أهل زوجي ومعاناتي معهم

يا بنات أنا ما أسمع أغاني من صغري ولله الحمد لكن الشيلات في حفلاتنا مع اهلي وصديقاتي نشغلها بس بدون موسيقى وايقاعات ، المهم مرة اهل زوجي عزموني على مخيم ورحت ولأول مرة أوافق كنت سابقًا أعتذر عن حضور المخيمات والاستراحات و طبعا ما كنت ادري ان العزيمة فيها فقرة رقص ( لأني احط احتمالية وجود موسيقى) وانا احاول اتجنب هذي الملهيات ودي اتخفف من فتن الدنيا والله يعينني على ذلك، المهم يوم رحت المخيم الا اشوف اهل زوجي مجهزين السماعات وبيرقصون طبعا هم اللي اعرفه عنهم انهم محافظين ومايسمعون اغاني لكن لما بدأ الرقص شغلوا شيلات بعدها بالتدريج اخذهم الحماس وشغلوا اغاني وفيها موسيقى وبعدها رقص فاحش وكلام بذيء ودائمًا كل معصية لابد تجي بالتدريج زي ماتعرفون، المههم انا كنت محرووووقة من داخل بس ماتكلمت وادري اني غلط مفترض أنهى عن المنكر ولو درى زوجي احتمال يخاصمني لانه مايحب المسخرة والموسيقى ، بس سبب سكوتي لعدة أسباب: ١. طبيعتي ما اتدخل بأهل زوجي وعلاقتي معهم سطحيييية جدًا ٢. لو تدخلت بيصير فيه حزازيات وممكن يصير بيننا موقف يأثر على علاقتي مع زوجي وأبنائي بالمستقبل ٣.لو علّمت زوجي بيروح يكلم خواته وبيعتبروني نمّامة وبيكرهون جيّتي وروحتي لهم ٤.ممكن تشغيلهم كان زلّة ومع حماس الرقص وكذا وتدخلي بيكون أكبر من السالفة ٥. بنتي وولدي صغار ودي يختلطون بأهلهم لكن هذي النتيجة صاروا يشوفون منكرات وانا السبب


+جتني اخت زوجي ورتني مقطع بجوالها فيه منكر من المنكرات وانا انقهرت اني مانصحتها او على الاقل قلت لها خلاص شيلي الجوال لا كمّلت بس واضح عليّ الانزعاااج وانا والله انصدمت فيها ،، كنت احسب انها ماتشوف مثل هذي الاشياء بس سبحان الله انا اساسا من زمان ما أحتك فيهم بس هالمرة وافقت أطلع معهم المخيم ولاحظت بمجرد يزيد الاحتكاك مع اهل الزوج تتبين اخلاقهم.

المهم لي فترة وأنا في قلبي مثل الجمرة وحزززن وحرارة الذنب موووجعة ، اقول ياليتني تكلمت او على الاقل رحت مكان ثاني بعيد عن الرقص والموسيقى وألوم نفسي ليش إني سويت نفسي راضية وانا من داخلي مو راضية ؟؟ لو أنا عند اهلي او صديقاتي كان عبّرت وابتعدت بس اهل الزووووج معروف ان العلاقة معهم حساااسة واي حركة معاهم محسوبة ولها تأثيرها المباشر على بيتك وزوجك وعيالك ،، طبعًا ياكثر ما اعرف حريم من قرايبي نصحوا اهل زوجهم بنصيحة طيبة ونهي عن منكر ولقوا أشد انواع الاهانات وخراب البيوت لدرجة ان بعضها توصل طلاق ، وهذا اللي مرددني

يا بنات حطوا نفسكم مكاني هل تحسون سكوتي بمحله ولا أصير اتكلم بس بأسلوب ؟؟
طبعًا قررت بداخلي ما عاد بأحضر مخيمات وشاليهات معهم وبأقتصر على زيارة أم زوجي فقط في بيتها لانها حرمة طيبة وتستاهل اللي يزورها وحتى خوات زوجي محترمات بس ماودي بالاحتكاك معهم لأن بيننا فوارق واختلاف افكار

شوروا عليّ يابنات