاكسه ابي احط تعريف جديد حق الام المثاليه هل انها تحطيهم كم هائل من الحنان والدلال وتلبسهم احسن لبس وتاكلهم الا يبون وما يصير في خاطرهم شي الا ياخذونه؟ هل بانها تقول حق بنتها الوحيده انا امج واختج وصديقتج بالكلام؟
مثلا انا دخلوني اغلا جامعه مع اني شاطره وحصلت بعثه بس رفضتها لانها مو التخصص الا ابيه وبعد دخلت تخصص ما ابيه اشترولي لاب توب وسياره ومو ناقصني شي طلباتي كلها مجابه.... واذا مرضت تسهر تدعي لي.......لكن هل انا احس بالامان العاطفي ؟
ايام الثنوي كنت قريبه جدا من معلمه الله يذكرها بالخير كانت بالنسبه لي شي عظيم كانت تعطيني شعور بالامان مع ان امي موجوده ومدلعتني اخر دلع بس ما كنت احس ان ممكن اقول لها عن مشاعري والاشياء الا تصادفني.....يمكن هالشي عادي معلمه تعتبرني مثل بنتها بس ما فكرتوا ان كل الناس عابرين سبيل اليوم انا مثل بنتها باجر بتشغلها الدنيا وبنفترق وهذا الا صار ...... علاقتي معاها لي الحين موجوده بس مو مثل قبل.
الجامعه وما ادراك ما الجامعه فيها اصناف البشر احنا الجامعه مختلطه وتجوفون البنت تلبس القصير والحاله والبنات لزقه في الصبيان .... الا يلهمني فيها دكتور اللغه العربيه مع ان علاقتي فيه كلش متواضعه وبحدود بس احس شخصيته فيها بريق لانه يشجعني لاني كاتبه صاعده(مصدقه روحها البنت) ودايما ادعيله الله يخليه حق زوجته وعياله ويحميه من الحساد.
اذا ضاقت بي الدنيا ارووح حق من صديقتي اتخيلوا من نفس عمري وقراراتنا وان كانت فيها شي من المسؤليه بتظل قرارات مراهقين.
اين انت يا امي من كل هذا؟
أين كنت يوم حاول أحد الاشخاص ان يعتدي علي أيام الطفوله؟
تاخذ قيلوله الظهر.... والله ما ستكثرها عليها
أين كنت يوم أحلم أبشع الأحلام بسبب الا صار؟
ما في اليد حيله
أين كنت يوم أضربت عن الطعام بسبب نقصي 3 درجات ونص في امتحان الفيزيا؟
تعدين اشهى الماكولات عشان تنفتح شهيتي... لكن هذا دواء سطحي لازم نتعالج من الداخل
أين كنت يوم رفضتني معلمتي وقالت وداعا؟
والله ما ادري كنت غارقه في الدموع ولا ادري بالدنيا
أين كنت يوم كنت أتعرض للظلم في المدرسه الإبدائيه؟
كنتي تستقبليني مو قرع الجرس بالأحضان
أين كنت عندما كنت ابحث عن معنى الدوره الشهريه؟
ما تكلمت وياها عن الموضوع الا لما جاتني...
أين كنت يوم تزين إبنتك يومها بإبداع جديد؟
ادعوا لي ... ينشر كتابي عما قريب
أين كنت....أين كنت ...أين كنت؟
يمكن لاحظتوا إني إنسانه حساسه جداً والسبب ان كنت اتعرض للسخريه للأسف من خواني من يوم كنت صغيره مما أدى إلى إنعدام الثقه بالنفس وضحاله المهارات الإجتماعية يعني حس المبادره والإفصاح عن ما يجوب في القلب عند واحد من الأهل منعدم لانه اكيد بحصل تعليق من هنا او هناك فالجوء إلى الغريب اسلم هذا قمة الخطأ لانه الغريب عابر سبيل اليوم وياج وباجر عليج ماله امان
الحين هذي تجربتي شلون نتعلم من الماضي ؟
راح ابتدي من عمر السنتين
في هالعمر تجوفونه جاهل ولا يفهم الا بالعكس يلقط كل شي فعندي اقتراح يخليه يتكلم عن احاسيسه فمثلا ترسمون وجوه سعيد وحزين وومتلل ويفكر في شي الوان واشكال وقبل ما ينام تقولين له انا اليوم جذيه انت شنو وتقولين الصج لانه يفهم بحس انج ما تقولين الحقيقه وبجذب لا حتى لو قولي انا تعبانه مثلا اليوم سويت جذيه يعني بطريقه مبسطه يفهمها وبعدين اهو بقول كل شي اذا جافج تبادرين
عطوهم الوان ورسموا وياهم اذا راوكم لازم تهتمون بس مو بطريقه مبالغ فيها يعني ركزوا ع التفاصيل هالورده حلوه هالون حلووو لانه اذا بالغتوا وعقب راحوا الروضه بينصدمون ولا تحبطونهم بعد خير الامور الوسط علموهم بعد بس مو نهجمون ع الرسمه للأسف بنت اخوي عمرها سنه اقول لهم عطوها الوان شمع يقولون توصخ وتخرب خلوا لهم ركن في البيت حق تخريبهم الا اهو ابداع تعبير عن الذات مثلا خلو في الحديقه رمل نضيف الي ينباع وعطوهم العاب رمل ولعبوا وياهم مو تروحون تحسون لالالا اهم شي ان تكونون جزء من حياتهم .
اذا كبروا شوي خمس اربع سنين دخلوهم المطبخ لا يصيرون علل اشكبرهم ولا يعرفون يسون شي مثلي ما اقول علموهم طباخ بس مثلا خلوهم يزينون كيكه والبيتزا يحطون الزيتون على انها عيون والطماط شفايف بايكلونها حتى لو ما يحبون الطماط كل شي من انتاجهم حلووو لانه تعبهم وجذيه بتتجنبون المشاكل الغذائيه هههه
طبعا لازم تدخلونهم في شغل البيت من عمر صغير بنت ولا ولد حتى لو البيت مليان خدم وحشم لانه هالشي يعلم المسؤليه والاعتماد على النفس للاسف اشكبري وكل حجرتي عفسه بعفسه ولا اعرف اتصرف ما اقول خلوهم يغسلون الحمام بس ع الاقل يعدلون السرير يقطون ذيابهم في سله الغسيل اذا غسلتوهم يجبونهم يعلقونهم يرتبون العابهم عقب ما يخلصون ولا تسون كل شي بمكافأه لازم يتعودون هذا روتين اليوم اتشجعونهم بالكلام الطيب يأثر فيهم .
اذا اكبروا ست سنين لا تخلونهم على طول جدام الالعاب الالكترونيه شحليلنه قبل نلعب اونو منوبلي بس لازم كلكم حتى ابوهم يعني اختاروا يوم اجازه المزاج رايق لانه العيال كلا متمللين وانا منهم
واذا صاروا العيال شحليلهم يستخدمون النت وعندهم ايميل حاولوا تقعدون وياهم مو كرقيب لا يعني قولي لبنت دوري لج طبخه حق غدا باجر وقعدي حوسي وياها شوي جوفي الاشيا الا تعجبها والا شيا الا لا اذا ولد راوني السياره الا تحلم تشرتيها طبعا من راتبه تحسسونه الا بصير له كيان ممكن يختار وكل مره دروا لكم حجه .... لين ما يتعودون ان اهم يسون هالشي غالبا معاكم يعني فترات تكون بروحهم بس اي وقت بتجون تطلبون منهم طلب
هذا الا يحضرني الحين واذا تذكرت شي بقول لكم
اتمنى انكم تستفيدون وقل عدد الأطفال العايشين مع اهلهم صوريا وانا خلاص كبرت ادعولي اتخرج ويجي فارس الاحلام على حصان ابيض يخاف ربه حنون ومتفهم والله يرزقني بالذريه الصالحه واعطيهم حياتي احبهم من قبل ما اجوفهم .