أنا وأمي حياتنا كلها مشاكل

السلام عليكم ورحمة الله وبركاته
مادري كيف ابدأ ولكن قصتي باختصار، انا بنت عمري فوق العشرين لكن مع الأسف حياتي كلها مشاكل مع أمي بسبب وبدون سبب.
فترة الطفولة كانت زينة مرة وكنت أشوفها أروع أم بالعالم،
تقريبًا من بدأت مرحلة البلوغ وبدأت هرموناتي تتغير زي كانه جاتني زي الصدمة وماقدرت اتقبل واقع اني كبرت فجأة، صرت دراما وأبالغ وأكبر المواضيع وهالشي ماكان بيدي لان الهرمونات شي الشخص مايقدر يتحكم فيه، لكن مع الاسف فترتها أمي اكثر شخص ماكانت قادرة تفهمني ، اذا سويت مشكلة تكبرها وتكبرها وتكبرها بشكل محد ممكن يتصوره،

ومن يومها تقريبًا بدات تزيد بيننا المشاكل
تجينا فترات نكون مرررة عسل مع بعض وماتتخيلون انهم نفسهم احنا الي كنا قبل ، ولكن بين كل وفترة وفترة لاااازم تصير بيننا مشكلة

وترى مو أي مشكلة، مشاكل كبيرة جدًا والله ماتوقع تقدروا تتخيلونها ، والغريب انه أحيانًا يبدأ الهواش من لاشيء.. لكن يكبر الموضوع بشكل يخوف.... لدرحة صرت اتمنى لو كان عندي أم ثانية، اليوم لو تسمعون الكلام الي تقوله لي مابتتخيلون انه في أم تقول كذا لبنتها
وبصراحة انا ما أسكت ): ما اقدر أسكت .. لو اني اسكت كان الحياة حلوة .. لكن صعب علي والله اني اسكت صعب.. حاااولت كثيييير وكل مرة افشل.. تكفون احتاج مساعدة، كل شي بحياتي اتخلى عنه بسبب المشاكل الي بيننا

فيني شي غريب وهو اني مو قادرة أعاملها كأمي، احاول والله احاول بس مااقدر، ماني قادرة اعطيها هيبة انها أم، تجينا فترات لو تشوفونا تقولوا ذولا أعداء مو أم وبنتها
ماعرف هل ممكن الي بينا يكون سحر او شي لاسمح الله؟ تكفون فيدوني ):
لأني والله مو شخص سيء، انا كثييير طيبة وحساسة واراعي مشاعر الناس ولو عليّ بساعد كل الناس يعيشون بسلام..
لكني مع أمي فجأة أصير شخص ثاني، فجأة بدون سابق انذار اصير اكرهها
عادي جدًا اني اكون اليوم احبها واموت فيها فجأة بعد دقايق بس عشان كلمة قالتها اصير ماودي اشوفها ..

مع انه بفترة الطفولة كنت أشوفها أكثر ام مثالية ، وماكنت اتخيل في أم بطيبتها، والله اني كنت احبها بشكل كبيييييير .
لكن فجأة ماعاد صرت قادرة احبها
اتمنى تساعدوني كيف ممكن اصير اقدر امسك نفسي واسكت ، وكيف اقدر ارجع احبها، وهل الي فيني طبيعي؟ معقولة في بنت مو قادرة تعتبر انه الي قدامها أمها؟
صح مع العلم اني احترم ابوي واقدره جدًا، ولو حسيت ان زعل لو زعل بسيييط على طول يحز بخاطري وما أقدر اتحمل انه حد يزعله