أنا وغيرة خطيبة اخوي

يابنات والله هالمشكلة مسويه لي ارق

اخوي اللي اكبر مني بكم سنة خطب قبلي ب 4 اشهر تقريبا وكلنا فرحنا له وعلاقتي بهالاخو وايد قوية قبل الخطوبة طبعا

طلعاتنا و دخلاتنا مع بعض

وبيوم عقد القرآن وصيتها على اخوي لانه اغلى اخ عندي وبالمثل اهو شرح لها ان احنا اكثر من الاصحاب

ومشت الايام وانخطبت بدوري:icon28: وصرت الاقيها بالبيت كل خميس وجمعة بحكم شغلي

بس لاحظت عليها انها تغار مني من لبسي ومن المكياج اللي احطه لما يجي خطيبي وساعات احسها تطالعني من فوقي لتحتي
المهم ذوقي وذوقها فرق بين السما والارض انا امشي على الشيء البسيط والفخم وتقريبا على الموضة لدرجة ان كل البيت يمدحون باختياري وبالذات اخوي بس مو قدامها مع العلم ان اختياراتها دايما موديلات قديمة وماتعرف شيء بالمكياج الا اللي اعلمها اياه

واهي بيوم الجمعة تجي وتجيب وياها طبق حلى من صنع يدها ساعات تضبط وساعات لا

الا ذاك اليوم خطيبي جرب طيقها وعجبه وطلبت منها الطريقة ورفضت استغربت منها كررت الطلب وسوت روحها ماسمعتني ومشت :angry:

قلت شفيها ذي

الا بنفس اليوم خطيبي:arb: يقول لي من زمان ماسويتي لنا حلى قلت له مااعرف قال لي والحلى اللي كنتي تسوينه باول ايام الخطوبة قلت له اللحين مافيه وقت لان اجازتي بس الجمعة واذا بقعد اطبخ مابقدر اجلسس وياك شيء

وبصراحة ابتديت افكر اني اسوي:22: طبق حلى كل اسبوع واجهزه قبل يوم بس ماابغي تكون كمنافسة او ان احد يقول اي شافت خطيبة اخوها وابتدت تطبخ خخخ

ياناس هالبنت محيرتني كل مااحاول اقرب منها واعتبرها اخت لي واشاركها بطلعاتي ودخلاتي اشوفها تحط حواجز رغم اني وبصراحة ماارتاح لها بسبه اللي تسويه بس عشان اخوي مستعدة اسوي اي شيء

وصدقوني حاسة باخوي عشان خطيبته ماقاعدة تتعدل او تكشخ له صح الطريق الى قلب الرجل معدته بس بعد الشكل مهم (وتراها ماتعرف تطبخ الا حلويات بس بينما انا كل شيء اعرف اسويه خصوصا اطباق الغدا والعشا بس سبحان الله ماحب اسوي حلاوة الا على المزاج)

وللعلم انا وياها بنفس العمر :09:

مادري شسوي وياها اخلي علاقتي فيها سطحية عشان اتجنب التصادمات والا اتقرب منها ؟؟

واسفة طولت عليكم