خواتي أنا قليلة المشاركة لكن متابعة جيدة لهالمنتدى و يوميا ادخل هالقسم واقرا و اتعلم واستفيد
و بصراحة تعجبني آراء كثير من الاخوات و نصايحهم الحكيمة
عشان كذا حبيت اطرح مشكلتي و استفيد منكم و من تجاربكم في الحياة
القصة باختصار ابوي منفصل عن أمي من يوم احنا صغار
امي جابت ولدين و بنت ، اللي هي انا
و طبعا ما عاد نشوفه الا كل سنة مرة
حتى اذا رحنا زيارة لبيت جدي (ابو ابوي الله يحفظه ) ما نشوفه ابدا
أعمامي نحبهم ويحبونا و من صغرنا نروح لهم و علاقتنا فيهم ممتازة و ذكرياتي معاهم حلوة جدا
ابوي ما اعرفه و لا كيف شخصيته ، وانا صغيرة احبه لانه ابوي
و في نظري انه احسن انسان في العالم ، طبعا امي حبيبة قلبي عمرها ما قالت لنا كلمة شينة عن ابونا
كبرت و بديت افهم الحياة اكثر واكثر
ابوي استقر في مدينتنا و بديت اتعرف عليه و على زوجته و اخواني
حبيتهم و انبسطت انه ابوي صار قريب مني
اخواني الصغار حبيتهم
لكن لاحظت ان مرت ابوي ما تحسب لي حساب ان انا بنت زوجها و اخت عيالها
يعني اقرب وحدة لهم من العايلة كلها
تعامل زوجات عماني و عيالهم و عمتي احسن من معاملتها لي
انا قلت مرت ابوي الا بيصير في نفسها شي من ناحيتي ، شلتها من بالي يعني ما حاولت افرض نفسي عليها
مع انها تحب اخواني العيال (اشقائي) و تحترمهم و تطير فيهم
ابوي بدا يعاملني بجفاء ، معاملة اول مرة اشوفها منه و يكلمني من غير نفس
و يعزم اخواني وانا ما يعزمني
والمشكلة يدق على بيتنا وانا اللي اكلمه يقول قولي لاخوانك يجون يتغدون معانا ( هو وزوجته واخواني الصغار) ما معاهم احد ، وما يقول لي و لا حتى راعى مشاعري ، و اذا كلمته ابي ازوره يقول اليوم مشغولين و كذا وما يعطيني موعد ثاني ، يعني احس ما وده اني اجيهم اصلا
انا انسانة حساسة و هادية و مو من النوع القوي اللي يفرض نفسه على الناس
بينما ابوي يرسل اخواني الصغار لنا احيانا من غير ما يقول لنا ، وما يدري اذا مشغولين والا عندنا ظروف و مع ذلك مااقول شي ،
انا اللي بكون معاهم في البيت و العبهم واهتم فيهم ، و اذا شي للمدرسة يكلمني ابوي اعملي لاخوك كذا و اعملي لاختك كذاو انااعمل لهم و مافي شكر و اخواني العيال طبعا كل واحد لاهي بنفسه و الحب والغلا لهم وانا لي المعاملة الشينة
فكرت وفكرت و تعبت بصراحة من التفكير ، يعني ما يبونك و مع ذلك يفرضون نفسهم عليك ،
بصراحة قلبي شال على ابوي حيل ، وانا ما احب اشيل في قلبي على احد ، فكيف اشيل على ابوي ؟؟؟
و هو الله يسامحه دايم ينتقد تربية امنا فينا ، وان احنا ما نعرف شي و ما نفهم شي في الحياة
و كل شي في بيتنا غلط و ما يعجبه ، مع انه بيتنا مضرب المثل في الدين و الاخلاق و الكرم
وهو حتى جدي مو راضي عليه و لا على طريقته في حياته
فكرت مرة ثانية و فكرت لحد ما تعبت ، قلت يمكن المشكلة مني انا
اكيد ما عرفت اكسبهم
صرت ادعي في سجودي ان الله يزيل ما في نفسي على ابوي
و انه يسخره لي
و سبحان الله صارت له مشكلة كبيرررررة من بعدها تغير معي ١٨٠ درجة
معاملته الشينة صارت حلوووووة
و صار يهتم فيني و يمدحني و يثني علي ( حتى زوجته صارت تغار مني)
صار يعزمني معاهم للسفر
انا ارتاحت نفسيتي و تقربت منهم اكثر
و صرت اهدي اخواني الصغار بمناسبة وبدون مناسبة
واجيب هدايا لابوي ومرت ابوي
و ابوي مدحه لي يزيد في المجالس و عند اعمامي اذا كنت معاهم
و صار يراعي مشاعري بالكلام
لكن دوام الحال من المحال ( ما ادري احنا يالناس ايش يرضينا بس)
بحكم ان ابوي صار قريب مني ، صار دايم يسألني ايش تسوين و وين تروحين و صار يعرف عن حياتي كل شي تقريبا
و كل هذا طبعا يقوله لزوجته ، و لأعمامي و صارت تفاصيل حياتنا الكل يعرفها
لكن هم و بيتهم ما اعرف عنه شي ابدا
اسمع اخبارهم من زوجات اعمامي
الكل يعرف عنهم كل شي الا انا ما اعرف شي
حتى اني مرة صرت بموقف غبي جداااااااااا و رحمت نفسي بقوووووووووة
كان المجلس كله يتكلم عن موضوع كبير صاير ببيت ابوي وانا ما ادري وش السالفة ،
مع اني كل يوم اكلمه واطمن عليهم بس ما يقول لي شي ابدا
هنا بديت اشيل في قلبي على ابوي مرة ثانية
صرت نكتة في المجلس ، ابعد الناس يدرون عنه ، وانا زي الاطرش في الزفة
و ابوي ما زال كل يوم يسألني عن حياتي ، وحتى زوجته اذا جلست جنبها تسألني و تدخل في اشياااء مو من حقها تسأل عنها
رجعت افكر مرة ثالثة ، فكرت وفكرت
وصلت الى اني انسانة و لي طاقة تحمل ، و مو من حق أحد يتدخل في حياتي
وخاصة اني انسانة احب الخصوصية جدا وما احب التدخلات ، بس ابوي تحملته لانه ابوي
لكن ما عاملني بنفس المعاملة ، و لا حتى عاملني زي الاغراب
قلت يا بنت ارحمي نفسك و ابوك هو ابوك لكن حطي حد للتدخلات
و فعلا صار اذا سألني ما اجاوبه بصراحة ، و اغير الموضوع
لحد ما فهم اني ما ابي اتكلم ،
رجعت علاقتي بابوي تفتر و تصير جامدة جدا
ما عاد اتقبل منه و لا كلمة
و لا تصرف
كل شي ولو كان صغير احطه كبر الجبل
ما عاد اطيق منه لو نظرة
و خاصة مع اخواني اذا يحكون عن ابوي ابدا انتقد بتصرفاته و بافكاره
اليوم اخوي الكبير عصب علي و رفع صوته علي ، قال هذا ابوك و لا تتكلمين عنه كذا مهما عمل فيك
انا اعترف اني غلطانة ، و حتى لو مو ابوي المفروض ما اتكلم عن احد بالتزمت هذا ، فكيف عاد اتكلم عن ابوي بالطريقة هذي
بديت اتعب و ما عاد فيني افكر ، تعبت من التفكيييييييييييييررررررررر
رغم اني انسانة جدا متسامحة و احب الخير للناس ، و اخلاقي الكل يثني عليها،،،،
لكن انا مع ابوي شي ثاااااااني
ابيكم انتوا هالمرة تفكرون و تعطوني حل ، ما احب اكون انسانة عاقة ، وربي يغضب علي
ما احب اكون انسانة ظالمة و اللي اظلمه هو ابوي
ابي قلبي يرجع يصفى و ما يشيل
انتظر حلولكم و نصايحكم و خبراتكم في الحياة
و الله يوفقكم و ينولكم مرادكم
يلزم عليك تسجيل الدخول أولًا لكتابة تعليق.
الله يسخر لكي ابوك ويهديك ويخليه لكم
والله مااعرف بأيش انصحك ان شالله الاخوات يفيدوك واكيد ماحيقصروا معاك
استودعك الله
والله مااعرف بأيش انصحك ان شالله الاخوات يفيدوك واكيد ماحيقصروا معاك
استودعك الله
الصفحة الأخيرة
بس هذآ ابوك نصيحه بري فيه واكسبي رضآه
وهو يمكن مآكان يبي يتكلم علشآن زوجته
اخآف اقول رأي واجيب العيد
في بنآت ردودهم تريحك وتبرد قلبك ان شآالله