السلام عليكم اخواتي

اشونكم اخباركم عساكم بخير..اشكد اني اشتاقيتلكم هواية وجدا وكثيغ >>>هذه بالمصلاوي
وقبل كل شي اشكر غاليتي اغلى وطن على تفقدها لي وعلى غيابي واني شرحتلها الوضع والحمدلله احنا بخير وكان النت عاطل عندنا بالإضافة لأشغال وامور اخرى
اليوم حظينا بالكسوف الجزئي للشمس والحمدلله لتوي راجعة من الدائرة وبسرعة اكلت وصليت صلاة الكسوف ودعيت استغليتها فرصة والف الحمدلله
اول البارحة كنت مشغولة اشكو ملابس الشتا الأصواف الثقيلة والقديفة وغيرها مالتي كلها من حرارة الجو شلتها وظميتها بالجنطة وطلعت بدالها الصيفي واني دق شغل وحتى مالت ابو شهد والمهم خليت كم حاجة خفيفة واشو البارحة شوية بردت وغيمت ومطر واضطريت مكرهة انه ارجع واطلع لي بلوزة قطنية مو علمود شي لأن عازمتني بنت خالتي بالكلية مالتهم جماعتها مشتركين ومسوين غدا شوي على اساس كباب وبعد الحاح منها ان اجي واني شوية ظروفي ماكانت تسمح المهم رحت واني جنت جوعانة بصراحة بس ماكلة تفاحة وطبعا شنو المكان روووووووعة الخضار ومكان اللي كعدنا بيها على تلة ماكو هيج جمال وتشوفون الطلاب والأساتذة همين مسوين سفرات داخل الجامعة الموصل ..مو احنا محرومين سفرات الله ينتقم منهم اللي حرمونا من الطلعات
المهم اني جيت متأخرة لأن بنت خالتي جت علي بسيارة الأشتراك مالتهم ولما وصلنا شفناهم مخلصين بس مبقين حصتنا واجي اشوف شنو يطلع تكة لحم واني ابدا ابدا ابدا ما احبها وما اقدر اكلها :D وبالقوة اكلت فد شيش ما ادري اشلون اكلته والحاصل رجعت للبيت والكل ها اشلونها سفرتكم هي حلوة بس اني بقيت جوعانة والكل ماما اكلي لا مواني شبعانة ماكلة تفاحة وشلون النزاكة نزلت علي وكان هذا اطرف موقف امس مريت بيه
المهم يكون ما طولتها عليكم
حبيبتي الله يسهل على كل وحدة حامل ويقومها بالسلامة..وسلامي للجميع للجديدات والقديمات وباذن الله ارجعلكم بعدين

ام حيدوري ..
انت على الخط شلونج عيني شلون صرتي بشريني ...؟؟؟

السلام عليكم ورحمة الله وبركاته
سلام لكل الحلوات
صحيح اني ما اكتب وياكم لان من الهم صاير دمي ثقيل ومزعجه بس اجاني اليوم هذا الايميل المضحك المبكي احبيت احطه الكم

وسامحونا على التقصير ( اختكم ام عمر )

السلام عليكم



هذه نصائح وإرشادات للسُواح القادمين إلى العراق لغرض السياحة والترفيه أقدمها مجاناً إلى زُوار أرض الرافدين ومهد الحضارات ( العراق الجريح )



عزيزي السائح

ما إن تُقرر زيارة العراق ، ما عليك إلا إتباع الإرشادات التالية والتي تجعل إقامتك هنا مريحة وجميلة وهي كلآتي

أولا: لا تحاول السفر بالطائرة لأسباب عديدة منها اننا نخاف ( علي جيبك ) لأن كلفة السفر غالية جداً ومنها أيضا ان منطقة المطار قد تحوي إشعاعات ذرية قديمة أو مواد مسرطنة من الأسلحة التي تم إستعمالها أثناء الحرب ..ومنها أنك قد تتعرض لإطلاق صواريخ مضادة للطائرات ( وتروح بالباي باي) لو فد عبوة ناسفة على طريق المطار وهم تروح ( بالباي باي )

ثانيا: في حالة قدومك بالسيارة خذ معك ( يطخ ومخدة وبطانية ) لأن راح تنتظر دورك في الدخول للأراضي العراقية وربما يستمر إنتظارك فد يوم أو يومين ( إنت وحظك ) وأثناء الإنتظار لازم تنام ..ولازم تنام رغد همين

ثالثاً: بعد أن دخلت بسلام وأمان إلى الحدود العراقية وفي طريقك الآن إلى بغداد..(ضُم ) فلوسك ودولاراتك بفد زوية بالسيارة لو جوة لسانك لو باي مكان لحين عبور ( منطقة السلابة ) لأن إذا سلبوك..ترة توصل لبغداد ( إيد من ورة وإيد من كدام )

رابعا: معظلة دخول بغداد..قد تنتظر فد ساعة لو ساعتين ومرات أكثر ..والسبب ..لو عبوة لو رتل امريكي لو حرس وطني لو تفتيش...وهنا تظهر فائدة ( اليطغ ) مرة اُخرى ...علمود تاخذلك فد ( غفّة ) ساعتين علما ينفتح الطريق

خامسا: وصلت بغداد..حمد لله على السلامة..دير بالك تروح لشيراتون لو لمريديان لو لميليا لو للرشيد...ترة كلها مستهدفة..شوفلك فد فندق عتيك بالبتاوين لو بالميدان اشرفلك

سادسا: أول ليلة إشرب فاليوم 20 علمود تنام ومتسمع أصوات الطيارات لو الطلقات لو الإنفجارات يلي إنت اكيد ممتعود تسمعها وHappy Dream مقدماً

سابعاً: من الصبح ..أكيد تريد تتريك...لا تتريك..ترة وقت الذروة للمفخخات الصبح..وبالأخص باب الشرقي والكرادة فلا تطلع لا منا ولا منا وإتحمل جوع أستر إلك

ثامنا: جا وكت الغدا..أكيد ميت جوع..لو عليّ أكلك هم للتغدة ..بس إنت خطية..إطلع روح إتغده..بس إتجنب المكانات المشهورة..كباب قاسم بالأعظمية ..الساعة بالمنصور ..مدري شسمه يلي بمدري وين ..قصر بجمع..كل المكانات ترة مستهدفة..إقضيها ( صنبة وعمون ) ( أقصد عنبة وصمون ) لو فلافل على السريع وإرجع للفندق

تاسعاً: أخاف عبالك إنت بسويسرا لو بباريس وتريد تسهر ( بالشانزليزه) تالي الليل ...تره إحنا هنا حريصين على صحتك والمثل يكول ( نم مبكرا تستيقض مبكرا ) لذلك حكومتنا الرشيدة آثرت أن تمنع التجوال من الساعة 8 ليلا علمود ترجع تنام من وكت

عاشرا: هسة جا الليل كرّز حب وإن تتفرج على ( العراقية ) وإشبع قهر وإنغث مثل ما إحنا شابعين قهر ومغثوثين منها وإذا ما عجبتك أكو الديار والفرات ووو..ووو.. ووو و( فرجة ممتعة )

حادي عشر: ثاني يوم إنت صرت سبع ومتخاف وتريد تتمشة ببغداد..أهم شي ..أهم شي ..أن تشيل هويتك..ترة والله إذا لزموك الحرس الوطني مشايل هويتك..ينسوك الحليب يلي رضعته ويرفهوك آخر ترفيه ونصيحة أخرى..لا تمشي يم الرصيف ..ترة كل الأرصفة عبوات ناسفة..وإذا شفت فد كيس مال زبل لو كاتونة وية الزبالة ..( أكلب ) قبل ما تنفجر بيك

ثاني عشر: قررت تستأجر سيارة لأن تعبت من الكيات لو من المشي...قرار صائب وحكيم ..بس لازم أولا.. متطلع روحك من الإزدحامات لو من الجسور المغلقة..هاي وحدة..وأكو فد سيارات مكتوب عليها حرس وطني وبيها ناس لابسين اقنعة ومناظر سودة ( إتخبل ) وأكيد يعلجون علج ويدخنون هذولة ( حماة الوطن )..مو عبالك إنت بلندن وتجي تقترب منهم لو تتجاوزهم ..ترة الجماعة ينطوك درس عملي عنوانه..( ماهو المنخل البشري )

ثالث عشر: إذا كان حظك عاثر جداً وإنفجرت سياة مفخخة لو كدامك لو وراك...هاي يلي الله كتبها عليك...تنهزم ...يكولون هذا إرهابي ..تبقى ..هم يكولون هذا إرهابي ..لذلك إجرح نفسك..وطلع الدم من راسك من رجلك من إيدك من اي مكان..وخلي يشيلوك للمستشفى أحسن إلك

رابع عشر: رجعت للفندق مالتك..وما أدري إذا بعد مقرر تبقى وتزور باقي مناطق بغداد وتزور المعالم الحضارية والأثرية وتتجول بالمحافظات يم الثرثار لو بالحبانية لو بالملوية.. لذلك راح أتوقف عن نصائحي إلك ..لحين ما تقرر بقاءك من عدمه وبعدها أكمّل نصائحي لك





كلامٌ كتبته البارحة بعد متصف الليل وأنا أسمع أصوات المدفعية والطائرات التي لم تنقطع على بغداد العزيزة بكل مناطقها ...زائحاً عني بعض ما يئن به كاهلي من هموم أثقلتني وأثقلت كل من يعيش معي في العراق ويحمل هم العراق....كلامٌ هو أصح ما يُقال عنه ( المُضحك المُبكي ) ...كلامٌ أحببت ان اٌشارك به أحبائي وأعزائي جميعاً

ولا أختم كلامي هذا إلا بدعاءٍ أرفعه مع نفسي لرب العالمين



حسبنا الله ونعم الوكيل

حسبنا الله ونعم الوكيل

حسبنا الله ونعم الوكيل

:27: أم شهد
ياهله بيج....وأكيد هسه الموصل تتجنن بالخضار شقائق النعمان وخصوصاً الجامعة التلة مال نادي الجامعة........... ذكرتيني بسفرة التخرج مالتنه الله يجازيج كل الخير سوينه هجوم على كلية الطب البيطري مال الموصل :30: :30: والولد جانوا جايبين جراقيات ودخلنا على المختبرات وجان عدهم محاضرات واحنه طبينه عليهم بهوستنه :icon28: :icon28: وماتشوفين إلا شوية ويجي معاون العميد والشلة مالته ويتحلفولنه :16: (إله نشتكي يم رئاسة جامعة بغداد ......وتخيلي منظر طلاب جامعة بغداد ماتلكين بس العجاج ورانه:D )

هسه خلي أشوف بان أم مريومة تتذكر هذا الحدث(تره أغلى وطن جانت ضمن الشلة المخربة:27: )

عيوشة
هله بيج بيناتنه......... مانكول غير حسبي الله ونعم الوكيل على اللي دمر العراق وان شاء الله يحفظ العراق وأهله وعلى عناد اللي يكرهوه إن شاء الله يرجع مثل أول وأحسن أمين يارب.