أوّاه يا قلبٍ فقد من يسليه...

أوّاه يا قلبٍ فقد من يسليه

من عقب ما هو بين خله والأصحاب
فاضت عيونه وأغرق الدمع خديّه
يومه تلفّت شاف كل الملا أغراب
محدٍ يناظر له ولا أحدٍ يحاكيه
محدٍ تأثر يوم بليت الأهداب
وحدي أقلّب ذكرياتي وأنا أرثيه
ذاك الزمان اللي تنكّر لي وغاب
ذاك الزمان اللي تعلّت مباديه
فيه الغلا ما تربكه كلمة عتاب
يوم إن قلبي كل الأفراح تحويه
والحظ الأقشر قد صفالي وقد طاب
يومه معي وخلان قلبي حواليه
ما خاف قلبي لا ولا أظنه ارتاب
ما هزني ظلم الزمان وتقوّيه
يومك معي ماخاف غدره ولاهاب
لو ان عيني هلت الدمع يا هيه
تاخذ طرف غترتك وتزيح ماانساب
واليوم وينك؟..وين ذاك الغلا؟..وليه؟
ليه ابتعدت ابلا معاذير واسباب؟
عطني عذر لو كنت ما اقتنع فيه
لو كنت بايع يا عشيري وكذاب
عطني عذر بصدق العذر وأحييه
ذاك الخفوق اللي سبب بعدكم ذاب
عطني عذر .. والله والله لا أنهيه
كل الملام .. أصك من دونه الباب
وان كان قلبك ماله أعذار تنجيه
قلي >أحبك< تشفي جروحٍ عطاب
L
ياللي جفيت وجفاك المر ذابحني
عقبك وجيه البشر ماني بدانيها
من يوم حبك غزى القلب وتملكني
قطعت كل العلاقات وطواريها
اقرى رسايلك ودموعي تسابقني
وارد واقرى الرسايل واحتفظ فيها
انت اخر انسان هاقي منه يصدمني
والظاهر ان هقوتي بانت مواريها
لو الوصايا ليا احتديت تنفعني
ياكثر ناس على ذودي بوصيها
ليت الفرح { بنك } لاجيته يسلفني
واقاصده { راحتي } وحقوقها وفيها
من كثر ماكنت جارحني وظالمني
قمت اعزل جروحك بقلبي واسميها
تدري وش اللي يبكيني ومضحكني
انك محامي قضيتنا وقاضيها
تدري متى تعرف قدري وتفقدني
لارخصت نفسك لشخص ما يراعيها
بكره لياهملوك الناس تذكرني
وتقول عزاه عيني من يداريها
مدام غيري على قلبك مشاركني
وش هو له اعلق الأمال وابنيها
يكفيني انك رحلت ومنت عايفني
هذا عزا النفس من كثرت بلاويها
اهديتك دموع من طعنتك تحرقني
وانت اللي تستاهل الدنياومافيها
واهديتني جرح موجعني وعاجبني
لن الهدايا على مقدار مهديها
صحيح { حنا انتهينا } بس صدقني
والله تبقى { هوى روحي } وغاليها
مفضوح راعى الهيام ونظرته تغني
ملامحه واضحه في وجهه راعيها
لكل داء دوا لو هي متعبني
الا محبتك اعيت من يداويها
ان قلت علمني انسى لاتعلمني
دنياي لامن نسيتك ويش تاليها
فارقتني وضحكتك عيت تفارقني
والله يلعن ابو الفرقا وطاريها
مقدر افكر بغيرك وانت عارفني
عشان حاجه بقلبي مقدر اخفيها
اخاف لاحبني غيرك وعاشرني
يشوف صورتك في عيني ويوحيها
نشدت عنك وسمعت اللي يفرحني
وارتاح صدري من هموم يحاتيها
تبي تعرف وش على الفرقا مصبرني
انك بخير وحياتك مهتني فيها
من يوم ماغبت والوحده تعذبني
اقرى { رسايلك } في حرقه والاحيها
اشوف { صورتك } ودموعي تسابقني
وياكثر ماجيت ابمسحها وأخليها