أنا حلوه انا مثل نانسي عجرم -تم تعديل العنوان

السلام عليكم ورحمة الله وبركاته :
عزيزاتي بنات عالم حواء هذا الموضوع مطروح لنقاش وبدون زعل ياليت كلنا نتفاعل فيه ونعطي مقترحاتنا له بدون اي انحياز او غضب لاانه يمسنا جميعا واشكركم كلكم لدخولكم موضوعي ...
أنا حلوه انا مثل نانسي عجرم - أنا بيضاء وناعمه وعيوني تجنن - أنا صدري أحلى من هيفاء وعيوني اوسع من اليسا
من غير المنطق يابنات إن الوحده ترد على بعض المواضيع بأسلوب ينرفز مثل الردود اللي تشوفونها فوق إذا إنتي فيك كل هالمواصفات ماله داعي ذكرها لاإن الحمد لله أكيد كل وحده فيها جمال بس مو لدرجه اني اشهر فيه وإذا إنتي حلوه إحتفظي بكلامك لنفسك ولاتجرحين غيرك بهالاسلوب .

الفنانات صاروا حديث وعناوين المواضيع

صارت كل مواضيعنا يابنات مين يبي يشبه نانسي من يبي يصير أحلى من روبي وش هالمصاخه احنا الحمد لله مانبي نشبهم لاهم ولا أخلاقهم ولانبي نغتابهم أو نذكرهم بسؤء كفايه ذنوبنا اللي بنتحاسب عليها وهذولا مو قدوه لنا أو مضرب للمثال في الجمال ولو كانو أجمل جميلات الأرض إحنا مسلمين ونفتخر بإسلامنا والجمال العربي والخليجي مضرب للمثل في الخارج فخلوا شوي فينا ثقه بحالنا
وترى فيه بنات بالخليج يطيرون العقل بس حشمتهم ماتخليهم يظهرون بمظهر غير لائق مثل اللي تشوفونهم بتلفزيونات ....


الغيره من الفنانه
اعوذ بالله من بعض البنات تقولين مسلطه تسليط على الفنانه وتذم فيها وتقطع في لحمها والعياذ بالله صح حنا نشوف ونسمع وندري انهم على غلط بس ماله داعي ذمهم وقذفهم ترى حتى لو كانت اصيع صايعه والعياذ بالله مو منحقك تقذفينها هالقذف وكنك عايشه معها او تعرفينها مثل بعض البنات الله يهديها كاتبه
(لو هي ماهي صايعه ماكان شفتيها تتمايع وتدلع بجسمها يوم تغني اغنيه ****) طيب وش عرفك انها تغني هالاغنيه ياشيخه استغفري ربك هي غلطت وربي اعلم بنيتها بس انتي بعد لاتغلطين وشوفي عيوبك وخلي عيوب الناس عنك ...

زينب العسكري شعرها تركيبه - رموشها لصقات- عيونها قزاز - فمها صمغ - خدودها كلنكس

بعض البنات يحسون ان كل شيء في الدنيا تجميل في تجميل صدقوني انا رحت عيادات تجميل وشفت اللي محد يشوفه والله ان بعض الخليجيات في مستشفيات التجميل اكثر من الأجانب الكفار اسكتوا بس وخلوها على الله يعني لو فنانه خليجيه تصلح عيب فيها كلوها العالم وقشروها لكن هذي اللي جالسه تتنتقد هي وخواتها وقرايبها يسسون عملية تجميل عادي ايه هم عادي بس غيرهم لا لازم يذمون فيها طب شوفوا الغرب اللي 24 ساعه يسون عمليات تجميل ووصلوا لمستوي من التخلف إلى درجه ان وحده سوت لها عمليه تجميل عشان تصير تشبه قطوتها اللهم لك الحمد والشكر ..وفيه بنات على قدر عالي من الجمال ..
انا مره كنت بحفله وشفت بنات يتكلمون عن وحده طلعت قريبتي للاسف اني سمعتهم باذني ولا قدرت ارد وحده منهم تقول انا اذكر فلانه ماكان خشمها بهالحلاوه والثانيه تقول انا متاكده انها مسويه عمليه تجميل في اخر مره راحت فيها للبنان ...
يتحالفون على البنت والبنت اعرفها معرفه زينه ودرسنا سواء فتره طويله لاسوت شيء ولايحزنون اللهم سوت تقشير كرستالي وبشترها اشرقت شوي بس فيه ناس من غيرتهم وحسدهم مايستحلمون احد يصير حلو قدامهم لازم ياكلونه بعيونهم ..



الثقه بنفس حلوه
بعض الزواجات لما اروح لها انا وصديقاتي ونكون ماشفنا بعض البنات من فتره طويله يتغيرون علينا شوي ... تجي وحده من البنات وتبدا تحش شفتوا فلانه نحفت اكككككككككيد مسويه شفط والثانيه تقول لالالالا اكيد مسويه ربط معده والثالثه تقول لا والله احلف انها مسويه كبس معده
واذا سئلوها وقالت لهم مسويه رجيم قالوا كذااااااااااابه وتكذب علينا ماتبي تقولنا ليش يابنات وش اللي حداها يعني يمكن تبي تخبي صح يمكن ماتبي تقول لااحد صح ويمكن تكون صادقه بكلامها ومسويه رجيم قاسي ونقصت ليش كله تكذبون العالم وماتبون تصدقون إلا اللي براسكم
اذا شافوا وحده شعرها طويل قالوا اكيد مسويه توصيل واذا شافوا وحده محلوه قالوا اكيد مسويه تجميل طيب ياعالم يمكن رايحه لمشغل شغلهم كويس وضبطوها تمام يمكن مغيرها مكياجها يمكن متنت واحلوت وشفيكم كل شيء تجميل بتجميل
مره حصلت وحده بالمنتدى تسب وحده شافتها بزواج تقول انها حاطه لمعه ماتبي تعلمنا وشي هههههههههه والله ضحكت طيب ياعالم روحي اي محل واسئلي الإ اللمعه إللي على البنيه طيب هي ماتبي تعلمكم هي حره خايفه منكم او انتم جيتوها باسلوب مو زين
واللي تقول الله الله من زمان فلانه كانت سوداء والحين تبهل وبيضاء اكيد مسويه شيء يعني لازم تكون مسويه شيء مافيه شيء من ربي ابد
انا خالتي صورها وهي بالمتوسط سمراء سماااااااااار يروع ودايم يسمونها السيلانيه لو تشوفونها بعد البلوغ والثانوي وبعدين الجامعه لاإله الإ الله فتحت واحلوت ومع السمنه صارت خدودها حلوه وصحتها أحلى وهذا كله من ربي صح العنايه تساعد بس مافيه شيء بعيد عن يد رب العالمين .


الدعاء ... ماراح اقولكم السر اللي عندي إلا لما تدعون لي بكذا وكذا وكذا

يابنات والله انا صرت اخاف ادخل مواضيع فيها دعاء بعض البنات يشترطون تدعون لهم كم دعوه وفي الاخير يقولون لك امانه اذا مادعيتي لاربي يحاسبك يوم القايمه ...
ليش يابنات متى صارت الدعوه اجباريه اذا عندك شيء تبين نستفيد منه قولي بدون ماتشرطين علينا
انا طول الوقت ادعي وادعي اخاف ربي يحاسبني على هالشيء اللي خذته ويمكن ماستفدت منه
يعني خل نكون معقولين الوحد يبي ياخذ الفايده صح وهذي فايده المنتدى ومو معناته انك انتي مالك حق لاإنتي لك حق بس الدعوه تطلع من القلب للقلب ومع نيه صادقه
يعني كيف ادعي لك وانا مجبوره او مغصوبه ....


تكرار بعض المواضيع والاسئله يخلي بعض المواضيع الحلوه تختفي ومانحصل الزبده منها

تجي عضوه وتحط سؤال ويجون البنات يستفزونها باسئلتهم كم مره كم دقيقه كم ثانيه ومايقرون الاجوبه وتمل العضوه ولا تصيرتتابع الموضوع
وبكذا تحرمونا الفايده
مثلا اذا شيء ينباع بصيدليه اتصلي على الصيدليه واسئلي الصيدلي اذا خايفه او تبين تعرفين السعر او الكميه
يعني فيه بنات يبغون يعرفون الشيء بدقه وتفاصيل ممله تخلي العضوه تهرب من الموضوع
يعني لازم تعتمدين على نفسك ابحثي زين واستفسري بالخاص عشان ماتضيعين حلاوه الموضوع ويكثر عدد الصفحات بدون فايده

العضوه صاحبه الخبره الطبيه الطويله
الله يهديكم يابنات انا عضوه عاديه يعني بنت عاديه وانتي بعد وفلانه وفلانه وكل اللي يكتبون بالمنتدى فماله داعي تصير صاحبه الموضوع دكتوره او طبييه عشان توصف لك جرعه طبيه وتصدقينها
بعض العضوات اذا نزلت موضوع تسوي نفسها خبيره ومحد يفهم الإ هي
إذا هي جربتها على نفسها وحصلت نتيجه هذا مايعني إن النتيجه راح تناسبك وبنفس المقادير والدقه
والي ناسبها مو شرط يناسبك
فانتبهي ترى صاحبات بعض المواضيع ماعندهم الخبره الكافيه اللي تجيب على كل اسئلتك فاذا كنتي متردده احفظي الوصفه عندك لحد وقت معين بعدين اسئلي البنات مره ثانيه وشوفي النتائج ولاتغامرين بعدين تقولين صاحبه الموضوع ضرتني
ولو تبين تتاكدين من كلامي لاحظي بعض العضوات تكتب اليوم موضوع عن البياض الناصع اللي حصلته من وصفتها وبعد يومين تلقينها مشاركه في موضوع ثاني تسئل عن احسن وصفه للبياض
طب لو صفتها اوكي ليش رجعت تجرب وصفات ثانيه ولا بس الموضوع من يقدر ينزل موضوع من 5 صفحات وأكثر والمنافسه على كثره الردود

هذي امور تقرقع بقلبي سامحوني بس حبيت اشيل الكلفه بيني وبينكم ووياليت كل وحده تقرا الموضوع تتحاور معي ونتناقش عشان نرتقي بالمنتدى ونخليه مواضيعه من اجمل المواضيع:)

ودمتم لنا بكل ود حبيباتي بنات حواء الرائعات:26: