شكرا يا عسل على المتابعة والاهتمام

لا تستغربي ولا شي
بالعكس
احنا صورنا كتير
شواء فيديو أو كاميرا

بس الطيارة ما صورتها -خفت يكون ممنوع -

والأكل يا حليلك فاااااااااضية انتي مرة طبعا ما كان يهمني أصور أكل !ومرة ما فكرت كدا !! لأني أبغى أصور اي شي حلو هناك
زي الطبيعة والفندق

وزياراتنا

وكمان أغلب الصور أنا فيها ...

ودي مشكلة لأني مارح أنزل صور أنا فيها حتى لو غطيتها ما رح يكون منها فائدة ...عشان كدا راح أنزل صور لنفس المكان بس منقولة

راح أنزل صور ما فيها أحد من تصويري أو تصوير زوجي لأننا اشتركنا في التصوير

وأنا ساعات كتيرة كانت الفيديو في يدي

وأنا يا قمر أنزل لكم صور من أماكن تانية

لأن القصد هو انكم تعيشوا الجو وكأنكم انتو اللي سافرتوا

ودا لازم

ولا ايش الفايدة من الموضوع بدون متعة الاحساس

ولا انا غلطانة ......؟؟؟؟؟؟؟؟!!!!!!!!!

أنا عندي صور كتيرة لماليزيا من النت لأماكن رحناها بس مثلا نسينا نأخذ الكاميرا - زي ملاهي ثيم بارك اللي في فندق برجايا كوالالمبور -

وبس ........

أنا أبغى :

1. تيعشوا الجو وتشوفوا الدنيا هناك - سواء بصور من تصويري أو من النت-
2. تسير عندكم خلفية كبيرة عن دولة ماليزيا وأهم الأماكن هناك
3. تنبسطوا وتستمعوا بالأحداث والمواقف والقصص

أعتذر لكم أخواتي الغاليات عن التأخير

مو تغلي أو تطنيش لكم لا ......أبدا

لأني كنت مشغولة

وكمان تعبانة

وشكرا لكم على المتابعة

وراح أكمل في أقرب وقت

الحلقة الخامسة

لمن وصلنا مطار كوالالمبور الدولي

كنت مرررررررررة تعبامة لأنو عدى علي يوم كامل تقريبا بدون نوم

قمت الساعة 12 الظهر
الساعة 5و نص في الطيارة إلى أبو ظبي
الساعة 12 ونص ليلا في الطيارة إلى ماليزيا - كوالالمبور
ودحين الساعة 8 صباحا

الهم جلسنا أنا وزوجة صاحب زوجي ربي يسعدها - وكلنا كنا عباية على الراس -

قلت لها : الحمد لله خلصنا ووصلنا ...

قالت : مين قال لك ؟؟؟ لسه باقي بيننق ......

قلت : ايش؟؟؟؟؟؟؟؟؟؟

قالت : لسه باقي نركب طيارة ونروح جزيرة بيننق

كنت راح أنفجر من العصبية اللي جاتني

كل حلمي مخدة وبطانية - إهئ إهئ إهئ :icon33:-

وفي دا الوقت راح زوجي وصاحبه يخلصوا إجراءات السفر إلى جزيرة بيننق

ولمن جو رحنا ركبنا قطار داخل المطار عشان نروح نجلس قريب البوابة

ودي صور له - طبعا الأبواب الزجاجية لمن تفتح يكون القطار بالداخل ولازم بسرعة نركب -







وكانت الرحلة الساعة 9

سويت لولدي حليب ..وجلست أنا وزوجي جنب بعض ...

وكان في زوج وزوجته شكلهم عرسان برضو من السعودية أو من دولة خليجية بس الأغلب السعودية - كانت الحرمة مغطية -

سمعنا النداء لرحلة جزيرة بيننق - وطبعا ركبنا على الطيران الداخلي لماليزيا

صراحة كان شكل الطيارة سيء جدا - وعلى قولتنا معفنننننننننننن- وللأسف مالقيت صورة لنفس شكل الطيارة اللي ركبناها

لا مكيف ولا شي

قال صاحب زوجي لزوجي : الله يرحم طيران الاتحاد

لأنو رووووووووووووعة قليلة فيه وما فيه أي عيب إلا لبس المضيفات القصير جدا وأغلبهم أجانب

المهم كانت الطيارة مرة صغيرة

احنا كان مكاننا قريب الشباك ..المقعد اللي جنب الشباك على طول جلست فيه حرمة ماليزية - بس شكلها من أصل صيني - رايحة لبيننق
وأنا جنبها وبعدين زوجي جنبي

المهم شوية جابو المضيفات كاسات بلاستيك فيها عصير برتقال أو حليب كاكاو!!!

وكل واحد ياخذ كاسة

وبعدها جابو أكياس صغيرة فيها فول سوداني

يا عيني على الأكل بس

جلست أتحكى مع الحرمة اللي جنبي بالانجليزي طبعا

قلت لها انتي من هنا -أقصد من ماليزيا ؟؟

- نعم وانتي ؟؟

- من السعودية ؟؟

" ترا ماني فاكرة لآنو دي أول مرة أكتب مذكراتي وقصتي بالتفصيل فممكن أنسى شي أو ألخبط في شي "

قلت لها : ليش مسافرة بيننق ؟؟

- : أنا أشتغل في كوالالمبور وآخر الأسبوع أروح لبيننق ...لأني أصلا من هناك وساكنة هناك ..!!!!

- : متزوجة ؟؟

- : نعم ..

- : كم عندك ؟؟

- أذكرها قالت : أربعة والرابع صغير عمره 10 شهور .. " وترا الحرمة ماهي سمينة أبدا وجسمها مرتب صح مي حلوة بس مو باين أم لأربعة مو زي كتير حريم عندنا بعد أول واحد تفرط -

- : مع مين تتركيه ؟؟؟

- : مع المربية !!!!

شوية ما حسينا قيدنا وصلنا إلى جزيرة بيننق ...

وبعدين























إلى اللقاء في الحلقة القادمة ..........

ننتظرك.............لاتطولي

ننتظرك