أنا وسكري الحمل..عجزت أفهم!

جعلها للجنة ووالديها اللي تساعدني


الحين أنا سبق وجاني سكري حمل..
وفي حملي هذا يسوون لي تحاليل السكر وتطلع قراءاتي
في حدود الـ 4 والـ 5....وكانوا ينبهوني أسوي حمية........


طيب أنا قبل أسبوعين كان عندي موعد أشعة...
وماطولت في المشفى زي العادة يعني خذت بس ساعة وشوي...

وراجعة مافيني إلا العافية...وماكنت نايمة الليل زين فحاولت أرجع أنام...
وفي الطريق طقني الجوع وأفطرت طعمية حسيت إنها ساس البلا لاعادها الله من طعمية


صرت أحس إني ورطانة بجسمي..ماني مرتاحة...بنام ماأرتحت...أتقلب كني مقروصة...
فجأة حسيت بتعرق ودوخة..قلت بقوم أغسل وجهي...يوم قمت غمتني الدنيا وماعاد شفت شي
لحق علي ولدي وزوجي وأنا أرمي روحي على السرير وبس أستفرغ الله يكرمكم وجسمي يتنافض وخدرانة

خفيت بس قعدت دايخة ومصدعة من الظهر لين المغرب خذت حبتين بنادول وأكلت وخفيت شوي

بس من وقتها وأنا أحس بدوخة طول هالأسبوعين...وأوقات أحس كنه وده يغمى علي
أحس بصداع مع أن الصداع ملازمني طوال حملي

اللي قهرني رحت أمس وسويت تحليل قبل الفطور طلع معي قياس السكر 6.2
ويوم أفطرت طبعاً فطور المستشفى الله يكرم النعمة ماينوكل يادوب كلت كم لقمة المهم عقب الفطور طلع تحليلي 6
يعني نقص..

واسأل الدكتورة اللي من شفت حواجبها وعيونها الطايرة وأنا غاسلة يدي منها

قالت مافيك شي..تحاليلك كويسة وكل شي كويس كان جيتي أول ماتعبتي

قلت بخاطري بلاني عارفتكم مالمك أحد...قلت أنا للآن أحس بتعب وإرهاق موب طبيعي وبس من أسبوعين
صح الحمل متعبني ومدوخني بس تعب هالأسبوعين موب طبيعي...

حقرتني وهمها بس تحاليلي..وانا حلفت لو أعالج عند بنغالية مرة ثانية ولا أرجع لها
نفسها في خشمها واصلاً من تصطحت ع السرير يادوب حطت حق دقات قلب البيبي على كرشتي إلا وهي شايلته كنها ملسوعة!

ويوم شكيت إن معي آلام كنها آلام الدورة مستمرة من يوم حملت وش سوت!

قالت أرفعي كرشتك بيدك عشان تحط الجهاز على أسفل بطني!

قالت لو حاسة إنها مشكلة حولتك للطوارئ!!..يعني أنا عندها وهي طبيبة ولادة..وش وظيفتها أجل!

مابقى إلا تخليني أنا أمسك الجهاز عنها وأشخص حالتي!

أنا ماأرتحت للدكتورة ولا لطريقة علاجها ولا حسيت إنها دكتورة وتحسفت على إنتظاري لها:(
وأصلاً مستشفى العسكري صاير من تالي خرطي....

وبسأل الدكتورة ماأدري وش أسمها القحطاني أحد قد تعامل معها؟

المهم أنتم دكاترتي الحين خخخخخخخ
اللي محترفة حمل وولادة تشخص حالتي..وش أسوي

ووش تتوقع عادي وأكبر وسادتي؟

وبسأل وشلون أعرف لو سكري منخفض أو مرتفع يعني شي يكون واضح
لأني حسب ماقرأت حسيت أعراضه متشابهه مايفرقها إلا اللي صقع فيه السكر لين قال بس:icon33: