أنا وأخواتي وأمي وزوجة اخوي وأخوي العزيز(ابي رأيكم)

السلام عليكم ورحمة الله وبركاته

أخواتي ابيكم تنصحوني أنا انسانة جدا جدا مسالمة وأحب حريم أخواني واعتبرهم صديقات بل هم صديقات وزوجة اخوي الوسطاني والله احبها كثيييير واعتبرها اخت وتعرف مشاكلي وافضفض لها ومافي شي اخبيه عنها وهي بعد تحبني وتشكي اخوي عندي لو غلط عليها واوقف معاها من قلب على أن اخوي طيب وكريم بس دايم ارحم الحريم احس الرجال مهما يكون قوي ودايم اقول بنات الناس أمانة عندنا تركوا اهاليهم وبيوت اهلهم جو عند رجال يمكن يخاف الله فيهم ويمكن يظلمها وبعض الأهل يمن على زوجة الولد برجالها اللي زوجها ربي عليه وقدره من نصيبها :44:
ماابي احد احسن من حريم اخواني وابيهم بعز وابيلهم يعيشون مرفهات ويسافرون وينبسطون ويلبسون احلى لبس من محبتي لأخواني ومحبتهم واحب عيالهم والله كثيييير
وعشان هالمعاملة الحسنة اخواني مايطيحون لي كلمة بالأرض ابدا لأني مااتكلم الا بخير او اسكت ويثقون في كلامي
المشكلة الحين لاقية ضغط من خواتي يقولون زوجة اخوك فلان الوسطاني قاطعة امنا ..امي لها خمس اشهر جاها من غير شر عليكم فشل كلوي الله يشفيها من كل مرض ويشفي مرضاكم..ومازارتها مرة اخوي الوسطاني وهي ساكنة في فيلا ثانية بنفس الحوش ويقولون امي مثأثرة كثير والحق يقال اخوي ماتغير على أمي كريم بار وصول طيب شايلها الله يرضى عليه وامي تقول لااحد يقوله عنها شي خلوها عشان اخوكم يرتاح وعشان العيال.. امي طبعها مثلي ولا تلمحله ان زوجته قاطعتها وماتدري هو يدري او لا والحين خواتي يقولون وش تبين بوحدة قاطعة امك كلمي اخوي يتصرف معاها ولو كلمت اخوي اعرفه يصدقني اخاف يقوم بينهم شر وانا مايهون علي اشوفهم في مشاكل وعيالهم احبهم بستشيركم يابنات خواتي زعلانين من سلبيتي ماعمري تكلمت عن زوجة من الزوجات مهما يصدر منهم واقول لاشفتهم غلطوا كلنا بشر من منا معصوم عاادي بكرة ننسى بس متأثرة ان زوجة اخوي قاطعة امي وامي يابنات ماتحكي وانا بعد مثلها وش رأيكم والله استحي اكلم اخوي ياناس رجال طيب ماودي اكدر خاطره وزوجته عسل وطيبة بس مدري وش في النفوس

لمحت لها ان تزور امي وقلت لها زيارة المريض فيها أجر ولمحت لها ان خالاتي وعماتي احرجوا امي كل ماجوا يسألون عنك ومايشوفنك عندها... وقالت ابشري ولا راحت ثلاث مرات المح لها ابيهم يقصرون الشر هي واخواتي اما خواتي فأنا اقولهم مالنا دخل بالمرة اهم شي اخوي مع امي طيب ومرت خمس شهور ماقبلت على امي واخواتي مايكلمونها الا بخير يسلمون عليها بس يكلموني انا يبوني اتصرف:(


ارشدوني بنات أنا على حق والا باطل المسألة حساسة وماابي امي تحس اني ماعلي منها وتشوف اخواتي مقهوريين وانا اهديهم اخاف تفهم اني مااهتم لها علما بأني بارة بها كثير بنات انا في الغربة كل سواليفهم معاي تلفونات ومسنجر وانا قبل السفر وانا مع زوجات اخوي سمن على عسل وامي رضية فيها حيل تحت رجولها وتحبني وش اسوي توهقت ساعدوني بس حاز في نفسي امي الغالية كثيييير متضايقة والله يشهد امي ماتستاهل طيبة:icon33::09:

يابنات اخوي الوسطاني رجال له وقفات ومازال معنا حنا ياالبنات يدعمنا ماديا ومعنويا ولايقعد الا تحت رجول امي وانا استحي منه وبعد اخواتي يستحون وامي تستحي منه بار في امي الله يرضى عليه شايلها حتى بالمستشفى يرفض ان اي بنت ترافق معاها وحتى يوم نرافق معاها ينام مع امي ومعنا في المستشفى وزوجته هي اللي مقاطعة امي كانت طيبة بس مدري ليه تغيرت يوم امي طاحت ومرضت اخوي كاسرنا بطيبته نبلع الخطأ عشانه وش رأيكم يابنات والله ثم والله انه رجال يستاهل ادعوله ربي يخليه لأمي