أمي تتمنى تسافر ..

السلام عليكم بدخل بالموضوع على طول ....

أمي مووظفه من يوم تزوجت ماسافرت الا مرات معدوده جدددااا وسفرات بسيطه والسبب بأن ابوي مايحب السفر ويرفض السفر رفض تام ..

لكن مع ذلك ابوي اعطاها الحريه بأنها تسافر لوحدها او مع أي شخص بأي وقت تبيه وبأي مده تبيها لكن امي حرمت نفسها طول هذه السنين لسبب واحد وهو انها مستحيل تترك اخواني لوحدهم بالبيت ولافيه من يهتم فيهم ..

طبعا اخواني عددهم كثير وهم تقريبا مو صغار يعني بأعمار متفاوته في منهم الصغير والمراهق واللي بعمر الشباب لكن امي عودتهم على الدلع وعدم تحمل المسؤوليه هذا بالاضافه الى انها تقوم بكل شؤونهم يعني في. ابسط الأشياء معتمدين عليها وبقيت طول هالسنين حارمه نفسها من السفر .. مع اني دائما اقول لها بأنها حارمه نفسها من شيء كبير يعني الانسان يحتاج من فتره لفتره يغير جو ويطلع برى. وهي كانت امنيتها تسافر وقلبها ميت ع السفر ودائم تتكلم سنوات عن رغبتها بالسفر .

المهم اخواني كبرو وتزوجو وبقي فقط بنتين بالبيت الاولى بعمر مراهقه والثانيه بابتدائي .. امي فجأه بعد كل هذه السنين قررت انها تسافر وتغير جو ولاتعرفون قد ايش هي تتمنى الشيء هذا ودائما تتكلم عنه طول الوقت ....

وتقول انا ليش حرمت نفسي طول هذه السنوات .. لكن المشكله انها ماتقدر تترك خواتي الثنتين لوحدهم بالبيت وبنفس الوقت صعب تسافر معهم لانها اول مره تسافر خارج السعوديه ولاعندها اي خبره بالسفر ومتطلبات السفر ويمكن بتواجه صعوبات بالسفر لانه شيء جديد عليها فهي محتاجه تسافر لوحدها .. عشان الشخص لما يتحمل مسؤوليه نفسه بيكون اخف عليه من ان يتحمل مسؤوليه اشخاص معه لأول مره خاصه ان اخواتي دلوعات بزيادهه مايشيلون حتى مسؤوليه نفسسهم. وبيبهدلون امي بالسفر اعرفهم واعرف شخصيتهم..


يبكون ويتذمرون على اتفه الأشياء وامي اساسا مريضه بالقولون وتقرحات المعده وعندها الام برجلها وماء يجعلها تمشي بصعوبه ونفسيتها مدمره ومتعبه وطاقتها قليله يعني فعلا يادوب تشيل نفسها ...

المشكله بأن امي طلبت مني اني انام اسبوعين او عشره ايام مده السفر في بيت اهلي .عشان اهتم باخواتي الثنتين .. لكن في داخلي استنكرت الشيء هذا بقوه كيف اترك بيتي وانام في بيت اهلي خاصه باني ولاعمري نمت برى بيتي الا في فتره النفاس .. والشيء الاخر بيت اهلللي فوضى بشكل لايصدق لدرجه اني ماعرف كيف ارتب واطبخ فيه كل شيء في مكان. بعيد عن الثاني ومليء بالكركبات والاشياء الخرربانه اللي رافضه امي ترميهم .. عكس شقتي مرتبه وكل شيء مقسم في مكانه الترتيب والطبخ فيه بيكون سريع وسهل جدااا..


والمشكله اني متعلقه ببيتي تعلق كبير يعني لو انام برى البيت في يوم مستحيل انام من الأرق ماعرف انام الا في سريري ....
وايضاا انا الان حامل بالشهر الثامن وطاقتي قليله جدا بسبب الحمل وبحس بثقل وقله نشاط ولو بتسافر امي بكون اخذت يومين بالشهر التاسع ومع ان احتمال ولادتي اثناء سفرها ضعيف لاني غالبا اولد بالاسبوع الثالث او نهايه الاسبوع الثاني من التاسع الا انه يبقى هناك احتمال افكر لو تجيني ولاده وامي مسافره وش اسوي بخواتي الثنين .. يعني لو كنت في شقتي وشايله مسؤوليه نفسي كان الوضع عادي لانه مو اول حمل لانه عندي خبره وقدره اني اشيل نفسي لكن لو ولدت واخواتي امانه عندي وش راح اسوي ....

والسبب الأكبر اللي بيخليني متردده اني كيف اترك زوجي طول هذه المده بحس انه غلط المرأه تترك زوجها لوحده لمده طويله .. لو بقوله اني بنام في بيت اهلي بيوافق لكني اعرف في داخله بيتذمر ومتاكده مليون بالميه انه بين فتره وفتره بيطلبني ع الاقل ساعتين عشان حقه الشرعي لكن هالشيء بيضايقني ..

لاتوجد فرصه للسفر الا الان لان امي موظفه ولاتملك اجازه الا هذه ...


ابوي ماراح يسافر لكنه متزوج ثنتين ..هذا غير انه عمله يوميا من الفجر لقريب المغرب يعني اغلب وقته بيكون غير موجود .. وعندي اخوات متزوجات لكنهم دلوعات ويادوب يشيلون مسؤوليه نفسهم وماراح يفيدوني بشيء وحتى امي ابدا ماتثق فيهم ولاتعتمد عليهم ...
وانا بصراحه مالومها لانه فعلا احساسهم بالمسؤوليه ضعيف ...
وهي معتمده على كلمتي بالموافقه او الرفض ..

طبعا انا قلت لها بان يأتو اخواتي للبيت عندي وامي رفضت وقالت مكانهم بيتهم وانا رده فعلي كانت اجابه بالرفض على طلبها وشعرت بخذلانها وحزنها وهي متعلقه بهذا السفر تعلق عجيب ..
.بصراحه في داخلي قلبي مايطاوعني ووانا ماحب اقولها لا خاصه انها عانت كثير في حياتها .. اتمنى اشوفها سعيده ومبتسمه هالمنظر نادر اشوفه في امي يعني اعرف هالشيء راح يسعدها كثير ويبرد على قلبها وامي فعلا تحتاجه بشده وهي تعبانه جدا من مشاكل البيت بحس اني لو بوافق بقدم لها خدمه كبيره يعز على قلبي ارفض شيء راح يسعدها لكنني متردده تردد كبير للاسباب اللي ذكرتها ..