أمي تغيرت ٣٦٠ درجة شو أعمل😔

مرحبا حوائيات أتمنى تكونو كلكم بخير
بدي احكيلكم عن موضوع مضايقني كتيير و مو قادرة احكي مع حد في لاني ما بدي تصير مشاكل فبدي استشيركم و بدي تساعدوني شو لازم اعمل .
اول اشي خليني احكيلكم عن حياتنا زمان هلا امي كانت زمان تلبس النقاب او الخمار و بابا شيخ و كانو متدينين جدا و قران و صلاة و دروس دين و ما في اغاني و لا مسلسلات ..... يعني حياة اسلامية بحت هاد تقريبا قبل اربع او خمس سنين بعدين اجى يوم قررت ماما فيه تترك الخمار لانو كان معها حسسية و اشي في المجرى التنفسي يعني فما قدرت تكمل فيه بعد ما بابا اقتنع انها ما تلبسو صارت تطلع بدونو بس كانت تلبس شال طويل يغطي كلو الجزء العلوي و تلبس جلباب واسع جدا و ما تلبس الوان يعني فقط اسود او بني او كحلي و قعدت تقريبا سنتين هيك بعدها بدت تلبس شالات اقصر شوي يعني تغطي فقط منطقة الصدر و بعدها صارت تلبس جلابيب الوان و اضيق شوي بعدها صارت تدخل الشال في الجلباب من جوا بدل ما كانت تغطي فيه من برا طبعا هاد كلو مو مرة وحدة صار يعني بالتدريج هلا انا حسيت انها بدت تتغير جد وقت ما تعرفت على صاحبة جديدة في هاي الفترة انا دخلت الجامعة و كنت ماخدة سكن لانو جامعتي بعيدة و رجعت عند اهلي بالعطلة يلي بين الفصلين هون لاحظت تغير كبير على اني من نواحي كتير مثلا لاحظت انها عاملة حاجبها يعني نامصيتهم و انا انصدمت انو ماما كانت كتير متشددة خاصة بهاد الاشي لانو النمص حرام و فاعلو مطرود من رحمة الله كيف هي عامليتهم بس لما سالتها قعدت تحكي حجج مش مفهومة و ما الها دخل فانا ضليت ساكتة لانها امي
هلا بالنسبة لصاحبيتها الجديدة كانت تضلها تيجي تسهر عندها و بضلو يفوتو يحكو جوا يعني ما بحبو يحكو بوجودنا و بعدين اكتشفت انو ماما بدت تأرجل و هاد الاشي زاد مشكلتها يلي في التنفس و هيك بس ضلت تأرجل و بعدها شفتها بطلت تطلع بدون مكياج و حتى صلاة الفجر ما بتصحى عليها دائما و لما تطلع دائما مشغلة اغاني و في البيت بتسمع اغاني و يعني قلبت مية و ثمانين درجة عن امي يلي بعرفها حاولت اكتر من مرة احكي معها و انا عارفة انو السبب هي صاحبيتها الجديدة بس عشانها امي الاشي صعب شوي وصعب ابعد صديقتها عنها
هلا الصدمة الاكبر يلي انا منها قررت انو انزل هون استشيركم انو سمعتها بتحكي تلفون مع صديقتها و انا سمعتها لانو صوتها عالي مو تنصت و حتى اني ما كملت سمع قمت من النوم و رحت برا البيت هلا يلي سمعتو من المكالمة انو في واحد حاكي مع ماما لانو مفكرها صغيرة مو مبين عليها الكبر هي بالمناسبة عمرها ٤٦ و كان مفكرها بالعشرينات و يلي فهمتو انو هي حبت تتخوت معاه عشان هيك كملت حكي و اكتر من قصة نفس الاشي هون كانت صدمة كبيرة الي انو شو يلي بخلي ماما تعمل هيك بعد هاد العمر و بعد ما كانت حتى في محلات الملابس تحكي مع اصحاب المحل بصوت واطي و بس اذا بدها تسال عن السعر اما هلا بتضحك و تمزح معهم و توخد معهم بالحكي جد انا متضايقة كتير كتير يعني بدي امي القديمة ترجع ما بدي امي تموت لا قدر الله و هي على هاي الحالة
اسفة عالاطالة بس كنت بدي اطلع كل يلي جواتي لاني مو لاقية حد احكيلو هاد الحكي