سلام خواتي

مع اني رديت على الموضوع مرة .. بس عندي تعقيب على ردود معينة و على صاحبة الموضوع ..

بالنسبة لصاحبة الموضوع.. فيه وحدة من الخوات ردت و قالت ما راح يوقفون معاج الا اللي مو زينيين مع امهات ازواجهم...

و تصدقين بالله انه من امس كانت فيه كلمة مشابهة تقرقع في قلبي بس ما كتبتها لاني ما حبيت استفز البنات.. بس اعتقد اني لازم اقولها عشان خاطرج انتي .. انا متأكدة يا اختي انه معظم البنات اللي ردوا برد ضدج.. بدون ما يلتمسون لج اي عذر هم على علاقة سيئة جدا جدا بزوجات اخوانهم.. و اظنها واصلة لدرجة العداوة الشديدة بعد... اما الردود المعتدلة (و هي قليلة جدا جدا) فاظنها لناس ما عندها زوجة اخ او علاقتها في زوجة اخوها عادية او زينة..

لان في هالمنتدى لاحظت معظم المشاكل... يا انها شكاوي من امهات الازواج او من زوجات الاخوان... و هلما جرى
فثقي يا اختي انه لا يمكن تجي وحدة و توقف في صفج و هي على علاقة سيئة في زوجة اخوها لان في نظرها كل زوجات الاخوان شريرات و ما يستاهلون الا كل شر..

انا قلت هالكلام لان واضح انج متأثر كثير باراء البنات.. فلا تضيقين صدرج و لا تحطين كلامهم في بالج.. فاقد الشيء لا يعطيه.. اللي علاقتها سيئة مع زوجة اخوها.. لا يمكن تحترم اي زوجة اخ في الكون و اكيد راح تحرص انها تتشمت في كل زوجات الاخوان اللي في موقفج و لا راح تلمس لها اي عذر..

و ازيد و اقول يا ريت كل البنات يخففون من المثالية الزايدة.. لاني ياما قريت مشاكل في هالمنتدى عن اهالي الازواج و امهاتهم.. و ياما قريت ردود اشكال و الوان.. و الغريبة انها ما كانت ابدا في صالح اهل الزوج و لا حتى ام الزوج..!!! و هذا يأكد كلامي اكثر انه معظم اللي ردوا عليج علاقاتهم في زوجات اخوانهم مو تمام او سطحية جدا.. فحرام انكم تحكمون على البنت و هي اصلا ما ارتكبت جريمة في حق ام زوجها..

يعني حطوا نفسكم مكانها.. انتو ازواجكم حبوا يسفرونكم في الصيف.. بتقولون لا؟؟ بتحسونها جريمة في حق اهله؟؟؟ وين المشكلة يا ربي..؟؟ و ليش قاعدين تحسسون البنت انها اذنبت لانها سافرت مع زوجها في الصيف؟؟؟ يا ويلي منكم و من تناقضكم يا بنات حواء... اللي يشوف ردودكم في مواضيع ثانية لما زوجة الولد تشتكي و تقول.. ودي اسافر مع زوجي.. حرام؟؟ و كلكم تنطون و تردون.. لا من حقج و من حق ريلج تغيرون جو ..!!!!! يعني قمة قمة في التناقض...

زين ... يا ناس يا عاااااالم... وين الغلط لو الزوجة قلقت على مصاريف بيتها..(اصلا هذا ان دل على شيء فانما يدل على انها زوجة حكيمة و خايفة على ميزانية البيت لا تنخسف و يقعدون بلا اكل لاخر الشهر)... و ان الزوج ما وافق يعطي امه الا من خوفه منها و من ردة فعلها..

عدوا معاي يا الطيبات.. ناس راجعة من سفر.. و اكيد كان وراها مقاضي رمضان.. و بعد رمضان العيد.. و بعد العيد مدارس.. يعني لو كان راتب الزوج اللي يكون.. الا ما راح انه ينخسف و يتبهدل على هالمصاريف.. و بعدين ليش ام الزوج تزعل لو ولدها قال لها ما اقدر هالشهر لان هذي مصاريفي.. عندي عيال باونسهم و افرحهم بالعيد.. و اجهزهم للمدارس.. بالعكس انا لو ولدي طلبت منه فلوس و قال لي لا.. لان هذي اسبابي باكون سعيدة جدا و فخورة جدا لاني باعرف اني ربيت رجل بكل معنى الكلمة لانه متحمل مسئولية عيلته مو بس من الناحية المادية .. لبس و سفر و غيره... لااااا... حتى من الناحية النفسية انه تهمه سعادة زوجته و عياله و راحتهم... غريبين انتو يا بنات حواء...

و بعدين الكل يلومها.. ليش تتكلمين على امه و ليش تقولين عنها.. ما هي لان اللي طلبت الفلوس امه.. يعني تروح تتكلم على من و تزعل من منو و تتضايق من منو؟؟؟ من ام الجيران مثلا.. و الا من ام علي و الا من امها؟؟ و الا تزعل من ابوه او من اخته!!!

و بعدين الزوج و الزوجة ياما يصير بينهم... ياما و ياما.. و اكثر مشاكلهم اهلك و اهلي... فما شايفه انه فيه مشكلة من الاساس الا انه ام الزوج (تجسست).. يعني حقيقة يا خواتي.. و خلكم واقعيات شوي.. هي ام زوجها لو مو متجسسة.. ما كان اصلا هالموضوع نزل من اساسه.. و ما كنا الحين هنيه قاعدين نعطي البنت حلول او نهزأها!!!! و يمكن كان كل شيء مر بسلام و الزوج راضى امه و راضى زوجته بطريقة ما و السلام.. بس لان ام الزوج هي اللي موقعها غلط في الاعراب..

يا ناس يا عالم.. ترى الامهات بشكل عام سواء امهات ازواج او امهاتنا.. في النهاية بشر.. من لحم و دم... مرات يحسنون و مرات يغلطون.. و احنا من واجبنا الطبيعي انه نبرهم و نحترمهم.. و من اوجه البر انه لما نشوف امهاتنا يغلطون و يظلمون لازم ننبههم... مو من باب تحقير و تصغير.. لكن من باب بر و عطف و احسان.. اننا ما نرضى لهم بعقاب الله ... و الله لو باجر غلطت و جه حد من اولادي و قال لي لا يا يمه وقفي و لا تأذين الناس... و الله لابوسه على راسه و احطه تاج على راسي من فوق.. لاني باعرف انه تربيتي و تعبي ما راحوا هدر و باعرف انه ربيت ولد يخاف الله حتى فيني و ما يبي يشوفني الا كبيرة و راقية.. و ترى يا بنات الا الظلم... الا الظلم... لان الله يعاقب صاحبه في الدنيا قبل الاخرة.. بالله ترضونها لامهاتكم...؟؟!!! ترضونها؟! و اللي سوته ام زوج صاحبة الموضوع غلط في غلط.. و امر منهي عنه تماما في القران.. و بعدين يا ريتها وقفت على هنا.. الا قاعدة تهدد و تتوعد بخراب بيت المرة؟؟!! يا كبرها عند الله.. ياااااااا كبرها عند الله...

و الله يا بنات و من واقع تجربة.. ام زوجي الله يسامحها.. على قد ما حاولت اقرب منها بغتني بعيدة و عزلتني و سوت المستحيل عشان اظل بعيدة... و انا شخصيا ما ارتحت الا لما ابتعدت.. تدرون شنو صار؟؟؟ و اقسم بالله مو من باب شماتة بس ودي الكل يتعض.. بنتها تزوجت واحد امه مو معترفة فيها اصلاا... و ناكرتها قدام كل الناس.. و قاطعت ولدها لانه تزوجها.. و الحين عندهم بنت قريب تكمل السنة.. ام زوجها تقول لا اعترف فيها و لا في بنتها و لا يشرفني اعرفها.. و ام زوجي و حتى اخته صايرين مكسوررررين ... شفتوا كيف عاقبة الظلم؟؟

و بعدين يعني معقول انتو ما تصير بينكم و بين ازواجكم مناقشات على اهله او اهاليكم و يصير كلام و طق و مطاقق... يا ربي ليش احس اني الوحيدة اللي اقرا المواضيع في هالمنتدى؟!! اخذوا امثلة قريتها من هالمنتدى.. اللي تقول تناقشت انا و زوجي و كسرت موبايله.. و اللي تقول تناقشت معاه و صفعته و اللي تقول سبيت اهله و اللي تقول دافعت عن نفسي و دزيته.. اشكثر مواضيعكم يا بنات.. لييييييش ناسييين؟؟ و الله غريبة .. و هذا اللي اذكره بعد.. و اللي ما اذكره ترى علووووم...

هدوا اللعب يا بنات... ترى مو كذا تنفهم الامور.. و اللي تحس انها محترة من زوجة اخوها.. فلا تقعد تعمم و تتفلسف من عندها.. ترى و الله هالدنيا كلها سلف و دين...

اختي صاحبة الموضوع.. الله يهدي بالج.. و يصلح ما بينج و بين ام ريلج باذن واحد احد...

الله يعينك يااختي مالك الا تكلمينها وتقولين ياخاله انا والله ادري انك احق فيه مننا ولك حقوق موب حق واحد عند ولدك بس ظروفنا صعبه ويوم اقول الكلام اقصد انه تأجلين شوي طلبك الين ربي يسهلها عليه.... ووقتها مزنوقين بعد رمضان والعيد والسفر ومتوترين وبداية مدارس وطلبات وبس تبي ترضى زين ماهيب راضيه اتركوها الين يطيح اللي براسها .. بالاخير هم أم وتشره عليكم

الله يعينك

صراحه ماادري وش اقولك بس توك تقولين انه مسفرك وجايبك من السفر يعني مصاريف السفر مااثرت ع ديونه بس لما طلبت امه اثرت ع ديونه يااختي ماابي اجرحك بالرد بس حبيت انبهك ياقلبي انتي غلطتي المفروض ماتقولينه شي خلاص هو اللي يصرف مو انتي وهذه امه لها حق عليه ودائم ياقلبي عشان يرتاح ضميرك لاتدخلين بينهم خليه يعطيها اللي تبي مالك شغل اذا هي مارحمت ولدها تبين ترحمينه بعدين ترا الام مهما صار ترحم ولدها وانتي ياقلبي هدي نفسك صح هي غلطت عليك بالكلام المفروض تكبر راسه وخلاص بس انتي اللي عليك حاولي تعتذرين منها قولي اني كنت معصبه وانقهرت لاني اطلبه فلوس ومايعطيني لاتكسرين بخاطرها وتذكري انك بيوم من الايام بتنحطين بمكانه طيب تخيلي امك مكلمه اخوك وصاير لها هالموقفنني ردة فعلك انتي وخواتك ؟؟منتو زعلانين ؟؟خلاص انتي اهم شي لايجي في بالك كلامها اللي قالته وتراها معصبه حاولي تعتذرين وان شاءالله تنحل واذا هي معصبه وماتتقبل خليها تهدا كم يوم وروحي لها انتي وولدك زوجك لايروح وحاولي تراضينها وان شاءالله خير وانتي باين عليك متربيه وفاهمه ولا لو وحده غيرك مافكرت باللي صار كان قالت احسن خلها تسمع وتفكنا سوي اللي قلت لك وموفقه

خلاص الي صارصار بس اعتذري منها عشان تكسبيها وقوليلها انك طلبتي اغراض من زوجك وماعنده فلوس عشان كذاعصبتي ووقلتي الي قلتيه الله يهدي النفوس