اللهم اغثنا غيثاً هنيئاً مريئأ طيباً مباركاً حولينا ولا علينا
اللهم ارحم اموات اخواننا واخواتنا في جده واقبلهم عندك شهداء يارب العالمين واجعل اطفالهم شفعاء يا حي يا قيوم... وفرج عنهم وعن كل مسلم يارب
واغفر لجميع المسلمين والمسلمات انسهم وجنهم الأحياء منهم والاموات
******************
السلام عليكم ورحمة الله وبركاته
كيف حالكم جميعا
اتمنى الكل يكون سعيييييييييد
...
موضوعي خفيف على النفس وسهل ان شاء الله ,,
وان شاء الله يغير حالكم بعد الله من حالة تعاسه وكآبه الى سعاده
بذكر لكم بعض الاشياء اللي غيرت حالي من تعاسه الى سعاده ان شاء الله و الحمد لله
...
والله الاشياء كلها سهله وما تحتاج من الواحد يغصب نفسه عليها
...
وش النقاط اللي اتبعها علشان فعلا احس اني سعيده !
طبعا بغض النظر عن الاشياء الأساسيه :
الاستغفار
الصلاة
قراءة القرآن
هذي ما ني متطرقه لها لان اكيد كلكم عارفينها
بس بذكر الاشياء اللي كثار ما ينتبهون لها
****
اولاً,,
صفي قلبك ,,لا تكنين حقد على احد ابداً,,, سواء ظلمك والا ما ظلمك
فلنفرض احد ظلمك ,, اسألي نفسي سؤال وردي بكل صراحه
ظلمني ,, حقدت عليه ,, دعيت عليه ,,
انا وش استفدت الحين ؟؟؟
صدقيني ولا شي
دعيتي على الظالم والله استجاب لك وعطاك اياها بالدنيا و عاقبه هو
انتي وش استفدتي !!
ولا شي
ارتحتي نفسيا !!
طيب ليه ما نبدل بدال ما ندعي عليه
ندعي لأنفسنا بأن الله يفرجها عنا !!
واكتفي بقول : اللهم اكفني شره وحسبي الله ونعم الوكيل
قال تعالي :
(فمن عفى وأصلح فأجره على الله)
*منها نستغل الوقت في شي لنا
*منها نكسب اجر العفو
*منها نرتاح نفسيا لأننا معد نفكر فيه ونشيله من بالنا ,,
...
ثانيآ,,,
احتساب الاجر
اي شي تسوينه في حياتك احتسبي الاجر عليه
وهذي كتبت عنها موضوع مستقل قبل
ممكن تستفيدون منه لو حابين
http://forum.hawaaworld.com/showthread.php?t=1881921
...
ثالثاً,,,
اتباع السنه
حاولي بقدر استطاعتك تتبعين السنه
ما ابي اذكر الأشياء المعروفه ...مثل سنن الصلاة والصيام
لا طبعا هذي ان شاء الله الكل يتبعها وما تحتاج احد يقولها ان شاء الله
ولكن
جربتو تتبعون السنه في
الشرب .. الاكل .. اللبس .. النوم .. الصعود والنزول دخول الخلاء... واشياء كثار بسيطه لا تعد ولا تحصى
يعني بتشربين مويه اجلسي وانتي تشربين واشربي على ثلاث مرات ولا تتنفسين في الماء
واحتسبي أجر انك تتبعين السنه
وكل شي بالحياة رسولنا الكريم عليه الصلاة والسلام دلنا على سنته الحمد لله << والله الاشياء سهله بس يبي لنا نتعود عليها
لان زيها زي اي شي
مثلا لو كنتي ما تحبين تنامين الا متغطيه..
جربي تتبعين سنه
لو شربتي مويه مثلا واتبعتي فيها السنه
صدقيني معد تقدرين تشربين مويه الا بهالطريقه
وطبعا لا تطبين في يوم واحد تتبيعين جميع السنن :35: شوي شوي بتلقين نفسك حابه الشي وما تتركينه
...
رابعاً,,,
اكيد كلكم تدعون ربكم في اشياء كثيره
وتتصدقون دايم
بس وانتي تدعين او تتصدقين هل اشركتي المسلمين عامه معك !!
جربي وانتي تدعين لهم حتى لو في اشد ازمتك
لا تقولين وانا الحين فاضيه في هالحاله اذكر الناس
لا اذكري
بما ان الدعوه وحده
اللهم فرج عني وعن كل مسلم
وانتي تتصدقين انوي انها عنك وعن والديك واخوانك و زوجك وعيالك وناس اغتبتيهم... وناس ناسيتهم
وحده مريضه في عالم حواء
جاركم اللي في أزمه
وكل المسلمين عامه
وترى الصدقه مب متقسمه عليهم الاجر واحد ان شاء الله سواء نويتيها لك والا لكل المسلمين:)
بكذا انتي تؤجرين ولعل الله يتقبل منك ان شاء ويفرج همك وهم ناس كثار
ملاحظه: عارفه فيه كثار وانا كنت منكم
اقول في نفسي احس الدعاء اذا صار لي بلحالي يكون اقوى
طبعا هذي خرافه
يعني وش المانع اذا زدت على دعوتي
والمسمين اجمعين
تخيلي عن كل مسلم ترد لك الدعوه وتقول الملائكه ولك بالمثل
الحمد لله
...
خامساً,,,
الوضوء
خلك على طهاره دائماً
ولا تستصعبونها
والله انها سهله وتحسين اصلا وانتي تدعي تكونين مرتاحه نفسياً لانك على طاهره دايم
وغير كذا اتبعتي سنه"ولا تنسين احتساب الاجر "
هذا غير الانتعاش :)
وانك تنامين على وضوء
لا تقولين برد والا اخاف مكياجي يخرب والا شعري يكش :35: ترى عادي ما يكش وان كش في سبيل السعاده فجعله يكش ويصير شجره :42:
على فكره :
انا كان وضوئي ينتقض دااااااااايم
بس يوم صرت على طهاره دائم والله اني اجلس اغلب اليوم ما انتقض وضوئي الحمد لله
...
سادساً ,,,
وهي اهم نقطه
التفاؤل التفاؤل التفاؤل
قال الله تعالي في حديثه القدسي :
{انا عند ظن عبدي بي فليظن بي ما يشاء}
والله التفاؤل احسن شي بالحياة
انتي عندك هموم مشاكل وتعيشين تعاسه
تذكرين شيين
الاول انك مأجوره ان شاء الله
قال رسول الله صلى الله عليه وسلم:
( ما يصيب المؤمن من وصب ولا نصب ولا سقم ولا حزن حتى الهم يهمه ؛ إلا كفر به من سيئاته )
والله هذا بلحاله حتى لو حياتنا ما زانت يكفي
تخيلي انتي تجمعين اجر للآخره وانتي ما سويتي شي
يعني الشيء هذا جاك بأرادة الله
مو شي لازم تسوينه وتاخذين اجره
وانتي ما عليك الا الصبر بس
طيب الشي الثاني غير الاجر !!
(لو قدر للخلائق ان ترى مقاديرها لإختارات الذي إختاره الله لها)
معقول على كل الهم لو قدر لي اختار لاخترت اللي اختاره ربي لي !
يعني اللي مختاره ربي لي هو الافضل و لو اخترت انا قدري كان بعيش بأسوأ من هالحال
ياربي لك الحمد كما يليق لجلال وجهك وعظيم سلطانك
بتقولون كيف اتفائل وانا كل عمري مشاكل
طيب بصراحه هل احسنتي الظن بالله !!
والا تتحلطمين دايم؟؟
ياربي ليش حظي كذا !!
ياربي انا كل عمري تعيسه !!
ياربي انا من هم لهم !!
كل هالكلمات واللي مثلها ترد عليك انتي عكسيا لانك ما احسنتي الظن ..
ولا تقولين انا احسنت الظن
لان اللي يقول انا احسن الظن ويتحلطم ويشكي معناته ما احسن الظن ابداً ...
طيب ليه ما نبدلها
ياربي لك الحمد والشكر وان شاء اني بعد سنه من الآن حالي بتكون سعيده:)
ياربي لك الحمد والشكر انك اخترتني من بين هالناس وابتليتني يارب صبرني وعوضني :)
قال رسول الله صلى الله عليه وسلم :
(إذا أحب الله قوماً ابتلاهم)
اي وحده مهمومه
لا تفكرين في بكره والا اسبوع والا شهر قدام
وش المانع اذا كانت الدعوه تفكير
فكري لسنه قدام لسنتين لعشر سنين
افرحي
وارسمي حياة حلوه لنفسك وحولك عيالك وانتي مبسوطه
_____________________
معلومه:
انا كنت لمده طويله اعاني ... وربي ابتلاني في اشياء والحمد لله على ما اصابني ... ولكن بعد هالاشياء الحمد لله تغيرت حياتي
وحتى لو لم يطرأ عليها تغييرات كثيره ولكن والله اني احس بالسعاده وهذا من فضل ربي
وحتى احلامي والله كلها صارت بعد الكوابيس,, سعيده واتفائل فيها وفعلا اذا فسرتها عند معبر قالو لو انها دلالة خير بإذن الله"دعواتكم لي انها تتحقق":35:
الله لا يغير علي ويرزق كل مسلم سعادة الدارين
وبس
ان شاء الله موضوعي يعجبكم ,, واي اضافه للموضوع اتشرف
** ان اصبت فمن الله وان اخطأت فمني ومن الشيطان **
دعواتكم لي ولوالدي ولابني واخوتي وازواجهم وصديقاتي وكل مسلم :)
ويسعدنا جميعا
موضوع حلو
الله يصلحنا و نتبع السنة