صدقققتي بكل حرف صح كل ام تختلف بعضهم حنونه مررره بزياده والبعض متوسط والبعض قاسي شوي
بس مهما كانت قاسيه مافيه احن من الام على عيالها
وفعلا شي يحز بالخاطر انو بنتي تجي بوسط حريم سواء جلسه او منتدى وتجلس تنتقدني والحين ماسرت اعجبها
اما اللي شايفه شي غلط وتبي لامها لافضل ومو قادره تستشير احد من اللي حولها وفضلت تستشير بالمنتدى بحكم اننا مانعرفها ولاتعرفنا ولانعرف امها وتبي حلول
حتى تظهر امها قدام اللي حواليها بوضع افضل وتحاول تطور وتحسن بحياة امها وماتخلي لحد عليها ملاحظه
تبحث عن حلول وتطبقها هذي اعذرها لانها تبحث عن حل لمشكله واعرف كثييير حياتهم غير عن قبل يكبرو بناتها
سواء في نظافه طبخ سنع لبسها اثاثها اسلوبها تصرفاتها
يعني اللي تبحث عن حلول ممكن بدون ماتسب بامها
اما وحده تجي امي سبتني وامي ضربتني وامي تسحب الجوال مني وامي تكرهني
هذي ودي اجي مع امها ونضربها سوى اعلمها الادب

مرحبا أختي


قريت كل الردود قبل لا أكتب ردي .. في البداية أنا أم لطفلتين .. وأكتب لك من بعد 3 أيام ما نمت فيهم الا 3 ساعات تقريبا .. أولا أنا مريضة .. وثانيا بنتي سكرت على رجلي الباب وتورمت اصابعي والمشي مؤلم جدا .. ثالثا البنات طول الليل بكا ونواح وزكام وكحة وترجيع وأنا أركض ما بين البنات ..
الملخص اللي كتبته القصد منه أقول لك إني أتعب مثلك ,, ويمكن أشد .. لأن بنتين موب بنت وموظفة ..
كل التعب الجسماني وما يرافقه من تعب نفسي هذا يا عزيزتي فطرة .. فطرة انفطرنا عليها .. حب الأبناء وشعور الامومة وغريزة الحفاظ على الحياة .. كل الجهد اللي تبذلينه في هالفترة تبذله 99% من الامهات حول العالم في نفس الوقت ..
لكن المشكلة موب هني ..
المشكلة لما يكبر الابناء وتتغير العواطف ونصير نحمل مشاعر ثانية لهم منها الانتقاد ورغبتنا انهم ما يطلعون من خطوط افكارنا ومعتقداتنا وخوفنا من الناس وتعليقنا على سلوكياتهم الشخصية ومواقفهم المختلفة .. هذا الشيء يغير نظرتنا للابناء والبنات ونصير ننظر لهم كبشر موب كعيالنا اللي يستحقون محبة تامة .. هنيه بالتحديد يطيح اغلب الاباء والامهات بالخطاأ
أنا من الناس اللي ألقى معاملة قاسية من أمي .. ومع اني يتيمة الاب .. ومع اني من يوم وفاة ابوي وانا اشتغل وراتبي في يدها واعينها وكنت لها عن 10 أولاد .,. شلتها شيل وربي يجعله من البر بدون ذكر مواقف
مشلكتي مع امي متفرعة .. بدايتها من رفضي لسلوك أتمنى ان الله يهديها منه وهو سلوك الغيبة .. دايما اذكرها بالغيبة وارفض اكمال الحديث واحاول تغييره واحاول معها كثيرا ,, وردها لي دايما التقبيح فيني والزجر والسب .. وغالبا ما احزن واسحب نفسي عن الجلسة لتكمل هي الجلسة في اغتيابي واغتياب زوجي واهله .
الشيء الثاني الموضوع المادي .. كنت فيما سبق اعطيها راتبي كله .. بعد ما استطعت توفير دخل لها وبعد ما اشتغل اخواني الشباب وبدأو بالمساهمة نزلت الى ثلث الراتب فقط .. ومع اني تزوجت منذ عدة سنوات الا ان مبلغ الدفع لم ينقص ابدا ودايما يصلها اول كل شهر مع زيادات أحيانا .. هذا الشيء لا يرضيها هي ما زالت تجد اني يجب ان ادفع اكثر وانا والله اعطيها مبلغ محترم جدا من راتبي .. لكن هذا يمثل مشكلة دايمة
الشيء الثالث أختي الصغيرة .. أختي يتجنبها كل اهل البيت لأن لسانها سليط جدا ولأن لديها قدرة على قلب مخ امي بحكم انها الوحيدة الباقية من البنات للآن عند أمي في البيت .. وأختي تتسلط علينا بمواقف مكذوبة وامي تصدق والنتيجة كره شديد وفي أي موقف لو بسيط تنفجر امي بأبشع الكلمات وتجرحنا وتغضب علينا وحتى انها تمتد لتشتم ازواجنا


أنا أحاول أن ألخص مشكلة لها سنوات .. كل ليلة أدعي أن يهديها الله ويصلحها لنا ولآخرتها.. كل يوم أتجنب أن اتصل بها كي لا ينقلب الحديث الى شيء يزعجني وابكي لأني اشتاق صوتها
كل محاولاتي للتحدث معها ومحاولة اجتذاب ودها تنتهي بغضبها لأنها لا ترى اي خطأ في سلوكها معنا
هذه الفترة تؤذي أخي لأنه يقدر زوجته .. والله يعلم ان امي هي من اختارت زوجة اخي ونحن كنا رافضين لأن والد الفتاة قاسي وديكتاتوري .. لكن زوجة أخي قمة في الاخلاق وجمال الوجه والروح وتتعامل بهدوء مع امي وهي طيبة وأمي تؤذيها بشكل غير مباشر وتغتابها وتغضب من اخي لو اعطاها اي شيء ,. صرنا نخفي عن أمي أي هدية نجلبها لزوجة أخي ونصحت اخي ان يخفي عن أمي خروجه ودخوله والله ان البنت غريبة ليست قرب اهلها وامي تسلطت عليها في الخرو مع زوجها وصارت لا تخرج معه الا مرة او مرتين في الشهر كي لا يغضب أمي ,, وهذا لا يجوز


تخبرني اختي تقول دخلنا محل احذية أنا واخي وامي ( زوجة أخي لم تكن معهم) طلبت امي صندل قام اخي بالنزول لأسفل قدميها يلبسها الصندل واشتراه لها ,, بعدها حملنا أشياء كثيرة واستأجرنا حمالي ,, حين وصلنا لغرفة الفندق لم يكن لدينا فكة وسأل أخي امي لو عندها 10 دراهم فكة .. تقول اختي اعطته امي ودخلت داخل الغرفة تشتمه وتقول يريد ان أدفع ثمن الصندل وهو يشتري لزوجته بالالاف !!


هل تتخيلين أختي جهد البر الذي نحاول كلنا ان نبر به أمي .. وهل تعتقدين انها تشعر بأننا نبرها ,,
لا للأسف أمي تتهمنا بالعقوق ونحن لا نرضيها بالذات أنا وأخي ,, أنا بسبب خوفي عليها من السلوكيات المختلفة وأخي لأنه يود زوجته ..


في النهاية أنا أعترف باني ابتعدت عن امي وأحاول تجنبها وأزورها سريعا وانصرف ,, فقط كي لا أزيد في الوقت ويحصل جدال وأصل للعقوق ..


أمي ليست كنموذج الامهات الموجود في الكتب .. وأمهات كثيرات كذلك ..

انا مع هالرد ، اعرف امهات يجيبون النفسيه للي يجلس عندهم من بناتهم اما العيال لا تصير عندهم اخلاق وتعرف تحب وتتكلم زين هذي وينها ووين مشاعر الامومه !