أنا وأم ريلي.. قولولي انا صح ولا غلط

شحالكن الغاليات؟؟؟
عساكن إلا بخير...

عزيزاتي بدخل في الموضوع على طول وبدون أي مقدمات... انا متزوجه من اقل من سنه ولظروف ريلي الماديه ساكنين عند طليق امه مؤقتا بحكم ان امه عندها طفل (اللي هو اخو ريلي من الام) عطتها المحكمه نص البيت... بس البيت وايد صغير مافيه إلا 3 غرف... وهي خذت الميلس وسوتها غرفه حقها... والريال يزاه الله خير عطانا غرفه نسكن فيها مؤقتا لين ماندبر امورنا لأن وايد يحب ريلي وهو اللي مربنه....

المهم مب هاذي مشكلتنا... المشكله اني انا وريلي نفكر الحين نشتري بيت... وبكون صريحه انا اللي بشتريه لأن راتبي اكثر من راتب ريلي وبقدر آخذ سلفه من البنك عشان نقدر نشتري البيت وبيكون البيت باسمي... ماتتصورون شكثر انا فرحانه بهالشي.. صح بيكون عن طريق البنك بس إن شاء الله يالسين ندبر امورنا وريلي والشهادة لله مب مقصر وياي في أي شي ومب موافق على سالفة اني انا اللي اشتري البيت بس انا مصره لأني ابا مملكتي وابا احس بالاستقرار لأني ساكنه في بيت ريال غريب مايقرب لي لا من بعيد ولا من جريب

بعد مب هاذي المشكله (((اتحملوني شوي،،، من زمان مانزلت موضوع هنيه خخخخخخخ))) المهم،،، المشكله في أم ريلي... بصراحه هي حرمه ما شاء الله عليها تنحط ع الجرح يطيب... وياما ساعدتني في اشياء وايد ووقفت وياي في مواقف وايد وعمري ماراح انساها هالشي... والله يعلم انا اشكثر احبها واعزها واحترمها واعتبرها شرات امي واكثر... بتقولون وين المشكله؟؟؟!!!

المشكله الغاليات إنها واااااااااااااااايد عصبيه بشكل مب طبيعي... انا احس انها جيه بسبب الظروف اللي عاشتها في حياتها وخلتها جيه تستوي.... وغير جيه حساسه وااااااااااايد على اقل كلمه تزعل وتصيح وتسويها مناحه واكثر من مره طردتنا من بيت الريال... وانا بصراحه كرامتي ماتهون علي انطرد على اتفه الاشياء... يعني إذا ريلي انشغل في شي وماقدر يسويلها اللي هي تبغيه في نفس الوقت وتأخر عليها تيلس تصيح وتسويها سالفه وتقول اطلعوا من البيت مابا اشوفكم هنيه... والله يعلم ان اللي منعنا ظروفنا الصعبه خصوصا اني ماكنت اشتغل الشهور اللي طافت... والحمد لله رب العالمين اكرمني بوظيفه راتبها فوق الممتاز وعشان جيه افكر اشتري راحة بالي

وغير جيه اخو ريلي عمره 14 سنه وهو ما شاء الله عليه بالغ حتى اللي يشوفه مستحيل يعطيه اقل من 17 او 18 سنه... يعني ما اقدر آخذ راحتي طول ماهو موجود... وام ريلي تبغي كل شي على كيفها وبطريقتها هي ومن كل شي تجز (يعني تقرف حق اللي مافهموني خخخخ) ومايعيبها اي شي... وانا انسانه ابا اعيش على راحتي بدون قيود

بعد بتقولون وين المشكله... المشكله انها تقول اذا طلعتوا من البيت بسير وياكم وبسكن وياكم... والله والله والله ان ماعندي اعتراض على هالشي... بس انا ابا بيتي حقي وابا اخذ راحتي فيه وهي إذا يت ويانا عمري ماباخذ راحتي في بيتي لأن طول ماهي موجوده ماراح يكون بيتي... وغير جيه عمري مابقدر البس اللي ابغيه طول ما اخوه موجود... وهي مستحيل تروح اي مكان بدون ولدها الثاني ومستحيل تخليه عند ابوه...

بصراحه انا ما اعرف كيف اتعامل وياها لين الحين... وعلى اقل كلمه نقولها حتى لو كانت مزحه بريئه تقلبها مناحه وتصيح وتسب وتلعن وتدعي علينا وماتخلي كلمه ماتقولها... وانا ما اقدر اعيش في هالجو وانا عمري ماتعودت عليه

انا كلمت ريلي في هالموضوع وقلتله انا يوم فكرت اشتري البيت فكرت اشتري راحة بالي بعد... وماريد حد وياي في بيتي... هل انا غلطانه؟؟؟؟ اخاف الله يحاسبني ويعاقبني على هالشي... ماعرف شو الحل... شوروا علي

على فكره... هي الحين عندها غرفة وصاله مأثثتنهم احسن أثاث والصاله والغرفه كبار يعني المكان مب ضيق عليها... وقسمها معزول... وبيت ابوها موجود محد ساكن فيه غير اخوها وهو ساكن بروحه في البيت وفيه 4 غرف فاضيه... يعني عندها مكان ثاني تسيرله

قولولي شو اسوي؟؟؟؟

اسمحولي لأني طولت عليكم بس بغيتكم تفهموني عدل