أنا شعرة وجهك ي زوجي العزيز!

مرحبا حوائيات ..
سبق وعرضت فصول من قصتي وحابة أخبركم وش استجد فيها ..
قد قلت لكم إن ضرتي اللئيمة أرسلت لي رسائل قذف صريح وتهديد بالإيذاء لو أنا رجعت لبيتي .. وزوجي على قوله ضربها ووداها لبيت أهلها يوم !
هاليوم هذا طبعا كان معي فيه ٢٤ ساعة مكالمات وغزل وحب بعد ما أخذ مني كلمة إني ما بأشتكيها وإنه بيوقفها عند حدها إلى آخره.
الحقيقة أنا أشوف العقاب غير كافي وما برد كبدي .. ما أبيه يضربها لكن ودي يرزعها في بيتها فترة لأن اللي سوته موب بسيط أبدا ..
المهم رجعت الشيخة ورجع زوجي يداريها .. ما فيه يوم من رجعتها واتصلت عليه وهي كانت جنبه ولقيته يكلمني بأسلوب جاف وينافخ علي قدامها .. وثاني يوم هزأني يقول ليه تتغزلين فيني بحضور زوجتي ..! لعلمكم أنا بس قلت وحشتني !!
شفتوا حقارته وسفالته؟ والله لولا إني حامل ما أفكر بصلح أبدا لكن خوفي ع طفلي من الشتات حدني !!
هنا أنا ما قدرت أسكت خاصة إن نفسيتي مع الوحام تبن وهو زود على قذف زوجته للحين يداريها ولا كأنه زعلان من اللي عملته ..
قفل في وجهي .. أرسلت له تهزئ رد زوجتي محترمة ولا داست لك على طرف!
اتهمتني بأني صاحبة علاقات متعددة ويقول ما داست لك على طرف!!
يعني الكلام الحلو اللي كان يعطيني إياه بس عشان يضحك علي وما اروح أشتكيها ..
هنا هددته إني ما نسيت أمر الشكوى وقلت له طالما إنت ما عندك غيرة على عرضي فالقاضي عنده غيرة وبياخذ حقي ووالله إن تنجلد ..
ما رجع كلمني وبالعكس بلكني .. لكن خلى أمه تكلمني تحاول تتوسط فقلت تخلونها تجي تعتذر لي فرفض زوجي إنه يخليها تعتذر
وبعدها خلا أبوه يكلمني وأبوه يقول خلاص ضربها وش تبيه يسوي يموتها لك! ارجعي بيتك بس وأنا آخذ حقك وأكمل أي شي يقصر فيه ولدي!!!
قلت ما أبي ولدك وحقي إخذه بالشرع منها دام ذي علومكم !!
وأنا الآن ما في خاطري إلا الانتقام .. ودي أخرب بيتها زي ما خربت بيتي .. ودي الناس تتكلم إنها انجلدت زي ما خلت اللي يسوى ونا يسوى يتكلمون بعرضي والأهم ودي أدق خشم زوجي واحرق قلبه عليها لأنه وسخ زيها وحقير ..
مقهورة يا بنات لي في بيت أهلي شهور ما فكر يخلي أهله يكلموني ويوم خاف ع زوجته خلاهم يكلموني ..
كنت اقول مستحيل أضره لو يطلقني لأنه أبو ولدي لكن موقفه الأخير موت الطيبة اللي في قلبي ..
أنا اللي رضيت بالتقصير وتعاونت معه ولبست وتجملت وخدمته بعيوني ولا كنت أزعجه لو برسالة اذا هو عند زوجته ولا أجيب طاريها ولا أتدخل فيها ولا أحرض عليها ينسف لي هذا كله ويوقف معها هي وهي غلطانة علي غلط كبير!!
حاسة بغبن وقهر .. ممكن حتى تلعب بمخه وينكر ولده وهو يسويها عاد لأنه ضعيف جدا قدامها ..
يا بنات أنا يطردني بالأسابيع وهي ما يستحمل فراقها يوم !
أنا إذا زعل علي يبلكني ويبلك اهلي معي وهي يبقي لها الخطوط دايما مفتوحة وما يقطع عليها طريق الرجعة ..
والله من الزعل اللي فيا مو عارفة أفكر .. كان ودي أقهرها وارجع بيتي عشان طفلي ياخذ حقه من أبوه غصب عنها لكن موقفه الوصخ معي خلاني أفكر بالطلاق بجدية
وبشكواها ..
شوروا علي ي حكيمات وفسروا لي مواقف زوجي الحقير اللي حتى هاللحظة رافض يطلقني!