أنا وشغالتي والاستراحة!!

السلام عليكم
ابي رايكم بالسالفة اللي ابقولها لكم الحين، ابي افضفض..
آآآآآآه بس آه الله يكفينا شر الدنيا وشر من فيه شر.
هذا سلمكم الله ،اليوم طلعت لاستراحه مع اهلي وحريم اخواني،وولدي ابو ثلاث سنين وولدي هذا الله يصلحه مزاجه مرررررررره متعكر ونفسيته تعبانه لانه كان مريض من فتره..
فصاير طول الوقت لازق فيني وطلبات أشكال وألوان وغلقة وصياح ويزعل ويضرب راسه فالأرض الله يهديه بس ويفتح على قلبه.
وطبعا شغالتي مبسوطة ان الولد متعكر ولايبي غيري،عشان هي تاخذ راحتها عاد.
المهم انا يوم فاض بي الكيل،اخذت ولدي وطلعنا نتمشى شوي برا الخيمه وجلست احايله لين بدأ شوي يندمج،ناديت الشغالة ووصيتها عليه(هم حولنا مره مو بعيدين) المهم ما أمداني ارجع للخيمه شوي الا وهو وراي وبدأ مسلسل التنكيد من جديد،عطيته جوالي يتفرج وحاولت ألهيه وقلت للشغالة خليك حول باب الخيمه ،اذا طلع انتبهي له.
اثر الاخت ما صدقت الولد يرجع عندي وطوالي راحت للشغالات بالمطبخ (لاحظوا ان ولدي من دخلنا وهو معي ماتهنيت بقهوه ولاغيره الله يصلحه حتى البامبرز الله يكرمكم انا اللي مغيرته له)
المهم بعد فترة كذا الاطفال جابوا كور من البقالة،يوم شافهم لان راسه وطلع بيلعب معهم (على اساس شغالته معه) وما امداه الضعيف يلعب الا ونسمع طراااااااااااااااااخ !
طاح وليدي على وجهه وانفتحت جبهته شي بسيط الحمدلله اللي ستر،انا طمرت اركض وعظامي ماعاد شالتني وانا اشوف الدم والعالم كلها حولي من ضمنهم شغالتي السندريلا وأقوم أصرخ فيها من روعتي وقلت وينك عنه؟
قالت انا بعيد،انا بالمطبخ!
المهم انا ماعاد كلمتها لهيت بالولد،دقينا على ابوه صار بعيد وجاء اخوي ودانا وخيطوا الجرح الحمدلله وزوجي جانا بالمستوصف وعيونه كلها شرار.
طلعنا من المستوصف،خذنا شغالتنا وللبيت طوالي.
زوجي ناداها وسألها مع انه عمره ما كلم الشغالة بس من كثر ماهو مرتاع على الولد ومعصب منها سألها: كيف طاح؟
قالت : ما ادري كان مع ماما :mad:
قمت قلت خلاص اتركها انا اتفاهم معها،قلت وينك عنه،وش انا قايلة لك؟
قالت: ليش انا اجلس،هو على طول سوا سوا انتي ما يطلع.
قلت : لا هو بيجلس شوي بعدين اذا شاف البيبي يلعبون طلع معهم ( لو فيها خير كان حايلته ورغبته يطلع يلعب معها ومع الاطفال)
قالت:انا روح عشان اشرب شاهي.
قلت معليش جيبي كوب واجلسياشربي هنا قريب (زيها زي غيرها من الشغالات اللي معهم اطفال)
قالت: وشو فايده انا اجلس ،هو ممكن يطلع وممكن مايطلع،انا اروح اشرب شاهي وبس.
يوم شفتها بدت تصير وقحة قلت : الشاهي اشربيه بالبيت جعلك الشربه،انا ما ادفع لك راتب عشان انتي تشربين شاهي وولدي يجيه اصابه.
مع العلم يا بنات انه بالبيت ما اسلمها ولدي ابد، دايم ولدي معي وانا اللي قايمة بكل شؤونه،انا جايبتها بس لشغل البيت،ولاعمري طلعت وتركته معها ، يعني لاتقولون طفشانه من كثر ماهو مقابلها.
الان يابنات انا متحسفه،ماودي اني رفعت صوتي عليها، انا ما أحب كذا،بس والله غصب عني من روعتي على ولدي ومن حر مافيني (قهرتني)
واللي زاد الطين بلله اختي قالت لي :منتي صاحيه،ليش هاوشتيها قدام الناس،والله ان تحقد عليك وتسوي بكم شي:(
قلت انا ما هزأتها:بس قلت وينك عنه (بس بنفخه صراحه) وغيرها ماقلت لها ولاكلمة،ماكلمتها الا بالبيت،لما ناداها زوجي.
بعدين انا يوم اهاوشها كانت ردة فعل سريعة مني ،الواحد احيانا من الروعه ما يتحكم بتصرفاته.
الان انا ضايق صدري من اللي صار، ما احب اهاوش احد،وخايفة تحقد علينا واحس اني مره متضايقة مدري وش اسوي.
مشكلتي اني عصبيه جدا جدا جدا،بسرررعة أثور.
وعقبها تطقني الحسوفة اسبوع،ياليتني عاد اتركد على كثر ما اتحسف.
بس والله يا بنات ان عصبيتي غصب عني مو بيدي.
وش رايكم باللي صار؟
وش تشورن علي به؟ :(