اختي الغالية برقعي لا تزعلين ولا شي يا الغاليه ترا مافي شي يستاهل اننا نزعل عليه. وخلي قلبك وسيع وكبير, واعطي اعدار للناس حتى لو انك متاكده انوا مافي عدر لهم بس اخلقي لهم عدر لانه القلب الطيب يلي بيسامح هدا نعمه من عند رب العالمين. وماتدري يالغاليه يمكن تعبت في خلال حملها يمكن خايفة على مشاعرك يمكن يمكن يمكن اخلقي لها اعدار ووكلي امرك لله وحده. وفديتك يالغاليه وسعي صدرك وانسي الزعل يازن الرضا حتى لو كان قليل.

السلام عليكم و رحمة الله و تعالى وبركاته

هلا حبيبتي و الله اني حاسه بشعورج حبوبه, لاني مريت بمواقف اكثر من جدي, فلا اتزعلين عمرج و لا اتحطي في خطرج شيء حبوبه الله هو الرزاق و الله ال بيده كل شيء

حبوبه انا من اعز صديقاتي سوت مثل ها الشيء, و كذبت علي و خففت الاتصال ما بينا و لين ما بدت اتحس فيني اني شكيت فيها بعدين خبرتني , صح جرحتني كثير لانها كذبت علي وايد و هي تعرف اني من قبل مريت بنفس الموقف و خبرتها و صدق انصدمت و مع ذلك عذرتها و ما حطيت في راسي شيء, بس اتغيرت وايد و انا سبحان الله ربي دار سبب و انقطعت الاتصالات ما بينا

و مع ذلك ابغي اسويلها تلفون و اطمن عليها بس يجيني ها الموقف بين عيني و اقطع الاتصال, و الحمد لله دوم ادعيلها و ادعي للجميع

الحمد لله انا ما اضايقني ها الاشياء لاني مؤمننه بقضاء الله و قدره و كل شيء في وقته

ماعليه حبيبتي والله حاسه فيج يالغالية..

إلتمسي لها العذر .. يمكن ماحبت تجرح شعورك يوم عرفت انها حامل وانتي بعدج..

ثانياً أنا مريت بهالموقف من وحدة لمن حملت كنت تعبانه كثير من اللوعة و الوحام الشديد يعني طول ثلاث أشهر وأنا حتى لو كنت قاعدة ألاحظ نفسي أنام من غير حاسية هذا من غير الدوام يومياً من الصبح الساعة سبع للساعة ثلاث العصر مرات من التعب كنت أروح الاستراحة بالدوام للبريك ساعة والله بس علشان أنام من التعب..

هذا من غير ان الحمل عندي كان حرج جداً لدرجة إني تنومت بالمستشفى لمدة شهر لمتابعة الحمل وتطوره هذا من غير الإجهاضات الأربعة السابقة وزوجي حلفني مااأخبر حد بحملي أو اني مرقدة بالمستشفى علشان مايبي يشوف أحد لأن حالته ونفسيته كانت تعبانه من الخوف على البيبي فوعدته وقلت ماراح أخبر أحد بحملي إلا لمن ربي يمن علية بثبات الحمل لأن كل مرة أحمل وأبشرهم ومايثبت الحمل وأجهض فتعبت نفسياً وقررت إني ما أعلم أحد وأبشرهم إلا والفرحة فرحتين ..

فرحة الحمل ..
وفرحة ثباته ..

وتخيلي خسرت صديقة بسبب انها تفكر اني كنت أخاف من حسدها بس والله العالم إني ما ماكنت خايفة إلا من رب العالمين ودايم أقول في خاطري "اللي رزقني بإذنه بيرزقها..واللي حرمها بإمكانه يحرمني لذلك كنت دايم أحاول أتفهم حالتها لأني مريت بمرحلة الحرمان وأنا متفهمة وضعها أكثر من أي وحدة"بس قلت"إقضوا حوائجكم بالكتمان" لحد ماربي يفرجها وللعلم أنا خبرتها بحملي وكنت حامل بشهر ونص يعني كنت مب ضامنة ثبات حملي والمعروف الوحدة ماتعرف بحملها إلا وهي بالشهر الثاني هذا لو خشيت عليها ست شهور مدري وش بتقول..

وتخيلي قعدت تتبلى علية إني شفت نفسي عليها من حملت والحمل غيرني وصرت أتهرب منها ..

والله لليوم وأنا أجلس بروحي وأقرأ مسجاتها الجارحة وأتحسف على إني الوقت اللي ضيعته معاها وعلى المشاكل اللي صارت بيني وبين زوجي بسببها ولأني فضلتها على الكل وخبرتها قبل لا أخبر أمي وأهلي..

أمي اللي هي أقرب الناس لي ما خبرتها إلا وأنا بالشهر الثالث لأنها هي اللي وصتني ما أخبرها بحملي إلا بعد ما أكمل ثلاث أشهر يعني بعد ما يثبت حملي ووصتني اني ماأفرح بالحمل لين ما أتطمن ان كل شيء ماشي تمام ..

بس قلت المسامح كريم ولكن مقدر أستمر مع وحدة ماتقدر تفهمني وبكل مرة تجرحني وتتهمني بالتهرب والتغير بسسب حملي وليش أتغير هذا مب أول حمل لي لله الحمد أنا حملت قبله اربع مرات بس ربي ماكتب لهم الثبات والله ما أنسى اني قبل لا أحمل كنت أطلع من الدوام تعبانه وفيني نعاس بس علشانها أروح لها بيتها آخذها ونطلع نتغدى بمطعم سوى ونروح السوق لأن هي ما عندها حد يوصلها غير زوجها ومرات زوجها ينشغل وتطلب مني أوصلها وللعلم مسافة بيتها ساعة عن بيتي هذا من غير زحمة الشارع "طبعا اللي زاير دبي يعرف زحمة الشوارع فيها"
ومع هالشيء كنت أرجعها وأحصل هزاب من زوجي بسببها لأني كل مرة نطلع سوى كنت أمر عليها وماأوصلها بيتها إلا وهي شارية اللي محتاجته ويكون الوقت متأخر بالليل بس مع كل هالشيء ماقدرت متاعبي وتضحياتي إني ارجع تعبانه من دوامي هذا من غير اني اترك زوجي بروحه بالبيت واطلع وياها وأنا مب من عادتي أطلع مع رفيجاتي وأخلي زوجي بروجه بس لأني كنت أعزها وفهمت زوجي انها ماعندها حد يوصلها واتفهم الوضع..

ولمن حملت زوجي أخذ مني السيارة ومنعني أسوق للحين أنا ما أسوق بس هي تفكر اني مابي أمر عليها للأسف حسستني باحساس بايخ جداً كأنني جاهلة وما أعرف شو يدور براسها يعني بتمرين علية وبتكليمني انتي صديقتي ومابتمرين علية ومابتكلميني كل يوم إنتي تتهربين وتبين تقطعيني أو بالأحرى "انتي خايفة على حملج من عيوني" حبوبه لو كنت ابي أقطعها كان قطعتها قبل لا تعرف اني حامل وماكان في داعي اني اخبرها بحملي بس الله العالم بالحال وش قد أذت مشاعري بكلامها ..

والمصيبة اني إنقطعت عنها أسبوع..أسبوع ها مب ست أشهر وقعدت تحاسبني كأني قاطعتها سنة مب اسبوع..
رغم ان صديقتج قطعتج ست أشهر وانتي عذرتيها وهذا إن دل يدل على حبج لها ومراعاتج لخصوصياتها وتقديرج لظروفها وانشغالها بحياتها الزوجية.

والله تمنيت ان اللي كانت بيوم مب صديقتي وبس بل كانت في قلبي مثل اختي انها راعتني شرات ما انتي راعيتي صديقتج بل للأسف الصداقة هالأيام نادرة جداً ومب كل من قال أنا صديقك يصدق بالصداقة..

بس ما أقول غير الله يسامحها المفترض أنها توقف وياي وأنا بأشد الحاجة لصديقة بس الحمدلله ربي عوضني بأحسن منها لله الحمد والمنة ..

والسموحة حبيبتي طولت كثير بس كانت فيني غصة وضيجة ونفسي أفضفض اللي بخاطري وما كنت أقدر أقول لأي حد والحين أحس اني ارتحت شوي..

أنا بصراحة مدري وش في قلب رفيجتج بس كتبت لج موقف صارلي عل وعسى تلتمسين وتحصلين لها فيه عذر..

وحبيبتي إدعي ربج واقطعي رجائج من الناس..

واللي رزقها قادر يرزقج بس إصبري واحتسبي ولاتضيعين اجرك .. واتركي الخلق وتصرفاتهم للمطلع على أسرارهم..

أسألك اللهم بأن ترزق أختي برقعي نمبر ون بالذرية الصالحة عاجلاً غير آجلاً وارزق معها جميع المحرومات بالذرية الصالحة اللهم آمين ..

وحبوبة أنا بعد شهرين راح أولد بإذن الله والله ماراح أنساج من الدعاء بس ادعيلي ربي يسهل علية ولادتي ويرزقني بطفل سليم معافى كامل الخلقة والخلق ..

وتقبلي تحياتي "أختج أم محمد"

للرفع

الله يرزقك الذريه الصالحه