أمي حبيبة روحي.. تآخذ فلوسي ومصروفي

مرحبا بنات
اليوم جايتكم ابي افضفض
كلااااااام بخاطري ودي اتكلم به
فكرت افضفض لمين ؟ اشكي لمين ؟
مدري حسيتها فشيله اتكلم عن امي عند الخلايق
بس هنا محد يعرفني ولا اعرف احد
والبنات بيعطوني رايهم بكل صراحه وبدون شخصنه
المهم ياطويلات العمر .. سالفتي مع اميمتي حبيبتي
من يوم انا بنوته سعنتوته وانا معودتها اعطيها فلوسي
يعني ماكنت احتاج الفلوس لأنها ماتقصر معي نبع الحنان
وماكنت اهتم لها جت او راحت .. المهم كبرت والموضوع باقي
دخلت الجامعه اخذت امي صرافة المكافأه مني وهي اللي تصرف علي منها
دخلتني وحده من البنات بـ سعوده ألف ريال شهرياً ووقتها ماكان عندي حساب بالبنك فـ قلت لها تحط حساب الوالده وفعلاً حطته الله يجزاها الجنه ، وليومكم ذا السعوده ماشيه لها قرابةة الأربع سنوات بحساب امي
انخطبت وتملكت وجاني المهر ماشفت منه ولا ريال بس الحمدلله جهزت لزواجي وكذا
اذا مثلا جتني هديه "ماديه" فلوس او ذهب امي تآخذهم فترة ملكتي جتني هدايا يابنات فلوس وخواتم ذهب اخذتهم امي وعليها بألف عافيه حلال زلااال عليها ويشهد الله اني راضيه على هالشي ولا في قلبي شيء ابد
المهم تزوجت وزوجي موظف قطاع خاص وعليه ديون وقروض وحالته الماديه جداً تعبانه .. تخيلوا اذا طلبته شي يقول اصبري ! واذا طلبت من امي "سلف ماهو عطاء" اذا طلبتها تقول انا مزوجتك رجال موظف هو يصرف عليك
المهم لما جت سالفة حساب المواطن الحمدلله ٥٠٠ لي انا وزوجي وصار يعطيني اياها .. ومره كنت عند اهلي وسألتني امي اذا مسجله بحساب المواطن "قصدها انا لحالي غير التابعه لرب الأسره" بحسابي الخاص .. قلت لا واخذتني وفتحنا حساب في البنك العربي واخذت الصرافه مني وسجلتني بحساب المواطن شهرياً ينزل فيها ٣٠٠ ريال
تخيلوا بنات ما البس ما اكشخ اشياء كثيييير بخاطري ما اقدر اسويها واشياء بسيطه جداً بس ودي اسويها ما اقدر
حتى صديقاتي كل ويكند يتجمعون ويشوفون بعض انا ما اقدر !! لا لبس لا كشخه لا تقديمات تواجه
وامي حبيبتي يااااربي لك الحمد مو قاصرها شيء بس تعودت وانا اللي عودتها .. قسم بالله لو تطلب عيوني ان تفداها بس يابنات انا وضعي الحالي صعب وصعب جدا محد حاس فيني
مع ان لي اخت اكبر مني ، بس تسوي العكس مها تعطها فلوس وتهديها خواتم وسلاسل ذهب !! يمكن لأنها متزوجه وبعيد عننا ؟! ما ادري والله
المهم ادري كثر بالكلام انتم وش رايكم باللي قاعد يصير ؟ صديقتي تقدر تحول التأمينات "السعوده" لحسابي .. شرايكم احولها او لا ؟ هي بأسمي المفروض تجيني انا وانا اللي آخذها ؟ وضعي صعب ، محتاره ، ماودي آخذها من امي ولا ودي اعيش بقهر وحسره كذا