أم زوجي ماعاد أتحملها!!

السلام عليكم ورحمة الله وبركاته

أنا متزوجة من سنوات وكل سنة عن سنه أم زوجي ماعاد أطيق لسانها وحركاتها خلاااااص طفح الكيل هذي وهي بمدينة ثانية واصلني شرها غصب اذا شفتها أتذكر كلامها وأكشر ويمكن يجي يوم وأنفجر بوجهها واللي يصير يصير
طبعاً كل مرة أشوفها لازم تذب ولازم تنقد ولازم تعاير (بشكلي بلبسي بشعري بجلستي بكلامي بطبخي بكلللل شي حتى بفقري تعايرني لأن زوجي أقل واحد ماديا وبنتها وسلفتي ماشاء الله منغنغين بس الله ياثرني عليها يارب) وأنا أحياناً أرد رد يفشلها ويخليها غصب تقول صح عليك وأحياناً أسكت وأطنش وأحيانا اقول ايه انتي الصح عشان تنطم بس.
والحين تطور الوضع وصارت تتطاول على أبوي وأمي وأخواني وأخواتي،آخر مرة ذبت على أمي ذبه أقسم بالله من قهري بغيت أقوم اسطرها كف انا ممكن اتحمل كلامها عن نفسي لكن تتكلم عن أهلي لااااا إلى هنا و حّدها عاد، بس للحين مو عارفه وش أسوي معها
فعلا لسانك حصانك وإذا صنته صانك وهي الله يهديها صح انها هاديه وصوتها هادي ومايعلى صوتها بس لسانها يوجع وكلامها قوي وإلا بالغصب تبيني مثلها
وتبي تخلي حياتي زي حياتها بس معليش تبطي هي وتخطيطها.
وآخر مرة شفتها فتحت موضوع البر بأم الزوج وانا ساكته ولما طلبت رايي وقلته ما أعجبها طبعا وقامت تخاصم وارتفع صوتها وقامت تصارخ بوجهي وتقول اذا جيتيني بالحكي أجيك بالدين قلتلها كلنا نعرف الدين والدين ماجاب طاري ام الزوج واحتد الكلام وحاولت أنهيه عشان ماتصير مشكلة وكانت فيه سلفتي ووافقتني الرأي وهي انقهرت زيادة وكالعادة في الأخير تدري انها على خطأ وتبدا تقول قصص عن امهات الزوج اللي يغلطون على حريم عيالهم، دايما أحسها متناقضه لأنها مسكينة زوجها هو اللي مربيها وحاشي مخها حشي وصارت تقدس الرجل وصار هو محور حياتها حتى هي بنفسها تقول انا كنت بزر و رجلي هو اللي مربيني على مزاجه وتبينا نصير مثلها، لأنها ماانتبهت انها كذا الا بعد مافات الأوان وتبي كل الناس يعانون مثلها.
واللي يقهر تروح تحرش ازواجنا على شي تبيه وودها فيه وتجينا تحرجنا بأسلوب كيد النساء عشان نسويه بعدين تقول بكيفكن اذا ودكم سووه سوو اللي تبون ومن ورانا تحرش ازواجنا نسويه بالغصب، وكم مرة اكشف حركتها ذي.
وكانت منقهره بعلاقتي مع سلفتي كنا مثل الصديقات والحين العكس بسبب كلامها، كانت تقول لي عنها اشياء وتقولها عني اشياء عشان ما تقوى علاقتنا لأنها موب
عاجبتها، وطبعا انا مستحيل أصدقها لأنها كذبت علي كثير ومثلت علي كثير وتحلف وتقسم كذب كثير وإذا أمنتها على سر طلعته، بس سلفتي راحت تصدقها وهي الخسرانه.
هذا غير تدخلاتها بحياتي هذا وشوله وهذا ليش وهذا موب زين وفي الأخير يعجبها اللي سويته لأنها دائما متناقضة.
مدري أحيانا احسها تغار مني لأن كل حمولتها يمدحوني دايم ويقولون وش تبون أكثر من هالزين اللي جاكم (يقصدوني)، وهي بينها وبينهم مشاكل وماتواطنهم وتنقهر اذا مدحوني.
وش اقول وش أخلي بس كله يهون الا كلامها عن أهلي هذا اللي ما أتحمله
و انا ماعمري تكلمت مع زوجي أو قلت له الا مرة أو مرتين كنت وقتها ثايرة ومعصبة.
ومستحيل أقول له أو أكلمه بهالموضوع لأنه غلط ولأنه مهما كان بيوقف مع أمه وما ألومه.
للأمانه هي حبوبه وفيها خير بس لسانها ثم لسانها ثم لسانها وفيها خباثه موب طبيعيه أم وجهين.
(وهل يكب الناس على وجوههم في النار إلا حصائد ألسنتهم).
وش رايكم وش أسوي معهااااا!!!!
أحيانا أرحمها واقول ماادري عن ظروفها اللي أجبرتها كذا تتصرف وأحيانا ودي أذبحها، وأحيانا اخاف اكون قسيت معها وعلى حكمي عليها والدنيا دواره يوم من الايام بصير مكانها ولا أدري وش يصير.
اعذروني كلامي ملخبط واكتب من الجوال
#فضفضة