أهلي وإثباتاتي

السلام عليكم،كيفكم ان شاءالله.
بقولكم على قصتي وان شاءالله تساعدوني وتعطوني حلول كيف اتصرف ف مشكلتي..
"اول شي بقول لكم عن الاسئله اللي بتسألوني هيَ، اكيد هيَ مو امك مرت ابوك، يمكن انتي مو شرعيه عشان كذا ما كتبوك بأسمهم واستغنوا عنك،ليش انتي بالذات مو اخواتك.
بقولكم كل شي انا متربيه عند ناس غير امي وابويَ واللي ربتني تصير بنت خالة ابويَ واخذتني منهم وانا عمري ٣ شهور عشان تربيني عندها بحكم انها بعمر ٤٠ سنه وماتبغى تتزوج ووحيده بين ولدين وامها متوفيه ف اتفقت مع امي انها تاخذني وتربيني وتنسبني لأسم اخوها واصير بنت اخوها وطلبت من امي انها تنفيني من كرت العائله ومن اسم ابويَ للأبد، وطبعا بذاك الوقت قبل ٢٠ سنه او اقل اللي ربتني اتفقت مع اخوها وكان مطلق وقتها وعنده بنت وافق يكتبتي بأسمها مقابل مبلغ مااعرف كم وللاسف يوم ورى الثاني وهو يقول ابد قدمت بالاحوال وباقي يطلع اسمها وخلاص يصيرلها اثباتات واتزوج واتغيرت معاملته مع اخته ولا كتبني بأسمه وصار يتهرب كل يوم كبرت مع الوقت وماكنت اعرف الحكايه هاذي لين وصلت صف ٦ صارت المدرسه تطلبني اثبات وكرت عائله والمدرسه اللي كنت ادرس فيها كانت خيريه بمبلغ بسيط ووقتها ماكانو يطلبون اثباتات كثير نفس وقتنا هاذا وكنت ارجع واقول للي ربتني ترا يبون اثبات وتقول ماعليك طنشيهم وانا بكلم المديره واعطيها بعدين واقول طيب والمديره كامت صحبة اللي ربتني من زمان يعني خابزه الموضوع المهم درست لين ٣ متوسط وكنت بنقل ثنوي ومدرسه حكوميه وكل مااروح اقدم يرفضوني ويقولون انتي جايه من خيريه مو حكوميه مانقبلك لازم تعدلين اوراقك ورجعت البيت وعلمتها بكل شي قالت خلاص بكلم اخويَ اليوم يروح يسويهم عشان تقدري وكان نفسي اسالها انتي ليش سويتي كذا وكيف سمحت لك نفسك وامي!!!
المهم كنت استنى كل يوم وكان يجي يكذب كالعاده ويقول قدمت وصرفوني وهيَ تمشيه وتقول خلاص مو مشكله وترجع تقولي اصلا مو لازم تكملين ثنوي!!! والحين لي سنتين وبداية السنه الجديده بكمل ثلاث سنين وانا ماادرس ولا اقدر اشتغل ولااروح معهد وصلت حدي وعصبت رحت اسالها ليش سويتي كذا ولين متى انا بظل على هالحال قامت تقول كلام غريب وانا ماكنت ادري اخوي بيخون فيني ويسوي كذا وامك وافقت عشانها اجنبيه مو سعوديه وكانت تبغى لك حياة افضل وذاك الوقت ماكانت تقدر تضيفك باسمها وعشان عندها ٣ بنات غيرك قالت عادي قلتلها خلاص انا معاد ابغى انضاف لا لك ولا لأسم اخوك ورجعيني عند امي وانا من ورى قلبي اقول هالكلام ابويَ يحشش واخواني هناك يمكن ٨ والعيشه عندهم صعبه مرا وامي مرا متحكمه باخواتي مو مخليتهم بحالهم وابويَ خاتم ب اصبعها!
كنت اضغط عليها عشان ترجعني وتضيفني ف قلت اضغط عليها واقول ترا بروح اشتكي والله واجيب لك مشكله لا اللي درست ولا عندي اثبات ولا حتى مستشفى اقدر اروح محد قالك تشيليني منهم وتخليني كذا لدرجة بعض صحباتي يفكروني من الدار ومااعرف ايش اقول لهم وانا مااعرف امي وابويَ وحتى اخواتي الجدد كويس ولا اروح لهم الى من سبع لخمس سنين اشوفهم وبس يوم او ثلاث ايام وارجع ورسميه معاهم مو مره ميانه المهم من شهر ٣ وانا اقولها روحي كلمي امي وقوليلها وكالعاده تقول ماادري ابوك سعودها ولالا وامك ماتجي بالساهل لازم اعطيها فلوس واعبي عيونها وتسجلك واقول ذا شي غصباً عنهم مو بكيفهم كلهم واولهم انتي لو قلت بشتكي باخذ حقي وصارت تقول يابنتي ابوك عليه ديون كثير وحالهم ابد مو كويس ويحشش وامك لاعبه بعقله وعنده القلب ماابغاك تسوين له مشاكل واخواتك يتضررون مالهم غيره ويتحسبون عليك قلتلها انتي اللي سويتي المشكله وانتي تتصرفين قالت خلاص بدبر ١٠ اللاف ريال واروح لأمك واعطيها نص المبلغ وشهادة ميلادك وتروح تسويهم واعطيها باقي المبلغ قلت طيب، انا لين اليوم ماعندي اثباتات وعندي شهادتين ميلاد الاولى مكتوب اني اجنبيه والثانيه سعوديه وللاسف مو بأسم ابويَ باسم اللي قلتلكم عليه!
ناس كثير قالولي روحي جمعية حقوق انسان او اشتكي ياجماعه انا ماعندي شي يثبت اني بنت فلان كيف اروح اشتكي واخاف اروح ويمسكوني وبعدها مااطلع؟ كثير قالولي روحي لداوود ولا ابو محمد ولا دوري محامي واقولهم انا لحالي وماعندي دخل اصرف منه واعطي محامي وناس يقولون ناشدي الملك سلمان يساعدك، ابغاكم تدلوني على حل والله احسكم اخواتي وماعندي احد اساله بذا الموضوع عشان يعطيني نظره ويحسسني اني بنت حرام عشان كذا حالي كذا؟ قولولي اروح لمين ولاايش اسوي وانا ماابغى اضر اللي ربتني لانها شايلتني بعيونها ومو مقصره عليَ بشي غير انها ضرتني ف اثباتاتي انا صار عمري ٢٠ سنه وماكملت الثنويه ولااشتغل ولااقدر اطلع واموري كلها واقفه وحالنا صاير اسوء من قبل،،
ساعدوني الله يساعدكم ويفرج همومكم، واعتذر اذا كانت سالفتي طويله بس اول مرا انضم لمنتدى كنت اتابعه من زمان واشوف القصص اللي فيه وقلت يمكن فيكم احد يقدر يساعدني ويفرج كربتي، الله يرزقكم من واسع سماه ❤️❤️ .