الصيف كانت ماتجيب شغالات اول ما تبدأ العطلة تمشي الشغاله وهات ياكرف بالعطله غسيل بطانيات غسيل قطايف وموكيت البيت كامل وتنظيف عميق للغرف غسل المطبخ من فوق بالسلالم مسح الجدران الحمامات الله يكرمكم خمسه حمامات كل واحده تتخصص بحمام تغسله من فوق المهم ونشوف من أحسن تنظيف وكل واحده تمسك شباك شباكين ونشوف من الأنظف يعني العطلة تروح بالكرف وهذا جاء لصالحنا
عفكره احب اسوي الشيء بضمير يعني لما اسوي شيء أو امسح أو اغسل شيء اغسله بضمير ما أحب الشغل الي يجي بدون ذمه أو مايكون متقن
لما أتزوجت لشقه شفت شغلها قليل وبسرعة اكملها ومن الاحسن عمل جدول الآن رمضان جاي وبديت أتحمس معاكم في التجمع الي سويتوه ونظفت أشياء بس أن شاء الله يجي رمضان إلا وقد كملت شغلي

رفع

موضوع رائع ❤


تعلمت من امي الكثيييير الله يطول لنا بعمرها على طاعته


تعلمت انه ما انام الا ومشيكه على البيت كله
ابواب .. شبابيك .. انوار .. الثلاجات كمان اشوف اذا فيها شي مكشوف اغطيه وبعدين اكتشفت انها تطبق سنة الحبيب صلى الله عليه وسلم


تعلمت منها النظافة بكل شي
والله كانت ما تنام الا بعد ما تحممنا وتمشط شعورنا
وتطيبنا وتقرأ علينا الفاتحة والاخلاص والمعوذتين لانها بعد عمري كانت ما تحفظ الا هم ..اما الان فلله الحمد تحفظ القران كامل
كمان لازم بيوم الاربعاء على وقتنا كان اخر يوم دراسي .. لازم حناء للشعر ... ودي اسوي مثلها بس بناتي احيانا يرفضون .. فخليتها مرتين بالشهر .


الكيك لاززززم الصباح
اذا ما جهزته من الليل .. جابت جاهز ابو كرتونه امريكانا هههههههه


القهوة من الضحى نشم ريحتها .. وجاراتها دايما عندها
وتجددها العصر مع حلا وغالبا يكون تمر معبوط ..
واللي لاحظت على امي قلييييل تطلع السوق
ولما كبرنا وكلت لنا المهمة ولما كنا نسألها تقول .. اكره الاسواق وجوها ..


كمان تعلمت منها حفظ النعمة .. خصوصا الخبز
تيبسه داخل سلة بالحوش وتجمعه كل اربع ايام وترسله لجيرانها اللي عندهم اغنام
بواقي اللحم والدجاج ما ترميه مع الزبالة تكرمون
تحطه بكرتونة صغيرة وتوصينا نخليه بجنب شجرة او بجنب سطل الزبالة العام .. وفعلا دايم نشوف القطاوة تاكل منه .. الرز تشفه على سفرة بالسطح للحمام والعصافير .. وكنا ننظف وراهم كل اسبوع السطح وحنا مطنقرين ههههههههههه..
كما تحط لهم موية بنفس علب اللبنة والزبادي




الزبدة تعلمت منها انها تستفيد من كل شي قبل ترميه


والاهم انها تحاول قد ما تقدر ما ينتهي يومها الا وهي مسويه اعمال خير تعود عليها بالاجر والثواب ..




ربي يطول بعمر أمي وامهاتكن وجميع المسلمين ❤

موضوع جميل ربي يسعدك …

تعلمت من امي الله يرحمها ووسع منازلها الفردوس الطبخ فصرت على شهادة الكل طباخة ولي نكهاتي الخاصة .

تعلمت من امي التنظيم والترتيب وعمل جدول لي ولخواتي كل يوم شغلة كل وحدة بالدور

تعلمت من أمي الصبر والحكمة ومااشيل بخاطري ع احد

تعلمت من امي الرزانة والهدوء رغم انها الله يرحمها امية الا انها لها طابع في التعامل

تعلمت من امي ماارمي النعمة وخاصة العظامة للقطط ارميها لهم

تعلمت من امي اسقي العمالة اللي بيشتغلون في عز الشمس

الله يرحمك ياأمي الكل كان يحسدني عليها ربي يغفر لها ووسع منازلها الجنة ويجمعني فيها بالفردوس الاعلى آمين

علمتني ٱمي ..

علمتنا كيف نكوون انا واخواتي واخواني نكوون على قلب واحد لو مرض واحد فينا كلنا نحس فيه وننتبه عليه..

علمتنا يدينها مع بايدينا في كل شي تطبخ انا واخواتي قبلها بالمطبخ من بدايه الطبخه لحد مانحطها على السفره ..

علمتنا الاقتصاد كل شهر ابوي يعطيها مصروف البيت وتسلمه بيد وحده منا وتقول المسؤوليه عليك يلا روحي قضي للبيت وانتي المحاسبه على كل شي. ..

علمتنا نعتمد على انفسنا بكل شي كانت تروح عند جدي وجدتي وتخلينا بالبيت لوحدنا مع ابوي وتقولنا البيت وابوكم واخوانكم مسؤوليتكم طبعاً متفقه مع ابوي على كل شي ..

علمتنا حسن ضيافتنا للضيوف والله ابوي مايجيب اكل من برا ابداً يجب لنا الطلبات واحنا نطبخ لضيوفنا كل شي الضيافه والعشاء والعصيرات والمقبلات وكل حاجه ..

علمتنا ايام الاسبوع كل يوم لواحد ووحده من اخواتي في غسيل ملابسه وتنشيفها وكي الي يحتاج كي وتسفيطها بـ الدولاب ..

علمتنا الصبر والاحتساب والمحافظه على صلواتنا والقرآن الفجر بحلقه البيت واذكار النووم لازم تجمعنا عندها بغرفتها للحين ونقووول الاذكار ونسلم على راسها ونطلع ننام كل واحد بغرفته ..

علمتنا انه مافي شي بالدنيا يستاهل ان احنا نحزن علشانه بالعكس تزرع الامل بقلوبنا وان بكرة اجمل بفضل من الله ..

وعلمتنا الووووتر والمحافظه عليه كلنا ولله الحمد اخواني ترش عليهم المويه عشان يقومون يوترون..

علمتنا نتصدق بالسر ولا نعلم احد وتشجعنا للتبرعات وتحفزنا بالدعاء ..

والله والله ي بنات ما يطلع احد من اخواني او اخواتي او ابوي الا وتستودعهم الله وتمر علينا بغرفنا تشوف احنا متغطين عن البرد ولالا ..

امي عظيمه لا حرمناا وجودها بينا


** موضوع رائع جداً ضوضو الله يعطيك العافية حبيبتي .. الله يحفظ لنا امهاتنا ويرزقهم الجنه ويرزقنا برهم يارب العالمين