أهل جده حمام والطايف أهله قماري

في صندوق ذكرياتي
ومحطات حياتي
صفحات مستحيل
أنساها ودايم على بالي

جا أبوي الله يرحمه مهمة عمل
في الطائف ورحنا معه
درست فيها سنه أولى وثاني ثنوي

كانت نقله نوعيه بكل مافيها من معنى

أهل الطايف غير في كل شي
عاداتهم جميله وراقيه وذوق

اختلاف كبير بين الي عشته في
الرياض وحايل والأردن .

ذوق في كل شي
تقديم القهوه والشاهي فن
الطبخ وريحة الطبخ شي ثاني

مافيه تقديم كذى وبس!

حتى البدو الي في الطايف
مآخذين عادات أهل الطايف
في كل شي

جاورنا السفياني والقرشي
والهذلي والأشراف والأسياد

عالم من الفخامه البسيطه!

غرفة الحريم مجهزه بأدوات الشاهي
والقهوه
عربيه فيها الكاسات والفناجيل والبراد
الغير شكللللل.

يرصونها بشكل فني ويغطونها بمشمع بلاستيك
أو بمفرش دانتيل لحين الإستعمال.

الشاهي معاه صحون قزاز يحطون في واحد
حبق واثاني نعناع والثالث ورد طايفي

تلقين ريحة الغرفه منعشه ونظيفه ودك بس تتفرجين.

على جنب فيه مبخره وولاعه وفحم وصحن مستكه فاخره أصليه

لما تجي تصب الشاهي تولع الفحمه وتحط المستكه وتبخر الكاسات قبل تصب🥹
والكاسات ياناس مهي زي كاساتنا الدعله!

كاسات صغيره تبرق وتفتح النفس
مستحيل تقولين مبي
ولا ما أشرب سكر
ولا حرف
لأن الي أمامك شي ماترفضينه

الغريبه واللدو والمعمول طعمه حكاااايه

كانت ساكنه جنبنا وحده من الأسياد
إسمها عايده السيد الله يذكرها بالخير
آخر الليل أروحلها مع أمي وتسوي سليق
لاتسألوني عن الطعم والشكل والتقديم!

زواجاتهم كرنفال
مهرجان
تحسين فيه زواج
مهو بس تعب وركضه ع الفاضي!

سكنا حي إسمه حي قروى
من أجمل أحياء الطايف
الشوارع والأشجار والورد
والمطر الي كان كل عصر ينزل
وتصير الأجواء لندنيه وخياليه

امتدت علاقاتنا بالجيران لأنهم يعزمونا
في جده لمناسباتهم وكنا نروح ونشوف
إبداع ثاني
وتقاليد جميله مستحيل ننساها.

بنات الطايف وجده الي هنا
هل لازلتوا متمسكين بعاداتكم الجميله
ولا الزمن تغير وغيركم؟