أنا محتاره وفيني حزن ما يعلم فيه الا رب العباد...ادخلو تكفون

السلام عليكم ورحمة الله وبركاته

الصراحه مب عارفه كيف أبدا أقولكم عن مشكلتي...والله اني مستحيه منكم أنا مشكلتي معقده شوي

وارجو انكم تساعدوني بالمشوره....مشكلتي تتعلق بزواجي من ولد عمي...انا مخطوبه لولد عمي من 3

سنين وانا ما كنت موافقه اصلا مجبوره عليه....ولد عمي الصراحه انسان طيب وعلى نياته بس

المشكله اني ما اقدر اتقبله كزوج لأني وبكل أسف اقولها تعرضت للتحرش من قبل أخوه اللي أكبر منه

وانا صغيره وما اقدر انسى هالشي بس مع ذلك هالشي ما سيطر على حياتي لأني لازلت عذراء ولله

الحمد ومحد يدري عن هالشي غيري وغير اللي يقرا عن مشكلتي في هالمنتدى وطبعا ولد عمي المجرم

اللي هو أخو خطيبي والله ما تتصورون كيف اكرهه وادعي عليه في كل وقت اذكر فيه للي صار هذي

المشكله الأولى والمشكله الثانيه ان ولد عمي اللي هو خطيبي حاليا كان يحب وحده تقرب لنا وكان

ناوي يتزوجها بس اهلها رفضوه وانا اعرف البنت زين وهي وايد تقرب لي انا بالذات اكثر منه (بنت

خالي) تخيلو ولا بعد كلمها بالتلفون...وبعدها بفتره قصيره خطبو له أهله وحده ثانيه بدون علمنا وبعد

رفضوه ولاحظو ان هذا تم في الفتره اللي كانو متكلمين فيها عنّي ونحن آخر من يعلم.....المهم بعد ما

انرفض بفتره قصيره جدا تمت الخطوبه وطبعا انا كنت رافضه جدا ولأقصى درجه وكنت اصيح ليل نهار

بس (لا حياة لمن تنادي) كانو يقولون ما تعرفين مصلحتج وانتي غبيه هذا ولد عمج بيصونج ومحد

يدري عن النار اللي تكوي قلبي

يا بنات انا الحين محتاره وايد عرسي تحدد وابويه اليوم بالذات من غير إالحاح مني قالي استخيري واذا

ما تريدينه قولي عشان نفك الخطبه ونرد المهر انا مستعد ادفع كل فلوسهم اللي صرفتيهاا مع العلم ان

ابويه عرض عليه هالشي لأنه مواجه مشاكل هالايام مع اهله وخايف عليه اتبهدل في حياتي لأنه أهل

ابويه وايد تصير مشاكل بينهم.....والله يا بنات أنا ما عرفت ألجأ لمنو...انتو خطرتو على بالي لأنكم أكيد

بتكونون محايدين بالاضافه الى أني اقدر اقولكم عن كل اللي في خاطري وخاصة عن سالفة التحرش

اللي اول مره اتكلم عنها في حياتي

أنا الحين خايفه أفك الخطبه وتصير مشاكل وتزيد العداوه مع انها موجوده وكل حد يقولي بتندمين وما

بتلقين احسن منه وبتعنسين وانا احس اني مب مرتاحه من الداخل بسبب تحرش اخوه فيني يعني افكر

كيف اتزوج اخو اللي تحرش فيني ماعرف انا ابالغ والا امشيها عادي لأنه محد يعرف

بالموضوع...بالاضافه إلى إني حاسه ان خطيبي مغصوب عليه لأنه خطبني بعد مده قصيره من تقدمه

لبنت خالي اللي يحبها والله مب عارفه شسوي والله فيني حزن ما يعلم فيه الا رب العباد واللي زاد

الطين بلّه انه أهل ابويه مسترخصيني بشكل ما تتصورونه كل ما طلبت شي قالو لي متدلعه علينا وايد

تطلبين وانتي فيج وفيج والخ الخ من هاالكلام بعض البنات يمكن يعرفون انه الاهل يسترخصون

بعض...والله يا بنات اني ما طلبت شي ازيد عن اللي خذوه حريم اخوانهم... اللي يحز في الخاطر انهم

مستكثرين كل شي عليه عمّاتي واعمامي مع انهم يدفعون دايما بس ماعرف ليش مسكثرين

عليه....وكل اهلنا متعودين على الصرف في الاعراس...أدري اني طولت عليكم اعذروني والله ما عندي

حد اشكي له همي وقلة حيلتي أنا حسيت بالراحه شوي يوم كتبت الموضوع وخاصة يوم بحت لكم بالسر

اللي محد يعرف عنه من صغري والله أول مره ابوح فيه تعبت من الكتمان...انا ما اقدر اشرح كل

الاسباب حق اهلي بس عندكم قلت كل شي وارجو انكم تساعدوني في اتخاذ القرار الصعب والله يا بنات انا اكتب لكم ودموعي على خدي وحيرانه ما عرف شسوي وخاصة انهم طالبين مني اعيش في نفس البيت اللي ساكن فيه اللي تحرش فيني والله صعبه...الله يصبرني ع اللي فيني بس ادعو لي يا بنات والله ارجوكم تدعون لي انا استخير بس ما احس براحه أمي تقولي (وعسى ان تكرهو شيئا وهو خيرا لكم) بس بدون ما تعرف عن اللي في قلبي وعن سبب رفضي الأساسي