أنا و أخت زوجي ... والحل معها ,,,

السلام عليكم ورحمة الله وبركاته


شلونكم اخواتي الحلوات ..

يا اخوتي حابه اخذ آرائكم وطريقة تعاملي مع اخت زوجي المصونه

اخت زوجي كبري في العمر بيننا تقريبا 3 اشهر .. ه متزوجه قبلي بسنه ونص عندها بنت عمرها 3 سنوات

من اول ما تملكت وهي ناشبه في حلقي نشبه الله لا يوريكم ... تتصل علي ووش اشتريتي واشتري من المكان الفلاني .. مدري وش تقصد انا مو سفيهه والا ماعندي ذوق عشان حضرتها ام الذوق تعلمني

كنت اجاوب بعض الاسئله واطنش بعض مره حومت كبدي ..

بعد مازوجت نشبت اكثر واكثر .. صرت لو بكح كحت معي .. ياساتر ..
بعد زواجي ب3 شهور قال زوجي بنسافر بس بناخذ امي معنا .. انا وافقت لاني احب خالتي مره وهي طيبه وحليوه .. تخيلوا يابنات كنا بنمشي بعد صلاة الفجر لدبي يوم جات الساعه 3 الا هي تشرف .. بروح معكم انا وزوجي لا وبنفس السياره .. طبعا لا تعليق ماقدر اوصف لكم شعوري ذيك اللحظه

زوجها مقدر ماليا وانا وزوجي وضعنا جدا عادي صح ما نخلي شي بخاطرنا بس بالمعقول

اذا شافت علي شي من وين شاريته ؟ اقول لها مثلا من محل في اسواق طيبه << لالالا ماصدق طيبه تبيع شي زي كذا .. قلت المعنى ع الذوق مو ع الماركه او المحل .. دايم تبي تحطمني ولا قدرت

ذكرى زواجي بما اني عند حموله ماحبتت احتفل فيها في البيت لاني عند حموله قلت لزوجي بنسافر ورحنا الكويت .... بنات يابنات استوعبوا هي ذكرى زواجها بعدي بشهر تمامااا .. انا جلست بس 5 ايام ورجعت تخيلوا مامدانا نتواسا الا قالت بروح ماليزيا < تقول خالتي وش يوديك قالت يمه ذكرى زواجي بروح احتفل هناك ... وهي ولاعمرها اصلا سافرت بذكرى زواجها الا يوم ساافرت ....... ياربي رحمتك
اخرتها اخرتها يوم حملت طبعا جلست ينه ونص ماحملت .. يوم درت اني حامل وبشرناهم تخيلوا بنات ماقالت ع البركه قالت بخرب عليك :eek: عشان مايجي الغلا لولدك والا بنتك

وصارت ماتكلمني ويالله تسلم علي كله غياره ,,, ةالله نكدت علي هي واختها اللي اكبر منها غيورين مرره وصرت بس اتحيسب عليهم ثنتينهم ......حسبي الله ونعم الوكيل

والله يابنات والله اني يوم جيت الشهر السابع هي حملت وسقطت استغفر الله العظيم

بعد ماطلعت من النفاس ولدي بصراحه ما اشتري له غالي الا مناسبه كبيره او ماله داعي لانه شهر شهرين وكابر عليها واذا نزلت انا وولدي تحت بس يتفقدون لبس ولدي ويارب لك الحمد مالقوا شي علي وعليه لاني احب التنسيق ..

غيرت عبايتي شريت عباية كتف واسعه والطرحه الخليجيه الكبيره عشان ماتطيح عبايتي لا شلت ولدي بعدها بفتره اتصلت علي تسألني من وين شاريتها .. (زوجها قاضي ) ان زوجي يقول ان عبايتها ساتره مرره ولا بينت ولا شي من جسها احسن من عبايتك موضحه جسمك ... يارب ارزقني الحلم

بنات تكفون تعبت من هالعيشه استغفر الله واتوب اليه

فيه احد منكم مثلي والا اللي عندي حاااااااله خاصه ...
تفاعلوا معي الله يجزاكم خير ويسخر لكم :26: