السلام عليكم و رحمة الله و بركاته
أنا متابعة قديمة لعالم حواء من بداياته ,, و اشتركت قبل ست سنوات يعني عندي معرف غير هذا ,, بس قبل فترة ادمنت قراءة مواضيعكم في هذا القسم و سجلت مخصوص عشان أشارككم بتجربتي في الحياة الزوجية
و أعتذر لكم من الحين لو طولت قصتي لكن والله محتاجة أفضفض و أتكلم لأن كل اللي بتقرونه سر بيني و بين زوجي
أنا عمري 28 سنة و زوجي اكبر مني بخمس سنوات ...خطوبتنا كانت تقليدية بس من الللقاء الأول حبينا بعض و الحمدلله ... هو الحمدلله مو ناقصه شي ... أخلاق و التزام و وسامة و علم و مركز وظيفي مرموق ... طبعه هادي و حليم ...و ما عنده خرابيط بنات و سفرات ... و أنا نفس الشي ... جامعية و جميلة و طيبة و ماحب المشاكل و أحب الخير للجميع و لا أناظر غيري ... علاقتي ممتازة بأهله لأن خواته أساسا صديقاتي ... و هو مواقفه مع أهلي مشرفة و يحبونه كنه ولدهم ...
علاقتي معه فيها انسجام تاااام و حب كبير و احترام ... و علاقة صداقة قوية ... احنا فعلا أصدقاء أكثر من كونا زوجين .... مرينا في ظروف و مشاكل و مواقف زادت علاقتنا قوة و ثبات
تراني ما أدور على حل لأن ما عندي مشكلة حاليا .... بس حبيت أشارككم همومكم بهموم قديمة قدرت أسيطر عليها و أحلها و الحمدلله أنا أعيش الآن في سعادة تاااامة ماشاءالله تبارك الله
بصراحة أنا غيركم .... انتو كلكم تشتكون من أزواجكم و انهم سبب المشكلة و انكم غير مقصرات في شيء ... و أنا هنا يمكن أكون أول وحدة تعترف على نفسها
اي نعم أنا كنت مقصرة في حق زوجي و كنت أستغل طيبته معي و صبره عليّ .... في بداية زواجي كنت اشتغل و كنت مهملة في بيتي ما كان عندي شغالة و كان زوجي يتضايق و ينبهني بكل ذوق و أدب و كنت أحاول أوفق بين شغلي و البيت بس ما حاولت كفاية ... جسمي كسول و خامل و أحب النوم ... استغليت طيبة زوجي و كنت أطنش ...
حتى لما طلعت من الشغل لما جبت بنتي, ما تغير شي و قمت أتحجج بالبنت و قلة النوم .... و هو يسكت و يقول : دائما حججك جاهزة
ما كنت أتفنن له في الطبخ مع ان خواته و زوجة اخوه طباخات ... و كنت ما أبدا أطبخ الا اذا جا من شغله يعني يدخل البيت و ريحة المكان طبيخ و يتضايق و يدخل ينام ...
ما كنت أهتم بنفسي , كان عندي أهم شي اكون نظيفة و ريحتي حلوة لكن ما كنت أهتم بملابسي ومكياجي و أناقتي قدامه ... كنت واثقة من نفسي و من شكلي لهالدرجة .... و كنت واثقة انه يحبني في جميع حالاتي .. و انه مستحيل ينظر لغيري ... و هو ما كان يحرجني أبد .... بس اذا جيت من عرس و أنا كااااشخة و أدلع عليه ما يمدح و لا يطالعني اصلا و يقول انتي مو لابسة لي انتي لابسة للناس ماراح اقول رايي فيك
زوجي يحبني جدااااا و مواقف كثيرة أثبتت لي هالشي ... ما عنده سوالف ديوانيات و استراحات .. مع انه اجتماعي جدا و عنده أصدقاء و قبل الزواج كان دايما مع أصحابه و كان عنده ديوانية , بس بعد الزواج ترك هذا كله لأنه صار رب عائلة و مسؤول عن اسرة و هذا كلامه ... وقت النوم يحب ننام مع بعض و نحضن بعض ... أنا كنت أتضايق لأني كنت أحب السهر فكنت إما أقوله روح نام و أنا لاحقتك و بعدين ما اروح و ينام قبلي .... أو اروح معاه و أنتظره ينام و أطلع ... و هو يتضايق من هالشي و دايم يسألني ليش ما تكوني انسانة منظمة تنامي بدري و تجلسي الصباح تهتمي ببيتك ؟ و كالعادة تبتدي الحجج مني و أقرا في عيونه زعل ... بس كنت أطنش و اقول , يحبني و قلبه كبير
أما العلاقة الخاصة كنت أتهرب منها و أحاول ارضيه بس بدون نفس و يبان علي و هو كان يتحمل و ينبهني بأدب بدون ما يحرجني و أنا كنت ماشووووف ألمه و تعبه مني ...
باختصار كنت غبية جدا .... كنت أظن ان زوجي مثالي و مافيه منه .. و إني مهما سويت راح يتحملني ... و كنت واثقة من حبه لي ... و انه مستحيل يجرحني و انه يحبني بجميع حالاتي
لين قبل سنة تقريبا ... دخلت عليه غرفة النوم و حسيته ارتبك ... و كان قاعد على اللابتوب ... رحت جنبه و قلت له : طبيت علييييك شتسوي ؟؟؟ و طبعا كنت أمزح ... لقيت الماسنجر مسكر و مكتوب فيه ايميل غريب ما أعرفه ((أنا أعرف ايميلات زوجي و كلمة السر حقته نفسها حقتي)) قلت له ايميل مين هذا ؟؟ قال هذا ايميل صديقي شكله نسى ما طلع منه ... و صديقه هذا يجي أحيانا يقعد مع زوجي بالمجلس لأنه يدرس معه في الماجستيريذاكرون مع بعض ... طبعا أنا صدقته و نسيت الموضوع
بعد اسبوع تقريبا ..... كان جهازي عطلان ... أخذت جهازه و فتحت الهوتميل على اساس أدخل ايميلي ... فجأة يطلع لي نفس الايميل اللي شفته مفتوووووح .... طبعا أنا انصدمت صدمة شديدة ...عرفت من عناوين الرسايل ان الايميل هو مسونه للدراسة لأنه يكمل ماجستير في البحرين .... الرسايل اغلبها محترمة بينه و بين الدكاترة ... و بينه وو بين بعض زملائه ... بس اللي صدمني رسايل بينه و بين وحدة معينة ... ابتدى الكلام بينهم عادي عن الواجبات و المحاضرات ... و بعدين تحول لكلام ثاني .. و كل الفترة اسبوعين !! و طبعا يشوفوا بعض في الجامعة و في المسنجر ...
طبعا انا كنت ارتجف و أنا اقرى الايميلات ... اللي صدمني مو بس خيانة زوجي لي ... انا انصدمت فيه هو كشخصية و اتزان كيف يسوي كذا ؟؟ زوجي ثقيييييل و رزة و ما يعجبه العجب !!
الايميلات كلها بالانجليزي و الحمدلله انا ماخذة دورات انجلش و لغتي ممتازة جدا ... و هي سعودية و تدرس معاه كلامها محترم مافيه قلة ادب بس من النوع اللي يتدلع بثقل ... و عرفت كيف تدخل لزوجي ... زوجي أنيق جداااا يلفت النظر بأناقته و يحب ريحته تكون حلوة حتى في البيت يتعطر و يلبس و يكشخ و هالشي من اول ما اخذته .... و هي قامت تمدح في ملابسه و شياكته : ((المحاضرة اللي فاتت كنت وااااو)) و هو كان يقولها انها جذابة و ذكية ..
و فيه ايميل يبي يعزمها على كوفيشوب و هي ترفض ... و ايميل تقوله انها كانت تبغى تعطيه علبة مناديل صغيرة تذكار منها ... و ايميل تشكره على البيتزا اللي شراها لها .... و ايمل يقول لها انه راح يكلمها الليلة و هي تعتذر و تقول لا ما اقدر كلمني بكرة... والله كل حرف كنت اقراه زي الخنجر في قلبي ... زوجي حبيبي ... بعد كل اللي مرينا فيه و بعد حبنا الكبير بسوي كذا ؟؟ ذيك اللحظة ما فكرت في الاسباب كنت مجروحة ...
كان طالع كلمته و قلت له ابيك تعال الحين قال وش فيه صاير شي ؟؟ قلت له لا بس ابغاك في موضوع ... جا و صكيت علينا باب الغرفة و سألته عن الايميل حاول ينكر بعدين شوي شوي قام يعترف بس كان يضحك على نفسه طول الوقت ... حلف لي انه كان يتسلى و ان مافي اي شي عاطفي بينه و بينها ... و انها مو حلوة و كبيرة في العمر في الاربعين تقريبا و مطلقة ... و قمت ابكي و هو يهديني و سهرنا طول الليل نتكلم و هو يحلف لي اني حب حياته و اللي سواه لمجرد التجربة و انها هي اللي ابتدت الموضوع لأنه ماله في هالشغلات ... المهم اعترف بغلطه و اعتذر لي و كان جدا حنون و كنت اشوف الندم في عيونه ... نمت بحضنه ذيك الليلة و انا ابكي ...
و جلست من النوم الفجر و قمت ادور باللابتوب ... لقيت محادثة بينه و بينها ... تشتكي له من زوجها !!! يعني طلعت متزوجة ... و هو يشكيلها مني !! تقوله زوجها ما يحب العلاقة الخاصة و انه ما يهتم بشكله و انها تتفشل منه بالرغم من انه له منصب في عمله... و هو قام يواسيها و قال عني اني جميلة و ان احنا اصدقاء و انه يحبني بس مو قادرة توفر لي اللي ابغاه منها ... و هي تقول انها بالعكككس زوجها يعتمد عليها في كل شي ...
انتظرته لين جلس من النوم و واجهته بالمحادثة و انا منهارة من البكي و أقول له : البنت متزوجة و انت تشتكي لها مني ؟؟؟ توك تعرفها و قاعد تتكلم علي عند وحدة بنت حرام قاعدة تخون زوجها ؟؟ قال لي ان هالمحادثة اخر محادثة بينهم و انه ما كان يدري انها متزوجة الا من هالمحادثة .. طبعا هو كان منحررررج و راح العمل ... و اتصل فيني يتطمن علي و يحلف انها كانت تسلية وانه شكى لها من باب المواساة و ان الحياة لا تخلو من المشاكل ... و صار يضحك علي اذا سألته اذا حبها او لا و يقول اي حب انا ما عرفتها الا قبل اسبوعين ومافي قلبي غيرك .. و يضحك على نفسه انه اول مرة يسوي كذا في حياته و أصيييده .. و ((عمره ما تبخر , تبخر و احترق )) .... طبعا انا اعرف زوجي و صدقته بس ظل في قلبي شك من ناحيته ..
لما رجع من العمل تكلمنا و كنت تعبانة نفسيا ... و قلت له قول لي كل شي أبي اعرف كل شي ...قال لي هاذي وحدة اصغر عيالها عمره 10 سنين ... و ان عمرها حول الاربعين بس ما يبان على شكلها ... بس مو حلوة عادية جدا ... محجبة و الكل يحترمها في الجامعة و طالبة ممتازة ... بس ياما تحت السواهي دواهي... و شكلها تكره زوجها و ناقمة على حياتها معه ... و تنقصها العلاقة الخاصة .. و الحب ...
و قام يحكيلي عن اللي دار بينهم ...تخيلوا يا بنات الوقاحة !! و لاحظوا ان زوجي يعرف اسمها الكااااامل بما انها زميلته... زوجي اثناء المحادثة يقول لها اعطيني خمسة قصده خمس دقايق , تقوله خمس ايش ؟؟ بوسات ؟؟
و مرة تسأل زوجي عن الالوان اللي يحبها ... يقول لها انه يحب الوان الطبيعة الهادية مثل الازرق و الأخضر ... و هي قالت : أنا أحب اللون الفوشي خصوصا في الأندروير !!! زوجي تفاجأ بكلامها خصوصا انها كانت تلعب دور الثقيلة ..... و طبعا سايرها في الموضوع و أرسل لها ايميل وردي و فيه كلام غزل ...و قالت له يدلعها بإسم فاكهة و هذا كان آخر ايميل بينهم ... طبعا انا أساسا أكره الفوشي و كرهته زيادة ... و هالفاكهة كانت فاكهتي المفضلة و كرهتها ,,, الموضوع كله أثر عليي سلبيا و تعبت منه جداااا و صرت شكاكة بشكل مخيف ...
اليوم اللي وراه كان رايح الجامعة و وعدني انه ما يكلمها و يخلص و يطلع بسرعة ... و بالفعل بعد يومين ارسلت له ليش طلعت بسرعة و ما شفتك .. و هو مطنشها ...
لاحظوا ان زوجي حبيبي ما أحرجني و قال أنا سويت كذا بسببك !! لا ... حط كل اللوم على نفسه و ان هذا غلط مهما كانت الاسباب ... لكن .. أنا انعدمت ثقتي في نفسي من بعد ما كانت عااااالية ... و صرت ادور و افتش وراه ... و كان هذا شغلي الشاغل ...و كنت أتكلم معاه في الموضوع يعني الموضوع ما تسكر بينا ... و كنت أحس انه يتضايق و يقولي لي خلاص انسي و ركزي على حياتنا و علاقتنا و أنا أبكي و اقول من حقي اعرف كل شي ...و هو يقول من حقك بس لا تبكي والله الموضوع عاااابر والله يغفر لي ((و ماعاش راس على الدنيا يبكينا)) ...
و قررت أرسل لها و أواجهها ... من باب رد الاعتبار بما إنه تكلم عليّ عندها ... و كان كلامي جدا محترم معها ... و قامت تقول فلان انسان محترم بس تجاوز حدوده معي و عزمني ... قلت لها انتي ادرى مين اللي تجاوز حدوده و كل الايميلات و التشات قدامي ... أنا و زوجي اصدقاء و مافي شي يأثر علينا ... و قامت تقول انتي ما تعرفيني لا تحكمي علي من مجرد كلام قريتيه , أنا أحب أمزح ماقصدي شي .. و الدليل اني ما قبلت العزومة و هو تجاوز حدوده و أنا وقفته عند حده !! طبعا انا قلت لها انتي ما احترمتي الرباط المقدس اللي يجمع بينك و بين زوجك و ما احترمتي امومتك , و الايميلات مليانة تجاوزات حمراء و فوشية ... لو انتي وقفتيه عند حده ليش تسمحيله يدلعك ؟؟ و ليش تقابليه في المسنجر اساسا ؟؟ و أنا ما أهددك رغم اني اعرف اسمك الكامل و أعرف ناس يعرفونك ... بس بغيت اقولك تنتبهي لنفسك من باب عمل الخير لأنك هنا تتعاملي بإسمك الحقيقي و لا تثقي بأي أحد ... و بغيت اقولك اذا ما كنتي سعيدة بحياتك لا تخربي حياة الآخرين ...
و ضيعت وقتي و أنا أفتش وراه ... و أسوي له مؤامرات و أرسل له ايميلات و دعوات بأسماء بنات .... و هو ذكي جدا و لماح و يعرف ان انا اللي ارسل له على الرغم من حذري الشديد , .. و في كل مرة نضحك ..و استمريت على الحال شك و تفتيش لأكثر من خمس شهور .. و اليوم اللي يروح فيه الجامعة استلمه تحقيق .. و مرة رحت معه الجامعة بس للأسف ما شفتها ... المهم ان الموضوع كان ماخذ كل تفكيري
و في يوم من الايام و انا قاعدة أفتش اكتشفت ايميل ثاني قديم لزوجي و دخلته .. مافيه شي بس فيه اشتراكات لمنتديات زواج من قبل 8 سنوات ... و دخلت على الاشتراكات مافيها شي و لا عنده اي مشاركات في المنتديات , يعني سواهم و نساهم .. و من هاليوم قررت أتغير بشكل كاااااامل عشان زوجي .... زوجي مستحيل يتزوج علي بس ما كان عنده حيلة غير هالشي .... عندها أدركت ان الموضوع مو علاقته مع زميلته ... الموضوع انه محتاجني ... محتاج اهتمامي . محتاج يعيش كزوج و يحس بالحياة الزوجية ... ما يكفي اني اكون صديقة زوجي , لازم أكون حبيبته و عشيقته و كل شي بحياته
وابتديت مشوار التغيير .... صار عندي شغالة عشان أنا اتفرغ لنفسي .... و نظمت يومي .... و صرت كل ليلة انام بحضنه ... و العلاقة الخاصة بينا و الحمدلله على افضل مايرام ... و صرت أهتم بشكلي و ملابسي و الدلع و الشخلعة ... و استرجعت حبيبي و رفيق دربي ... اللي ما يستاهل مني الا كل خير ..
تعلمت من هالدرس إني ما أهمل زوجي ولا يوم .. لأن الزوج محتاج حب و اهتمام و حنان مثل الطفل ... و تعلمت إني ما أثق بنفسي زيادة عن اللزوم ... لأن الجمال وحدة لا يكفي ... و بديت اقرا في الذكاء العاطفي ... و بطلت تفتيش ورا زوجي ... و صرت أقرب له من قبل ... و ما أقدر على فراقه و لا يقدر على فراقي ... لدرجة انه اذا سافر تبع العمل يكلمني بالساعات ..
و هاذي مو أول مشكلة تصير بننا لكن هي المشكلة اللي تتعلق بالخيانة و اللي قررت اتغير من بعدها
حاليا أعيش أفضل سنوات زواجي قولوا ماشاءالله .... بيدي رجعت زوجي لرشده و عقله بعد ما لبس دور ما يشبهه اطلاااااااقا ... بس تخيلوا لو ما اكتشفت الموضوع وش راح يصير ؟؟؟
الحمدلله رب العالمين اللي خلى زوجي ينسى يسجل خروج من ايميله هذاك اليوم .... كانت صفعة قاسية صحتني من سبات عميق ... و درس قاسي و اختبار صعب و الحمدلله نجحت فيه ... و صراحة ودي ارسل لها ايميل اشكرها على وجودها في حياتي لأني اكتشفت ان وجودها كان ايجابي مو سلبي
دعواتكم لي الله يحفظ لي زوجي الغالي و يخلينا لبعض و لأولادنا و يديم علينا السعادة يارب
:arb::27:
تفكيرك كان ايجابي
وهو سبب تغيرك