أهلي والدراسة والزواج

السلام عليكم ورحمة الله وبركاته
أخواتي انا عضوة جديدة انضميت معاكم ومتابعه لهذا من المنتدى الرائع من سنييين واستفدت منه الكثير الحمد لله
المهم عشان ما اطول ببدأ بموضوعي
انا يا أخوات فتاه بعمر ال٢١
مشكلتي أن اهلي من النوع اللي البنت مو مهم تدرس لان مالها الا الزواج والأطفال للأسف تقكيرهم كذا وعانيت جداً معاهم حتى كانوا بيخلوني أوقف الدراسة من بعد المتوسط بس انا حاولت وجاهدت جهاد عظيم والحمد لله كملت الثانوي والحين ليا تقريباً ٣ سين متخرجه بس نفسي ادرس جامعة حاولت مع اهلي كثير بس للأسف رافضين وبشدة قلت لهم ع الأقل معهد اَي شي اهم حاجه اطلب العلم مع العلم ان التخصصات اللي ابغاها كلها في مجال الدين يعني مافيها اختلاط او نقول ما حتستفيد مثلاً


بس الحمد لله برضوا انا ماجلست في البيت كملت حفظي للقرآن بعد الثانوي وختمت الحمد لله برضوا بعد معاناه لان ابوي كان احياناً يوقفني ويقول يكفيك وبعد محاولات وتيسر من الله الحمد لله كملت
وحاولت بعد ما ختمت أتوسع في مجال القرآن وادرس سند وقراءات وسجلت بس كمان بعد معاناه والحين ابوي مانعني تقريباً من ٣ أسابيع ويقولي دي المرة خلاص يكفيك درستِ اكثر من كل اخواتك 😭😭
حاااولت معاه للأسف مو راضي ابدا ويعصب عليا ويجرحني بالكلام حتى علاقتي فيه ذي الايام متوترة كل ما احاول أصلحها تصير مشكله ويعصب ويرجع نفس الوضع
والحين انا جالسة في البيت ونفسيتي جداً تعبانة بس أبكي ما أتحمل اجلس في البيت كذا اتعودت ان عندي دوام اروح له


وغير كذا من زمان وأهلي بيضغطوا عليا في موضوع الزواج لاني دايماً ارفض اللي يتقدموا لي لان كل جماعتنا تقريباً نفس تفكير اهلي ف عشان كذا ارفض ما ابغى أعيش نفس الحياة مرتين بس للأسف اهلي شاكين فيني انه ليش ارفض وأنه اكيد عندي واحد بكلمه !! برغم ان ما عمري خذلتهم بس للأسف مافي ثقة
وما حيفهموا اسبابي هذي أبدا 💔💔
فعلاً انت حالياً صرت أتمنى اتزوج بس عشان اهرب من الوضع اللي انا فيه بس للأسف كل اللي يتقدموا مش مناسبين لي تعبت من كلام اهلي وأقاربي كلهم مستغربين ليش ما اتزوجت للآن وبعضهم يسألوني انا والله ما اهتم لكلامهم كثير بالعكس حتى ما ارد عليهم بس بحد احياناً انجرح من كلماتهم لانها مو هينة
تعبت والله مو عارفة ايش الحل ايش اسوي
الله يجزاكم خير افيدوني أتمنى أرجع لتحفيظي واكمل قراءات هذا اهم شي احس صبري بينفذ بس الحمد لله ع كل حال
وأتمنى تتعدل كل الاوضاع
دعواتكم لي في ظهر الغيب🌹
في حفظ الله ورعايته