وكثير اسمع ( شلون اكون واثقه ؟ ابي اوثق من نفسي ! )
بالبدايه ايش هي الثقه ؟
وكيف الاهم اعرف اقوي ثقتي بنفسي .؟؟
الثقه تعني اني عارفه قدراتي ومميزاتي ومطمئنه بها ولها ..
يعني كيف ؟
يعني انا عارفه مثلا ان جسمي حلوو فالبس الملابس بكل ثقه !
هنا مميزاتي ( جسم حلو ) بالتالي ( مظهر باللبس انيق ) بالتالي ( واثقه من جسمي ! بالتالي ( أي نظرات توجه لي يبرمجها عقلي على انها اعجاب وايجابيه لشكلي !
يمكن مايكون قصد اللي يناظرك مثل ماانتي توقعتي بس لانك من داخل واثقه فماتستلمين الا رسائل ايجابيه !
اذا لا يمكن اكون واثقه نهائيا الا لما اكون مطمئنه بقلبي ومرتاحه من هالقدره او الميزه اللي عندي ..
.. لكن
لما يكون شكلي حلوو وانا مو اثقه مهما مدحوني الناس لا ااصدق !! غصب علي في شي بداخلي يقول لي هذولا يجاملونك بس ولا انهم يبالغون ماعرفوك على حقيقتك !!
شايفين كيف الروح السلبيه تصارع أي رساله ايجابيه تنبعث لها ..
طيب كيف اكون واثقه ؟
مبدئيا لازم نعرف انه لايوجد ثقه مطلقه نهائيا !!
يعني كيف ؟
يعني انا اكون واثقه من جسمي لكن مو شرط مثلا اكون واثقه من ملامحي او شعري او ايديني وكذا ..
اكون واثقه من طبخي وطعمه اللذيذ بس مو شرط اكون واثقه من فن تقديمي لاكلاتي وسفرتي ..
طيب افهم من كلامك انه مستحيل اكون واثقه من كل ابو شي فيني .؟
لاا ماقلت انا كذا بس حبيت افهمك انها الثقه جزئيه لازم تفعلينها بكل مكان .. كل مكان فيك تكبسين زر الثقه فيه وبالتالي تصيرين كلك مولعه ومشرقه
اذا تبين تكونين واثقه من شكلك .. حددي اولا وش اللي يزعجك فيه ؟ وش اللي حابه توصلين له ؟
مثلا وزنك زايد
هنا انتي متذمره وكل مارجعتي من السوق تكونين طفشانه وتسبين السوق خايس ووو وحتى لو اشتريتي لبس وانتي لابسته مو واثقه وبس تنتظرين أي اشاره من الناس علشان تاكد ضنونك
حتى لو كانت نظره عابره من وحده تهوجس بزوجها
.. انتي تفسرينها انها قاعده تنتقدك وتقول وع شكلها ووو ويمكن تجي وحده تمدحك بطهاره قلب .. وانتي تفسرينها انه ايه فلانه شافت شكلي يع حبت ترفع من معنوياتي .. علشان كذا اول ماتردين عليها تقولين شدعوه عاد تبالغين ..
واذا جت وحده مزحت معك يادوبا وينك << انتي هنا بنفسك ايييه شفتي اني دوبيه وكل العالم ملاحظه
.. السوق ماكان خايس .. ولا لبسك شين .. ولا العالم تنتقدك .. السبب الرئيسي هو عدم رضاك عن وزنك ..
طيب وش تنتظرين ماتنحفين ؟ كم كيلو كفيله تحقق لك طله اكثر ثقه وحياه اجمل !!
خلينا من الشكليات انا مشكلتي اكبر انا مااعرف اتكلم قدام الناس وربي تضيع علومي حتى لو هي سوالف عاديه !!
ياقلبي انتي لا مشكله اكبرولا شي نفس الشي صدقيني
طيب شلون ؟
خليني اشرح لك ..
انتي لما تكونين بمجلس تظنين ان العالم يناظرونك بانتقاد .. وكلهم عارفين انك مو واثقه من نفسك .. وانه اول ماتتكلمين بتخطين وماعندك ذاك المستوى بالحكي فعلطول بيقولون وش هالقرويه !!
صدقيني اوهااام .. لانك من داخلك سلبيه صرتي تبررين أي تصرف من الاخرين بشكل سلبي ..
لنفرض انك مريتي بتجربه اختنا اللي تهوجس وهي تتطالعك .. فورا بتخبين نفسك وبتقولين ياربي اكيد هي تقول بنفسها وش هالبزر اللي ماتعرف تحكي وعندها علومك كلها !!
سبحان الله الناس مجرد مايشوفونك يعرفون كل شي سلبي عنك .. وحتى لو مدحوك تراهم نصابين بس يسلكون لك ولا انتي وع ولا تعرفين تتكلمين واسلوبك يفشل ووو
طيب وش اسوي ..
ياقلبي اول شي ثقي ثقه تامه انك افضل بكثير من الموجودات ولو شفتيهن يلعلعن بالحكي !!
يمكن عندك الكثير من الامور اللي ممكن تنطرح او يسولف فيها بس مخبيتها وماتشوفينها لانك دائما مغلبه الخوف والسلبيه عليك وعايشه بضلام وحيده ..
وبعدين تعالي .. وش المواضيع اللي تنظرح بمجلس الحريم مو عارفه تسولفين فيها .؟ لا يكون تركيب مفاعل نووي ولا اكشتافات جيلوجيه ؟
تراها نفس المواضيع بكل قعده ( السوق + المناسبات العامه + الاولاد + وقت الدراما وكل وحده تشكى+ الاخبار السياسيه العامه او العلومات العامه اللي يمكن مره عليك 100 مره + التعليم والوظايف واشياء تعيشينها انتي واهلك وصديقاك مو شي جديد !! )
معقوله ماتعرفين تشاركين بحوار زي كذا .. وانتي عندك نت
اطلعي اتعلمي اكتشفي اشيا اء جديده اسئلي وربي مااحد مقصر معك باي شي
انما العلم بالتعلم ..
مفتاح الثقه هو ..
اعرفي امكانياتك ..
انا وش ماهره فيه . ؟ بالطبخ مثلا بالحوار .. بالتفاهم .. بالاستماع ., بالقراءه ..
وش املك من مميزات ؟ شكلي حلو .. شعري .. طولي .. نعومتي .. جاذبيتي .. الخ
وقويها تفنني بالطبخ اكثر جربي طبخات عالميه .. اصناف جديده .. تعلمي فنون التزيين وترتيب السفره وكذا
قوي مفاتيحك ..
شكلي حلو .. اثق اني جميله بشهاده مرايتي اولا واستنادا على مدح الناس .. واثق ثقه كامله ان في من يشوفني ملكه جمال الكون .. وفيه من يشوفني عاديه .. لذالك شهادتي انا اقوى
شعري .. اهتم فيه اتعلم تسريحات جديده تناسبه اتمتع بهالميزه اللي ربي اعطاني اياها واشكره عليها
اقوي ابراز المميزات علشان اعرف بها .. واكون واثقه منها ثقه تنسيني سلبياتي ان وجدت ..
خليهم يقولون فلانه جسمها حلو وتعرف تبرزه بطريقه احترافيه
فلانه شعرها حلو ومبدعه بتسريحه
فلانه ملامحها روعه وتعرف كيف ترسم المكياج يطريقه تخليها اجمل وكذا
انشغلي بتفعيل ايجابياتك علشان تعلين الثقه عندك وتلهين عن الحزن على السلبيات اللي راح تختفي تماما كل ماعليتي مستوى ثقتك بنفسك ..
ثم بعدها احدد سلبياتي ..
مثلا دوبا .. ايديني سمر .. رجليني فيهن خشونه .. مو واثقه بالحكي .. خجوله .. الخ
امسكي كل سلبيه وعدليها فورا .. دوبا ( نادي رياضي .. اشتري جهاز رياضي بالبيت ,. انتبه على اكلي )
ايديني رجولي .. الكريمات ماليه الصيدليات والنت فايض من الخلطات
مو واثقه بالحكي .. احدد ليش ؟
هل لان ثقافتي قليله ؟ << اقويها بالقراءه المستمره مو شرط كتب ومجلدات .. لا مواضيع النت والجرايد وغيرها تغنيك ثقافيا بشكل حلو
لاني اخاف من رده فعل الناس ؟ << احطهم اخر همي واراقب اللي يسولفون بالمجلس هل كلهم الناس تصفق لهم ؟ ولا فيهم من تخطي وفيهم اللي تنتقد ويعارضونها ويناقشونها ومع ذالك ماتوقفت مستمره تسولف اكثر واكثر
واتدرب اولا احكي مع اهلي بطلاقه .. ثم مع صديقاتي .. ثم مع اللي بجنبي بالمجلس ثم مع قروب محدد ثم مع الناس كلها .. اهم شي مااستسلم مااوقف مهما واجهتني تعليقات ..
واثق ثقه كامله ان مافي احد بالكون مااحد انتقده او ضحك عليه ..!! ومع ذالك العالم مستمرين بالحياه ماانتحرو
ومو شرط انتقدوني او ضحكو يعني معهم حق !
يمكن يكونون سفهاء ينتقدون لاجل الانتقاد وسعه الصدر . ولا يكونون متفهموني فالعيب بفهمهم مش بي ..
ويمكن اكون انا فعلا اخطيت .. فماادس راسي بالتراب علشان خطاء !! الاصح اني اعالجه واستمر افضل من قبل واتعلم من اخطائي صح ؟
منقول :) لاتنسون الردود ياحلوين ..