حبيبتى كان راى اخواتى سليم جدا فى تشجيعك على الانفصال
عوضك الله خيرا
لكنى اريد ان اطمئن عليكى وهل تحسنت حياتك ام زالت بائسه
من فضلك طمنينى عليكى

السلام عليكم ورحمة الله وبركاته....

آسفة إني قطعتكم يوم كامل... بس والله واااااايد فرحت يوم شفت هالاهتمام...

وايد بنات سألوني ليش ما طلبت الطلاق... لأنه في حديث يقول: روى أبو داود والترمذي وابن حبان عن ثوبان رضي الله عنه قال قال رسول الله صلى الله عليه وسلم: "أيما امرأة سألت زوجها طلاقها من غير بأس فحرام عليها رائحة الجنة". وروى ابن ماجه في سننه أن رسول الله صلى الله عليه وسلم قال: "لا تسأل المرأة زوجها طلاقها من غير كنهه فتجد ريح الجنة".

وكنت خايفة بكل صراحة إنه سبب طلبي للطلاق يكون سخيف.. وربي يعاقبني.. بس عرفت من فترة قصيرة إنه إذا الريال مب زين عادي أطلب...

ونا بصراحة يوم رحت عند أهلي... كانت حالتي النفسية تعبانة وايد... ويوم اتصل علي... صارحته بكل شي... وقلت له إني مب مرتاحة... في بداية الأمر حاول إنه يهددني ويستقوي علي... بس شافني هالمرة مب ضعيفة... واستغرب وايد.. وقال لي مع السلامة... على أساس إني براضيه... فسكرت التلفون.. رد يتصل وقال لي شو فيج؟؟ قلت له ما فيني شي... بس أفكر في مستقبلي كيف انقضى عليه.. وإنه حياتي معاه وايد صعبة... وإنه تصرفاته مب زينة...

هني قعد يتأسف ويعتذر... وقال لي... والله العظيم والله العظيم إني أحبج وأموت فيج... بس والله الظروف هي اللي قاهرتني... ونا آسف إني أفضي كل حرتي فيج... أنا غلطان... والله غلطان وأعترف بغلطي... ونا ما حسيت بقيمتج إلا يوم حسيت إني بفقدج... والله أحبج... بس شوفي الظروف اللي أنا فيها حاليا... أهلي ما يحترموني ويقدروني نفس أول... فأنا أيي وأفضي كله فيج... انتي الوحيدة اللي أقدر أشكي لها... وعلي ديون قد شعر راسي... ونا أقدر فيج إنه طول هالمدة عمرج ما طلبتي مني شي.. ولا طلبتي مني بدلة يديدة... ونا كنت مقصر معاج ومع ذلك صبرتي... جرحتج بكلامي وصبرتي... والله انتي نعم البنت.. بس انتي مرات تتصرفين بسذاجة وما أعرف كيف... قلت له الطيبة صارت عندك سذاجة؟؟ قال لي يوم أصرخ عليج ما تردين.. أنا أنقهر... قلت له أنا مب متعودة أرد على أحد.. لأني أعرف على طول دمعتي تسبق كلمتي... أنا مب ضعيفة... بس ما أريد ربي يعاقبني... ما أريد الملائكة تلعني... كل هذا ومب مقدر هالشي؟؟؟

والله كلمني سعة ونص تقريباً... قال لي... أنا كنت قاعد عند واحد يشكي لي... بعد ما سمعت كلامه... قلت له بخبرك جزء من اللي فيني... فالريال رد على ريلي وقال له... انته كيف متحمل؟؟؟ كيف انته توك في بداية عمرك كل هالمشاكل تواجهك؟؟؟

قال لي المشكلة أهلي مب مقدريني... ولا أحد مقدرني.... انتي الوحيدة اللي أقدر ألجأ لها... ونا غلطان ونا آسف... ومن هالكلام... وعقب كل هذا... قلت له أنا مب مرتاحة في بيتكم... شو كيف يعاملوني...

كيف يتأففون يوم أطلع او أمشي... رد البيت وكلم أهله وقال والله إذا ما وفرتوا الراحة لزوجتي أنا طالع من البيت.. وحاليا قاعد يدور له بيت...

لأنه هو اقتنع إنه كل المشاكل من ورا أهله... هم يضايقونه وهو يفج حرته فيني..

وعلى فكرة يا بنات.. أمه إنسانة وايد طيبة.. بس مشكلتها همها الفلوس.. والمشكلة الثانية اللي وااااااااااايد كبيرة وهي أساس المشاكل إنه إذا أحد قال لها شي.. على طول تسمع له.. يعني إذا أحد سبني عندها على طول تنقلب... هذي هي المشكلة الوحيدة... وانا من يومين عرفت من اللي كان يشيشها ويترس رايها.. وربي يسامحها والله...

وطلعت هذي بعد تترس راسها على ولدها اللي هو ريلي...

فقعد يقول لي انه اشتاق لي وايد.. ومب قادر يتحمل أكثر عن جيه... واترجاني أرد له... قلت له بشرط واحد.. تحترمني وقبل لا تعصب ولا تسب وتشتم تتذكر أفضالي وحسناتي...

قال لي بحاول وانتي ساعديني... والله أنا أعرف إنه أنا ما عندي أسلوب.. وخاصة وياج... انتي بس سامحيني وساعديني إني أتغير وأهد هالطبع الخايس...

قلت له بنشوف.. وتخيلوا يا بنات إنه ما صبر يوم وافقت أرد له... ياني أول ما سكر التلفون... تعرفون هو متى كلمني؟؟ الفجر... على طول يا البيت عندنا..

وغير جيه... قال لي من اليوم وصاير أي مكان تبين تطلعين ويا أهلج طلعي... بس ديري بالج على عمرج.. لأني وايد أخاف عليج.. والله العظيم إني أخاف عليج...

وشي كنت بقوله للخوات إنه هو يصلي... ويقرا قرآن وكل شي... وأغلب صلواته في المسجد...

بس مشكلته كله في طبعه العصبي والضرب...

وتخيلوا قال لي اليوم تلبسي لأنه بنروح نزور أهلج.. اشتقت لهم... :)

إن شاء الله ربي يهديه على طول ويترك عنه سوالف اليهال.. (العصبية والضرب والصراخ)

ادعوا لي يا بنات لأنه هذي فرصته الأخيرة....

الله يوفقكم ويسترعليكم ويهدي زوجك انشالله

امك للاسف هي السبب الرئيسي في الى انتي فيه وكنت ناويه ادخل وارد عليك بطلب الطلاق مع اني ماقد قلت لوحده اطلبي الطلاق ..
لكن الحمدلله شفت ردك الاخيرالله يصلح شانكم والله فرحتيني لكن اتمنى انه مايكون تغير لحظي
زوجك واضح انه يعاني من مشاكل نفسيه وضغوط مافيها شئ يروح لطبيب حاذق في هالامور يخفف عنه الضغوط والعصبيه بيرتاح ويريحك ان شاء الله
لكن فيه شغله ليه كان يتبلى عليك عند امه ويثير الضغينه اتمنى ماتنسي هالنقطه وتعالجيها

بصراحة ماشالله عليج صبرتي وتحملتي الاهانة والذل من واحد ما يستاهل
انتي مظلومة مع هالريل ... ...؟
حسبي الله ونعم الوكيل عليه
اختي انصحج تتطلقين منه لانه بصراحه وايد ضرج ...واذا ما طاع يطلقج
اطلبي الخلع ..
ولا تقولين ان انا اساكته ومتحمله عشان ابوي ...بالعكس ابوج لو عرف انج متحمله كل هالذل والاهانه ...من واحد ما يستاهل ..والله انه بيفرح من كل قلبه انج انفصلتي عنه ... وبتعيشين عند اهلج معززه مكرمه .... وترى الناس بتتكلم ..وانتي خلي كلام الناس ورى ظهرج ...اهم شي راحتج .....
الله يوفقج حبيبتي وينصر كل المظلومين امين يارب العالمين ....