أنا في هم عظيم بين أمي وأم زوجي وغيرتي..

السلام عليكم بنات..

أحس بغيرة على حزن على اكتئاب..
امي ماشاء الله عليها امرأة فاهمه ومتعلمة واجتماعية..
معظم يومها يا زيارات أو اجتماعات أو اهتمام بشغل البيت...
عندها شغالتين وطباخه.. وعندها غيري بنتين وولد..

ام زوجي كبيرة بالسن ومو متعلمة..
وماعندها الا شغالة وحدة.. وكل يومها جالسه ببيتها..
وما عندها الا 3 بنات وزوجي..

وانا موظفه وماعندي شغاله وعندي بيبي صغير..
وساكنه لحالي بس صحتي على قدي..
وولدي الله يهديه متعبني.. لا ليلي ليل ولا نهاري نهار..
من ولدته وأنا حاسه بارهاق وتعب وصداع مستمر..


هذي كل التفاصيل.. نجي للمشكلة..
أمي ولا مره قالت لي خذي شغاله تساعدك مره بالاسبوع عالاقل..
رغم اني دايما اشكي لها من تعبي ومن شغل البيت..
وسبق طلبت شغالتها وقالت بعدين برسلها لك.. ولا ارسلتها ولاشي..
لكن ام زوجي كل ماكلمتها عرضت شغالتها.. وهي ماعندها غيرها!!


اذا رحت لأهلي.. امي ماتجي تسلم علي لحد ماتخلص شغلها..
واحيانا تكون برا وهي عارفه اني بجي باليوم الفلاني..
على اساس ان المفتاح معي واقدر ادخل ومو محتاجة احد يستقبلني..

اما ام زوجي فأول ما ادخل بيتها تحتفي وتلم ولدي..
وتسلم وتسأل وتسولف.. وتبوس ولدي وتحضنه وتلعبه الخ..




أمي اذا ابحط ولدي عندها واروح مشوار تقول لي: لا تتأخرين..
وام زوجي تقول لي اذا بتروحين مكان هاتي ولدك عندي..



حتى زوجي مفهمته اني ببيت اهلي بس اتمغط واتدلع..
وهو اذا كلمني وانا عند اهلي يقول لي اجل شبعانه نوم اليوم..
اقول له ايه امي اخذت الولد وانا رحت اتسدح وانام..
وانا اكذب.. ولدي ناشب لي حتى ببيت اهلي..


وهاليومين قال لي زوجي نسافر اسبوع واخلي ولدي عن امي..
ولما قلت لامي هالشي قالت حرام ولدك صغير لاتحرمينه من الرضاعه الطبيعية..
خليه لين يكبر وروحي وتعالي على كيفك..


واشياء كثييييير ثانية..
المهم اني بالاخير تكلمت مع امي وواجهتها بهالامور..
وقلت لها اني صرت اغار من ام زوجي وانقهر من تعاملها..
واني كنت اتمنى امي هي اللي تحس فيني اكثر من باقي الناس..

امي هنا عصبت مررره..
وقالت انتي ماتدرين بالضغط اللي عندي..
انا مو فاضيه مثل ام زوجك.. ولا تكرهيني فيها وبأهل زوجك..
وانا مو محتاجه اعبر لك عن حبي لانك بالنهاية بنتي وانا امك..
وولدك اذا حبيته والا ضميته فمو عشانك.. لاتنسين اني جدته..

وبالاخير ماعطتني فرصة اقول كلمة وانتهت النقاش..
رغم اني كنت اتكلم معها بهدوء شديد.. وهي انفعلت بقوه..


بعدها بنص ساعه رجعت كلمتني..
وقالت لي حرام عليك انا تعبانه ومضغوطه..
وانا لمتى ابستمر بالحياة زي الطاحونه..
وتغير صوتها كأنها بكت.. وقالت مع السلامة وقفلت الخط..




احس ضايقة فيني الدنيا.. ومحتاجة رأيكم..
جزاكم الله خير..