السلام عليكم ورحمة الله وبركاته .... و ب ع د .
قبل كل شي .. اذا كُنتَ ممن يقرأ الموضوع ولا يقرأ ردود الاعضاء وبالاخص ردود الكاتب " فلااا تقرأ الموضوع لانك سوف تظلم الموضوع ويفوتك شي مهم "
مادري شلون ابدأ , ولا كيف ابدأ ... تتعثر حروفي بهذا الموضوع والله ... مادري شقول .. كنت بكتب هالموضوع من شهرين بس بطريقة طرح تختلف , بس بعد هالحادثة الفاجعة والمصيبة قررت اطرحه بهالطريقة والله يعين .. ولا يعتقد اي واحد منكم ان الكلام موجه للشخص اللي راح اتكلم عنه بالموضوع لاااااا , الموضوع يخصكم كلكم , والعاقل يرى صغائر الذنوب او الاخطاء عِظااااام , والغااافل يرى جِبال الذنوب والاخطاء كالذبابه تدور حول انفه فيهُشُها بيده , يعيني يشوفها ولا شي ...
...
قلة ادب والله قلة ادب ... قلة ادب اللي صار مع هالمشرف ...
تتصورون أم تتصل على مشرف مدرسة تقول للمشرف : ولدي شلونه بالدراسة شلون حضوره وانضباطه ؟؟ . تسأل عن ولدها اللي بالثانوية اللي مسوي سكسوكه ولاااا محدد العارض والشنب , اللي يقول انا رجال ...
تسأل عنه ويوم قال المشرف لهذه الأم : مشكورة على الإتصال واحنا بنقول " لمحمد " انج اتصلتي علشان يتشجع , قالت : لااااااااا واللي يرحم والديكم لا تعلمونه !!!!
اكيد بعضكم ظن من رد الأم ان قصدها مو تسأل عن الولد , قصدها شي آخر " سوالف مثلاً تمضي الوقت تبحث عن شي مفقود ... إلخ " لاااا انا تعمدت هذي المُقدمة علشان اخلي كل واحد يفكر ويركز بالموضوع عدل لانه مهم
...
يعني ماتبي ولدها يدري !!! .... أم , وولية أمر ... ماتبي ولدها يدري
.
..
قال المشرف : ليش يايمه " المره كبيره " ليش يايمه ماتبينه يدري ؟؟؟ , قالت بصوت الشاكي الباكي : لااااا تقولون له والله بيطقني !!!!
قسم بالله وانا اكتب لكم هالجمله اطرافي ترجف من عظم هالمصيبة .
تخيلوا معاي أم تقول هالكلام : بيطقني ,, أم تقول بيطقني ..
صار بعض الشباب والخليج والعالم العربي الاسلامي عاااااقين بكل ماتحمله الكلمة ... لوالديهم ..
مايستحي , مايخاف , مايحس , مايفهم , مايدري , مايفكر
مايستحي من نفسه والله العظيم " قليل الأدب " \\\ مايستحي من امه اللي حملته وغسلته بيدها من كل سوء , وإزالت النجاسة من على جسمه وهالشي عندها متعه " قليل أدب " وإذا اصابك امساك ولا شي راحت تركض يمين ويسار ادور لك علاج , ايه ادور لك علاج لان حتى الاذى اللي يطلع من بطنك تفرح بتغسيله بيدها لانك حشاشة جوفها
مايستحي من نفسه .. امه اللي سهرت عند راسه تكمد اطرافه اذا مرض , تسهر على راسه كأنها حارس عينها ماتغمض , وجفنها مايرمش , بس تخاف انه يأن او يون تبي تقوله لبيك ياروحي اذا ناداها ... لبيك ياحشاشة جوفي اذا احتاجها ... لبيك ياامي لبيك ياعين هلي . تحرم نفسها الأكل والشراب علشان ياكل وتبقى عنده , تتمنى تموت على انها تشوفه محتاج او متعور ... \\\ ... مايستحي من نفسه قليل الأدب يمد يده على امه , لاإله إلا الله ... هذا كفر , والله كفر ... كفر بنكران النعمة والجميل وحقوق الوالدين ... الله جمع رضاه برضاهم
مايستحي يشوف دمعاااااااااااااتها بسبته ... الله واكبر عليك , مادري تحمل حجر ولا قلب بين جنبيك , كم سيلت دمعها من اجلك , وكم حدرت دموعها علشان تاخذ حاجه لك او تسوي شغلة لك او تفكر فيك , والحين هذا جزاتها مايستحي ... \\\ ... يسهر الواحد برى البيت ويرجع يلقى امه تنتظر عند باب البيت ولا جالسه على المدخل وهو ولا حااااااس , يدخل وتستقبله بلهفت المشتاق وبلهفت المتوتر الخايف وهو ....... خارج الإرسال لانه "قليل أدب" , يدخل وتبي تمسك يديه وتمسح عليه , وهو يقولها انتي ليش للحين صاحيه ليش تنطريني , انا مب ياهل انا مب بزر , ويروح ينام " ياعلك ماتنام " تنام وانت كاسر خاطرها يالعنبو قلبك القاسي !!!
مايستحي يرد عليها قدام الشباب ولا وهو برى البيت مايعرف يتأدب معاها ويتطلف بالكلام ليش ؟ لانها " أمه " عاااادي ... يرد عليها يقول .. نعم نعم خير .. اييييه اييييه زين زين قلنا زييييييين والله ... غير انه يتأفف بعد مايسكر ويشتكي يقول لعوزونا و و و ... اكيييييد لان المتصل ... \\\ ... " الأم " من تكون يعني ... لو ان الصاحبه متصله ولا الحب كان يمكن قعد اذا هو متمدد او وقف إذا هو قاعد " يعلك ماتقوم اذا تقديرك كذا " قليل أدب مايستحي ولا فيه دم ...
....
لاحد يرد ويقول هالولد مايستحي " على الولد اللي كتبنا عليه القصه " لاااااااااااا ... حطوا نفسكم بكل قالب من قوالب العقوق والبر وشوفوا انتم وين بالنسبة للأمثلة ... انسوا اني كاتب قصة شاب عااااق , انسوا هالشي , كل واحد يحاسب نفسه ..
\\\
مايخاف هالولد من العقاب , مايخاف من الله يخسف مكانه ويمسخه ... مايخاف ان الله يخليه يذوق ثواني انتظار امه وسهراها عذااااب ...
مايخاف من العقوق .. لان العقوق من الاشياء اللي لازم يشوفها بنفسه قبل موته ويذوق عاقبتها والله ثم والله ...\\\... مايخاف ان امه تموت اليوم ولا بكره وبعدها يندم .. والله ماينفعه الندم يبقى طووووول عمره ياكل بنفسه ويتحسر ويصيح الليالي والايام , يتمنى لو بس ترجع امه ولا ابوه ثواني بس ثواني يسمح على يديهم ويحب اطرافهم ويقبل مواطيهم ويحب ارضهم وترابهم ... امك ولا ابوك بين يديك ماتخاف يموت واحد فيهم وهو شايل عليك , شايل عليك لو ذرة ... لاإله إلا الله .. مايخاف هالانسان انه يقابل ربه وخصمه امه " لاإله إلا الله " بأس الولد وبأس الخصيمِ هو " امام الله وخصمه امه " يالله كيف حالك كيف وجهك خصمك امك خصمك ابوك يالله يالله
مايخاف الواحد انه يطلع من البيت على آمل انه اذا رجع بيعتذر من امه او ابوه .. ويوم يرجع يكون فات الفوت على الصوت !!!! تدرون ؟ اكبر حرمان هذا الحرمان .. والله حرمان شي ماتعوضه ابد .. موت القريب الغاضب . يطلع لك بالحلم فتبكي ندماً , تتخيل صورته فتبكي حسرة , تشوف ملابسة فتخرُ صعقاً , تسمع اسمه او اسمها فتتلوى وجعاً ... آآآآه ياقلب المُعنى بتعذيب امهِ او عقوق والديه ..
يامن تقرأ موضوعي هل فكرت انك تسأل امك بكل صراحة " يمه فيه شي فيني ودج اغيره , فيه شي فيني مايعجبج , يمه يابعد روحي وانفاسي وش خاطرج فيه , عندج شي بصدرج ودج تقولينه لي بس خايفه يسبب لي احراج او مستحيه مني , تاخذ كفوفها وتقبلها وتقول يمممه انا حشرة ماتستحق العيش اذا انا ضايقتج او سببت لج اقل قليل لاني من اكون !! انا احقر من ان اكون بدونج يايمه "
هل تعامل امك كما ينبغي لمرحلة عمرك ؟؟؟
انت عمرك 15 هل تساعدها \ تساعدينها .... في الحركه والطلعه والجيه ... والقرب منها لانك للحين في مرحلة الاندماج الاسري ومانشغلت بجامعة وطلعة وجيه ...
انت عمرك 20 هل توديها \ تودينها ... تجيب لها اللي تبي , تسألها بدون هي ماتطلبك وش تبين يايمه ...
هل جيت يوم بدون سبب وسويت حركة مالها مبرر بوجة نظرها !! اقصد يعني .. انت معودها تبوس راسها مثلاً هل جيت يوم وحبيتها على يدها " فديت يداااتهم " , هل انت معودها تحب يدها جيت وغيرت الطبيعة وجمعت يداتها مع بعض وحبيتهم مع بعض من فوق وحبيت كفوفها الطاهره ؟؟؟ هل فكرت ؟؟ هل فكرت !!! ليش الناس تتحايل بالاساليب على الاصحاب والاحباب وينسووون اقرب قرب واحب حبيب ؟ ليش ؟
هل فكرت انك تجي يوم وهي جالسه تلمها ؟؟؟!! تحب رجلها اللي يااااااااااااااما مشت لك ومن اجلك وعلشانك ...
انت عمرك 25 هل حاولت تعطيها اللي هي تبي ولااا تتزوج البنت اللي تنكد عليها ولا تجيب لها اللي يغثها ايّن كان ...
انت عمرك 40 هل فكرت انك تكون دائم التواصل معاها بالزيارة , تعودها على الخضوع والسمع والطاعة , حتى عيالك ياخذون هالصفة منك ويخضعون لها ويطيعون , وانت المستفيد الاكبر لانهم راح يحفظونها لك كرصيد اذا صرت مثلهااا ...
مايخاف من ميزان العادل سبحانه . ان الله يبتليه برجل تنقطع او عين تنعمي او يد تتعور .. كم أم وأب دعوا بس دعوة غضب يوم ضايقهم ولدهم او بنتهم وطلع الولد او البنت ولا رجع مات او تعور ... سمعنا الكثير من القصص عن هذا الشي انا عشته بنفسي وشفت امثله قدامي ...
مايخاف والله مايخاف ولا يستحي ولا بوجهه دم ..
..........
مايحس بأمه لانه بليد المشاعر اييييه بليييد , رقيق الحس والاحساس مع الاصدقاء .. بس هذي خدامه ومكينه انجاب ...\\\... مايحس ان جسمه يمشي ويتحرك وكل جزء شاهد لأمه بعد الله سبحانه وتعالى , شاهد على ان كل لحمه , وكل مفصل , وكل عظم , وكل عضله , وكل رباط , وكل ظفر , وكل شعره , وكل عرق , وكل عين , وكل أذن , وكل سن , وكل خلية , وكل مسام , وكل كليه , وكل رئه , وكل وكل وكل وكل من فضل أمه بعد الله
مايحس لانه غبي ,, يفضل اللعب واللهو على راحة امة ورغباتهااا ... يطلع يلعب يدخل يلعب , يمرح يسرح , يفهم يشرح , يضرب يجمع يطرح !! وين امه من كل هذا ؟ مالها خااانه , لانه شخص فضل الخيانه على البر وان يفعل ويصون الأمانه ...
مايحس ان امه لو لحظه وحده احتاج روحها تعطيه وهي تبتسم وتعطيه اكثر من ذلك ... مايحس ولا حس .. كم مره بكى وفزت من نومها تركض علشان تأكله او تشربه ... مايحس ان حياتها كلها مُصخره علشانه وحتى النوم اللي هو راحه لها من يومها الطويل معاه وعلشانه , ماااااااااتقدر تنام بعمق وراحه كل شوي قايمه تشيك عليه !! مصخن , متغطي , طايح من السرير ... وهي بنومها تحلم فيه وبيقضتها تخدم رجليه ,, الله واكبر
مايحس انها صايره حارس خاااااااص كل شوي تمر عليه تشيك وكأنها الحارس الشخصي اللي موجود للتأكد من سلامة كل شي ...\\\... مايحس انه كان 9 شهور في بطنها , وكل مازاد وزنه تفرح مع ان زيادة وزنه يزيد الحِمل على ظهرها ويصعب مشيتها ويكدر نومها ويعكر صفو جوهااا , تاكل اللي ماتبي وتاكل اللي هي ماتشتهي علشان جسمك يكون صحيح , تشرب الشي اللي هي ماتبي علشانك في بطنها , تغصب نفسها على اكلها وشربها ونومهااا , اسألوا انفسكم ياخواني كم مره غصبت نفسك علشانها ميه ميتين ألف ,, والله لن توفيها طلقة من طلقات الولاده كما اخبر الحبيب المصطفى صلوات ربي وسلامه عليه , انتم تتخيلون هالشي معاااي اقولكم تغصب نفسها على الاكل !! يعني تمنع نفسها من اكل معين علشان خاطرك يالشيخ والشيخه اللي داخل بطنها .. تمنع نفسها لذة المشروب والمأكول يااااااااااااااااااافالح كل تركت من اجلها
مايحس وليش يحس !! مو لازم يحس لانه ولد الجيران , وهذي خدامه في بيتهم ...
...............
مايفهم ومتى رايح يفهم وشلون راح يفهم !!! , اذا الحيوان يبر امه والطير والحشره ... وهو بعقوقه نزل تحت مستوى الحيوان واحقر من الحشرة ...\\\... مايفهم والله مايفهم ايش معنى أم أو أب ,, عااايش بلاااا هوية إجتماعية . لانه نزل مع المطر ولا طلع مع الشجر !!! ...\\\... مايفهم ان اقصر طريق للجنة هو أمه وأبوه . والجنه تحت اقدام الاممهات " تحت !! مو فوق رئسها " يعني البعض يمكن مايقبل رأس امه فكيف بيدها ورجلها الطاهره ...
مايفهم ولا هو فاهم هالدنيا شلون تمشي ولا كيف هي ماشيه
لا تعتقدون الموضوع موجه للشباب بس لاااا البنات لهم النصيب الأكبر , والموضوع مو بس عن الأم لاااااااا الموضوع عن البر ,, حطوا الأب في كل حالة تكلمت فيها عن الأم ...
....
مايدري هو شيسوي او انه مخطأ هالخطأ الكبيييييييير ,, كأنه يسوي شي عادي او خطأ من الاخطاء العادية ...\\\... مايدري ان هالشي كبيرة من الكبائر واعظم شي بعد الشرك بالله ...\\\... مايدري مو لانه جاااهل لاااا لانه عااااااااق ومااقسى هذه الكلمة
مايدري والدليل استمراره على الخطأ , وان كان يدري فهذي مصيبة مالها حل ...\\\... مايدريان العقوق له ظلمه في القلب حتى لو انه تااااب وغفر الله له وسامحته أمه ’ تبقى نفسه تلومه على كل مرحلة عُمرية قضاها لان عاااااااااااق وكان صوته نشااااز على لحن قاااااااااااق يعني كان مزعجاً لامه كازعاج الغُراب ...
كثير اشياء مايدري عنهااااااا وياليت حروفي ادركت حال كل عاق
.........
مايفكر نعم ماااايفكر بس ماراح اقول مايفكر بشنو او بوشو ,, بخلي باب الخيال لكم مفتوح ..
\\\
كم وصى الله بالوالدين كثييييير , وربط الوالدين معه سبحانه في اربعة مواطن من القرآن ...
بصراحة هالموضوع طلع من دون ترتيب لانه طلع بنفسه انا ماطلعته ولكن اعدكم بالمزيد
وآسف على الإطاله
حروفي كحباتِ البُنِِ , فهي بدون الحمس لاتُكااايِفُ مزاجَ الذواقين , وليس احدٌ مثلي يُحسِنُ حمسَها ويضبطُ تبهِرَها ... مرحباً بأصحاب الذوق الرفيع , فلكم عندي دلة تفوح , بطيب النفس والحب وكلامٌ يداوي الجروح
^^^^^
^^^^
^^^
^^
^
منقوووووووووووووووووووووووووووووووول الامانه
الله يهدي الشباب
شكرا عالموضوع الحساس