كيفكم ياغاليـــات إن شاء الله جميعكم بصحه وعافيه
ورضى من الرحمن
قريتو هالجمله (أنبسطنا في جمعة اليوم .. من جد فليناها ..!!!)
ياكثر مانقولها بعد أي جمعه او سهره أو لقاء سواء بين الأقارب أو الصاحبات أو الزميلات او الجارات او حتى في المنتديات ..
كثير أفكر في هالموضوع لما أتخيل أني بأبتعد عن إنسانه عرفتها وكنت على صله معاها
وصارت ظروف فجأه وأنقطعنا او أبتعدنا سواء لفتره معينه أو للأبد ..
يعني هناك أخوات اقابلهم اكثر من مره في الشهر او في الأسبوع
اتساءل وش هو اللي يجمعنا وش اللي أستفدناه من جمعاتنا بس تغيير جو ووناسه ؟؟
ولا فيه شي ثاني نجتمع من أجله ونتساعد عليه وهو القرب من الله ...
تخيلي معي انك تجتمعي كثير بهالإنسانه ..
مثلا .. تروحين عندها مثلا وتنبسطين وتضحكين وتغيرين جو ولكن ..!!
غيرت فيك أشياء كثيير بطريقه غير مباشره .. يعني مثلا .. لما تدخلين عندها تلاقي فوق الرف او بجنب الكنبه قرآن ..
ملابسها ساتره يعني ماتلاقيها لابسه بنطلون ضييق او البطن ولا الظهر ظاهرين أو لابسه قصير
بحجة أنها تمون عليك وأنك جارتها او قريبتها ..
وكمان تلاحظي في سواليفها وكلامها كثرة ذكر الله .. ولاتجيب طاري أحد بسوء ولاتغتاب وحتى لو أحد أخطأ تحاول تبرر خطأه
مع عيالها ماتسب ولاتلعن بس تدعي لهم .. الله يصلحهم .. الله يهديهم .. الله يعينني في تربيتهم ..
إذا ذكرت زوجها ذكرته بالخير وتدعي له ...
لما تفتح التليفزيون فتحت على الحرم وقالت
ماشاء الله اليوم مليان الحرم أو تفتح على قناة دينيه وقالت :
هالشيخ يعجبني كلامه
سبحان الله تأثر فيك وأنتِ مو حاسه تلاقيها ماتسولف كثير في اللبس
ولا الموضه ومع ذلك تلاقيها تلبس
وفي قمة شياكتها وترتيبها والنور في وجهها بدون هالخلطات والمساحيق ..
وتقولك الله يبلغنا الأثنين ولا الخميس نصومه ونكسب الأجر تدخلين مطبخها تلاقين مسجل فيه شريط قرآن ..
وعلى الثلاجه ورقه صغيره ملصقتها على باب الثلاجه مكتوب فيها بسم الله الرحمن الرحيم عشان تتذكر أسم الله كلما فتحت الثلاجه ..
سبحان الله وإنتِ معاها تحسين براحه نفسيه ..
إذا جيتيها وباقي ماصلت أستأذنتك وراحت تصلي وإذا ماصليتي تقول يالله نصلي سوى ..
لما بتقدم لك شي بتقدم الميسور والموجود أهم شي تكرمك
مو أهم شي عندها وش قدمت أو كم قدمت ..
ولما يجي وقت طلوعك من عندها قبل ماتطلعين تعطيك كتاب كان على
الرف قرأته قبل يومين وأعجبها عن أهوال يوم القيامه مثلا ... وتروحين بيتك وإنتِ غيير سواء مع زوجك
أو عيالك أو شغلك حتى زوجك لو متهاوشه معاه بتحاولين ترضينه لأن الدنيا بتصغر في عينك
لما تجي تقارنينها في بعض الزيارات بعض الحريم هداهم الله تدخلين عندها وتستحين تناظرين فيها
من لبسها يكون مثلا عاري ولا قصير ولا مفتوح من أي ناحيه كأنك زوجها مو جارتها ... ..خخخخخخخ قصدها مابينكم رسميات ..الله المستعان ..
وممكن ماتقصر معاك وأخلاقها طيبه وتتسلين معاها وتنبسطين لكن تروحين وترجعين
والغرض واحد الوناسه والضحك ..
ولا بعضهم مايمديك تقعدين إلا وبدأت تتكلم عن زوجها حتى والمجلس مليان عادي مايهمها
وهاتك سب فيه وأنه فعل وأنه ...تكمل حديثها :.. لكن انا سويت كذا وكذا ورديت عليه ووقفته عند حده
وعودته على الشي الفلاني ومن هالكلام اللي تبي تفهمنا عن طريقه أنها قويه وذات شخصيه..
وتلاقيها مع زوجها عاديه مابينهم شي أو هو مستقوي عليها وتفرغ طاقتها بين الحريم ..
واللي ماتفكر بعقلها وتتأثر بسرعه بمثل هالكلام تلخبط عليها كل المفاهيم ..
وترجع لزوجها وأختنا في الله فارّه دماغها وتروح للضعيف اللي بالبيت
وعسى مايقول شي إلا وتنفجر وتساعدها كلمات الحرمه اللي مازالت تدندن في راسها عن الرجال
أنهم مايمشون إلا بالعين الحمراء .. أي عين حمراء وأي عين زرقاء الله يرحم والديك ..
ونكدت على نفسها وعلى زوجها وهي نفسها ماهي عارفه السبب ويمكن تشيل عفشها وتروح لأهلها عشان
أسباب واهيه ..
او بعض الحريم هداهم الله بس تتذمر من عيشتها وهي بخير ومبسوطه برضه تشتكي يعني تحب تشكي
وإذا نادت على عيالها قالت تعال ياكلب ولا ياحمار أعزكم الله
وإذا خرب عليها شي قامت لعنته أو عشان ماتحس أنها تلعنه
لعنت أبوه أو أمه هههههه هي أمه الله المستعان ..
وإذا باقي ماصلت تركت الصلاه حتى يروحون الضيوف لأنها صعبه تخليهم على قولتها ووقت الصلاه خلاص رااااح ..
أو تناديكم بس عشان تشوفون سفره سوتها ماهي طبيعيه من الجدار للجدارومافيه إلا أربع حريم
مخسره زوجها ومستأذن من الدوام بدري عشان يجيب لها الأغراض
والله أعرف وحده سوت في جمعة حريم 7 انواع حلى والحريم خمسه بس ..
أكيد أرتفع السكر عند الحريم في ذيك الليله ..الله المستعان ..
غير الأنواع الباقيه من معجنات و..وتعدادها ,, بس غرضها تعالو شوفو
أو بعض الحريم يجتمعون بس عشان كل وحده تكشخ بلبسها الجديد
اللي شرته من يومين وماتكتفي بكذا إلا لازم تذكر المحل وسعر أي شي شرته حتى لو ماأحد سألها .!!
والحرمه اللي ماتفكر زين تتأثر بمثل هالأشياء ترجع بيتها وتفكر ليش فلانه لابسه وكاشخه
وش اللي فيها زود عني وتحلف ماتروح الجمعه الثانيه إلا بلبس جديد ..الله المستعان بس ..
ولا السواليف اللي ماتقدم ولاتأخر ..مثل .. شفتي لبس فلانه والله مررره شياكه
اقولك ماأدري وش فيها فلانه نحفانه .. تصدقين ألاحظ اليوم وجهك مررره ذبلان
مالاحظتي زوجة فلان مررره الليله مبسوطه وتضحك من قلب .. هههههههههه والله حااااااله
خلي الآدميه تضحك هو الواحد يسكت قلتو وش فيه وإذا ضحك فتحتو عيونكم !!..
أو تقولك فلانه اليوم وجهها مو طبيعي اكيد بينها وبين زوجها شي ..!!
تطلع فوق راسي علامات تعجب كثييره ..طيب خلي الحرمه بحالها وأحنا وش لنا باللي بينها وبين زوجها ..
من جد من راقب الناس مات هما ..
او تحش في وحده يعني حتى لو ماتبين تغتابين تخليك تغتابين غصب ..
اعوذ بالله من بعض الجمعات تتمنين تقعدين في بيتك مقابله الاربع جدران أفضل لك ..
حتى مافيها ذكر لله وترجعين مثل مانتِ إلا يمكن منقلبه على زوجك او ترجعين على طول المرايه
وتسالين زوجك .. تلاحظ في بشرتي شي ..؟!
وتقولين لازم أهتم في بشرتي اكثر صدقت فلانه صار لي فتره ألاحظ بشرتي مو لهناك ..!!!
.. يعني أشغلتك بشي ماتدرين أساسا هي صادقه فيه ولا لا ..!
أو تقارنين بينك وبين فلانه وتتعبين نفسك وأنت أحسن منها في أشياء كثيير ..أو بين بيتك وبيتها
وتكرهين بعدها بيتك وعيشتك ويمكنك في عيشه ألف وحده تتمناها أولهم هذي اللي رحتي لها
يعني عايشه بقصر لكن عيشتها مع زوجها نكد وملل ..
يعني هالزيارات والجمعات ماتستفيدين منها غير بعد عن الله وإهتمام بالدنيا وإنشغال بشهواتها
ممكن تستفيدين أنك مثلا إذا شكت لك وحده من زوجها أنه مايصلي أو لقت ارقام في جواله
أو رسائل مشكوك فيها ..تحمدين الله أن زوجك مخلص ويخاف الله ويصلي ..
أو إذا شفتي وحده تشكي من حالهم والديون تحمدين الله ان حالكم طيب وميسور ..
او إذا شفتي وحده ناقصة عقل في المجلس كلامها غير منطقي
تضايق الموجودات وعادي عندها
انك تحمدين الله أن ربي أعطاك عقل تفكرين احسن منها ومو شرط تردين عليها
وتنزلين نفسك لها ..
فأكيد الإجتماعات لها تأثير خصوصا من كانت إجتماعاتهم أسبوعيه أو شهريه أو شبه يوميه
ولكن هل تأثيرها سلبي او إيجابي ..
وهل فعلا نطلع بشي مفيد أو بس ضحك وسوالف وشوفي فلانه وو..وو..
هلا فعلا هناك من تجتمعين معاهم وتحسين أنك تقتربين من الله ويقل تفكيرك في الدنيا وتصير عندك الدنيا
ولا شي .,’’
وأكيد كلنا مخطأون ولكن الواحد منا ينظر على نفسه ويحاول يصلح
مابها ...
وإذا مالقينا اللي تأثر فينا التأثير الطيب خليك أنت من تاثرين على
البقيه ولاتكتفي بالخير لنفسك
خليك مثل العبير ينتشر شذاه وين ماتكونين
يمكن تكوني خير دليل لأمرأه تاهت خطاها ...
اعذروني على الاطاله ولكن هذا غيض من فيض مما نواجهه في حياتنا
ولقاءاتنا ..
أسأل الله تعالى أن يجعل اجتماعنا ومحبتنا وتفرقنا فيه وعليه
وأن يرزقنا حبه وحب من يحبه وحب عمل يقربنا إلى حبه
وأن ينفع بنا وبكم وأن يوفقنا إلى عمل يرضيه عنا ...
إن أحسنت فمن الله، وإن أسأت أو أخطأت فمن نفسي والشيطان
وأسأل الله عز وجل أن يرزقنا الإخلاص قولا وعملا
وأن يجعل أعمالنا خالصه لوجهه الكريم .,,
لكم جل إحترامي وتقديري مع فائض حبي .,’’’’’
الله يجزاك خييير والله ان الصحبه الخيره مافي مثلها :)
واوصيكم اخواتي بكفاره المجلس بعد كل جمعه تجتمعونها او حتى بعد مكالمه او محادثه ماسنجر :)
« كَفَّارَةُ المَجْلِسِ »
عَنْ أَبي هُرَيْرَةَ رَضِيَ اللهُ عَنْهُ أَنَّ رَسُولَ اللهِ صَلَّى اللهُ عَلَيْهِ وَسَلَّمَ قَالَ : « مَنْ جَلَسَ مَجْلِساً كَثُرَ فِيهِ لَغَطُهُ ، فَقَالَ قَبْلَ أَنْ يَقُومَ مِنْ مَجْلِسِهِ ذَلِكَ : سُبْحَانَكَ اللَّهُمَّ وَبِحَمْدِكَ ، أَشْهَدُ أَنْ لا إِلهَ إِلَّا أَنْتَ أَسْتَغْفِرُكَ وَأَتْوبُ إِلَيْكَ ، إِلَّا غُفِرَ لَهُ مَا كَانَ في مَجْلِسِهِ ذَلِكَ » .