هاه وينكم أبي نصائح من مجربات

ياقلبي ياعبورررة أجل زينا

بقولك تجربتي

ابوه الله يهديه من النوع الي بس يهاوش ومايعرف يتقرب للولد ويتعامل مع ولدي باسلوب الترهيب والتشكيك

حتى كل مارجع من برا يقوله أنت تشرب دخان .. ويشم ريحة الولد

وكان ولدي لما يجلس معي مقهوور ويعصب
عشان كذا ولدي قال قدامي... والله والله عناد بيوم من الأيام اشربه او اجربه
كنت اخاف يسويها .. واحاول اهدي فيه واقول ابوك يسوي كذا من خوفه عليك ومن هالكلام
ومرت الأيام حسيت فيها ولدي يقفل الغرفة ويفتح لشباك .. ومرات يطلع برا دقايق ويرجع

حسيت في شي مو طبيعي

ولما جلست قريبه منه شمت ريحة دخان .. مزحت معه وقلت الله يهديكم ويقطع هالاماكن الي كلها دخان . صارت حتى بثيابك
واقولها واقرب منه واضحك ابي اشم ريحة شعره وفمه واضحك (يعني كأني العب معاه)

وهو يضحك ويبعد عني وقلت ماتركك (بمزح) ولما شفت يضحك ويتهرب حسيت اكثر ان الولد يشرب
قلت له تعال انا وياك لحالنا بالغرفه
وجلست معه. قلت ياولدي مابي افتش جيوبك إذا معك ياقلبي انت الي قولي وطلعه لي

انت كبير وادرا بمصلحتك.. سكت شوي وطلع البكت ... بصراحه طلعت دموعي وضميته لصدري.. وقعدت اصيييييييييح بقوه
الولد تأثر من بكائي وقلت له ياولدي مابي انصدم فيك انت الكبير والقدوه ..وانا الحين مو مصدقه هذا دخان احسه حلم لا مو انت الي تسويها

مابي ياولدي احس بيوم ماعرفت اربيك. ولا ابي تخسر صحتك لاني احبك وابيك متعافي لأني دائما افتخر فيك وبتربيتي لك... انا مابقولك هات البكت.. ولابقولك الحين تتركه

ابيك انت الي تتركه من نفسك... وتجيني تبشرني بانك ترتكته ورميته ولايمكن ترجع له
وقلت عطني وعد رجال بيوم تتركه... قالي وعد
(أنا خليت الخيار له.. عشان يتركه ولايرجعه له مره ثانيه)
المهم
يوم .. يومين .. ثلاثه .. بالثالث سألته هاه ياقلبي متى تبشرني والله مارتاح بنومي احتري هاليوم

سكت وطلع لغرفته ورجع واخذ البكت قدامي ورماه وقال والله العظيم ماعاد اشرب ولا يطب فمي جربته عناد في ابوي
بس ماتوقعت بيصير فيك كذا عشاني وفكرت بتهاوشيني وتعصبين بس كلامك ذبحني واموت ولا اشوفك كذا

ادري يمكن تقولو يمكن يشرب ولاندري عنه
اقولكم مافيه ام ماتعرف ولدها إذا يشرب أولا
ولدي تركه بدون رجعه


الخلاصة



تقربي لولدك وكوني له صديقه قبل تكوني ام ...

لاتشككين فيه حتى وانتي تعرفين فيه شي

انصحيه بحب وبا احلى الكلمات ... ودائما قولي له انتي تفتخرين فيه وبعقله وحكمته

خلي يحس ان الخيار له في ترك الدخان.. وانتي من حوله وعينك له

والاهم من هذا كله... عامليه علي حسب تفكيره وشخصيته

والله يعيني على الي بعده هذا عاد بيتعبني مرررررررررره ... حنون بس متهور ويحب يغامر
ودائما اوصي اخوه عليه يتابعه برا البيت بدون مايحرجه قدام الناس

وادعو لهم بالصلاح ورا كل صلاة

وتصدقون ليومي هذا ابوه مايدري وش صار ولاقلت له .. لو قلت له كان الله لايوريكم ضيع الولدعلي واقل شي بيسويه
يشكك فيه ولايصدقه

انتبهوووووووووووووووووووووووووو من التشكيك والتفتيش وكأننا مباحث هذا لها اثر على الاولاد

يارب تحمي شبابنا من كل شر