إبتعدوا عن عتبات هذا المستشفى ياحوامل(نصيحه اخويه)

بسم الله الرحمن الرحيم

اولا احب ارحب فيكم كلم واشكر ادارةالمنتدى على تفعيل عضويتي مع انهم طولوا علي كثير وانا كنت متشوقه للمشاركتكم بقصتي عساه تفيدكم فبل لايفوت الفوت وتتعرضوا لنفس الموقف!(الله يكفينا الشر)
اخواتي بحكي لكم قصتي بالتفصيل الشبه ممل وعساه مايكون ممل لان مقصدي فيه النصح والتحذير
قصتي ياخواتي بدت لماحنيت على زوجي وألحيت عليه يسجلني بمستشفى المانع الخبر ولكنه سجلني بمانع الدمام لأنه أقرب لشقتنا (طبعا احنا نتعالج على حساب ارامكو) و من سجلت فيه ماطبيته إلا وانا حامل وياليتني ماطبيته لكن قدر الله وماشاء فعل
المهم شاءت رحمة ربي ان احمل بطفلي الاول بعد شهر من زواجي ومن هنا بدات مشكلتي مع المستشفى طبعا قبل لا اروح لهم كنت مسويه فحص بالبيت وكان أيجابي على طول طرت للمستشفى فرحانه مستبشره ووقفت انا وزوجي عند الإستقبال وهم خيروني بين دكتورتين وحده باكستانيه والثانيه سوريه تشارونا انا وزجي وقلنا السوريه احسن عربيه ومنا وفينا وتفهمنا ونفهمها وفعلا اخترتها ودخلنا على (د0سحرسليم صالح) وسالتني الأسئله الروتينيه بس قالت قبل كل شي نسوي تحليل دم عشان نتأكد وسويته ومن لهفتي انا ورزجي قلنا نبغى النتيجه بسرعه قالت يبي لها نص ساعه روحوا واتصلوا تليفون ورحنا البيت وقبل لانكمل نص ساعه بدقيقه اتصل زوجي وقالت له النتيجه سلبيه مافيش حمل(مع اني حاسه اني حامل) وكنت بعدها كل يوم اسوي اختيار بالبيت ويطلع موجب واليوم الرابع رحت لمستوصف الجزيره وسويت تحليل دم وبنص ساعه قالت لي مبروك حامل(يعني صدق احساسي وصدقت اختبارات البيت)
رجعنا للمانع من بكره وقلت لها اني حامل وكان معاي تقرير المستوصف قالت لي بيكفي مايحتاج نعيد التحليل وعطتني حمض الفوليك وقالت تعالي بعد شهر ورجعت لها بعد الشهر وبرضو مشى الوضع كالعاده زياده عليه التصوير وحبوب الإستفراغ المشكله تفاقمت وبدن ماأحس فيها (لقلةخبرتي وخبرة زوجي لهالأمور) راح اقولكم كيف تفاقمت مشكلتي00الأخت الدكتوره اكتشفت ان طول عنق الرحم عندي قصير عن المعدل الطبيعي مع بداية الشهرالثالث قالت لي لازم ترتاحي على ظهرك ولما خفت وسألتها ليش قالت ماتخافي بس ممكن لاسمح الله مستقبلا قصر عنق الرحم يسبب لك ولاده مبكره أوإسقاط وأناسمعا وطاعه وياحياتي كل الحريم الي حولي وألي يفهمون بهالسوالف وعلى راسهم امي يحنون علي عشان اسوي عملية ربط وانا ياقلبي على برائتي اضحك واقول وشو ربط؟!الدكتوره ابخص لو محتاجه ربط كان قالت لي وانصحتني امي بأن اسئل الدكتوره ليش ماتربطني بس انا عييت قلت هي ادرى بشغلها والأدهى في اواخر شهري الثالث تعبت تعب شديد ماقدرت اوقف إستفراغ(وانتو بكرامه)وفوق هذا حراره والم في بطني إضطريت اروح الطوارئ حق المستشفى وانتظار لحد ماجتني دكتورةالنساءوالولاده المناوبه(د0ريما) جت ومن شفت مكياجها ورسمت عينها والقصه ألي طالعه من وراء حجابها وانا مش مرتاحه (لأني أؤمن بأن المستشفى مكان عمل مش إستعراض) المهم جت واخذت حرارتي وسمعت دقات قلب الجنين واخذت تحليل بول(وانتو بكرامه) والإخت صرفت لي مضاد حيوي!!وسألتها عن البندول كمسكن للصداع ومخفف حراره هل يضر بالجنين او لا (لأني دايم اسمع بأنه مضر فقلت اتأكد منها)قالت لا ثلاث حبات باليوم مابتضر!!!!!!
ورحت البيت على بالي ناصحه اكلت بندول بس مااكلت مضاد قلت بستنى الدكتوره حقتي تداوم الصبح واسألها وماصدقت خبراصبحنا واتصل على مكتبها الصبح واسألها واقولها ايش صار لي وان دكتورةالطوارئ عطتني مضاد لأنها تقول عندي إلتهاب بالبول مع اني ماكنت احس بحراره فيه ولا حرقان المهم دكتورتي المصون قالت لي لا مابيضر في بعض الحالات بتحتاج مضاد وثقت في كلامها وبديت استعمل المضاد وكان قلبي قارصني بس قلت هي ابخص بس للأمانه من الخوف ماكملته بس اكلته ثلاث ايام ووقفت وبعدين طلعت دكتورتي إجازه ولمارجعت كنت تقريبا في آخر الرابع مع بدايات الخامس وطبعا قبل لاتسافر ولمادخلت الرابع وقفتلي حمض الفوليك وعطتني حديد وكالسيوم بدون ماتنصحني بانهم مايجتمعون سوا ولايتاكلون بوقت واحد فكنت متى ماتذكرت اكلتهم بوقت واحد وبلقمه وحده المهم بعد مارجعت سوت لي سونارولا حظت ان عنق الرحم للحين قصير عادت علي نفس الإسطوانه إرتاحي ووقفي جماع هالفتره لحدمانطمن وانا وزوجي سمعا وطاعه ومن يومها صارالتصوير كل بعدإسبوعين وأحياناإسبوع(الظاهر الدعوه كلها إستنزاف فلوس من ارامكو وبس) المهم كل مره نفس الحاله مافي جديد وإحنا سمعا وطاعه راحه ومافيه جماع والحدث المريب وهو لب المشكله لما جيتهم وانا في آخرإسبوع من السادس عشان السونار اتفاجأ بدكتورةالسونار يتغير وجهها وتشوي تكفخني لما شافتني امشي وهي تقول(ماتتحركيش ماتمشيش انا مابهزرش انا بتكلم جد) وجابولي كرسي وسالفه ومختبين وودوني لعيادة دكتورتي بالكرسي وانا مستغربه خبتهم ولما دخلت عليها كانت تقلب صور الأشعه بيديها ووجهها منقلب وقالت لي اطلعي عالسرير افحصك من تحت شافتني متردده قالت الفحص من تحت لازم يصير ماتخافي وطلعت وانا خايفه ودخلت يديها وطلعت معها مويه خفيفه وقالت لازم نسوي ربط(صح النوم ياسحر من جد صح النوم في هالنقطه محدراح يفهمني إلا الي قد عملوا هالعمليه ويدرون انها ماتتسوا إلا في الأشهرالأولى وقبل الشهرالرابع!!) المهم وللمره الالف طاوعناها وقلنا هي ابخص لا وفوق كل هذا لما سئلتها قلت كيف الربط بيكون فيه بنج موضعي(على نياتي)قالت بنج كامل هاي عمليه ولما سمع زوجي طاري العمليه قال لازم يعني؟قالت طبعا شفتني كيف قررت بدون حتى ماأشاورك!(وين هالقرار من اول)
طلعوني فوق بكرسي وحطوني بغرفه (الله لايوريكم شكل الغرفه ولاضيقها ولا حمامها وألي مجربين يدرون) وقعدت عندهم كم ساعه لأني يوم اجيهم كنت شاربه وآكله ومكثره مويه عشان اسونار فقرر دكتورالبنج يخليني كم ساعه ومع دقةالساعه 11مساء دخلوني غرفةالعمليات وكان موجود فيها ممرضات يقرقون ودكتوره هنديه إسمها(بريما)وهي ألي بتشارك دكتورتي بالجريمه (عفوا العمليه) المهم جاء واحد فلبيني وبنجني قبل لا اشوف دكتورتي وبثواني ماحسيت بنفسي وعلى كلام زوجي واهلي الي كانوا يستنوني عندغرفةالعمليات ان الدكتوره دخلت وهي بشوشه وطلعت عندحوالي الساعه 11ونص وهي وجهها مرتبك ومستعجله المهم انا صحيت بحدود الساعه 12صباحا وكان اول شخص افتح عيني عليه رجال هندي مدري وش سالفته ممرض او متفرج!! سألته قلت انا وين قالي خلاص عمليه (تخيلوا قبل اتبنج ماكان فيه غير ممرضات واصحى ألقى فوق راسي هندي لو انه دكتور قلنا يلا عند الضروره تحل المحرمات بس اتفاجأ فيه كذا يعني قلّوا الممرضات!!) المهم صحيت وكانوا حطين مغضي وقسطره عشان البول وانتو بكرامه والحين لا حظوا تسلسل الاحداث الغبي لا ونسيت اقولكم اني لما طلعوني للغرفه كان الشرشف الي مغطيني فيه وصخ وفيه بقع دم ولما قال ابوي للممرضه حقرته ولا كانه يتكلم ولا شي المهم حطوني بغرفه لحالي لان زوجي قال بدفع لكم زياده وبعدها وفي الصباح عطوني ثلاث حبات برتقاليات سألت الممرضه ليش قالت عشان بيبي ومن اكلتهم وانا باسوء حاله رجولي ماعاد اقدراحركهم وثقال واصابع يديني اتعكفوا وماقدرت افردهم ولما ناديت الممرضات وكانت عندي اختي مرافقه حاولوا يساعدوني احرك رجلي بس مافيه فايده وقامت وحده فلبينيه الله يجزاها خير تدلك رجولي واختي تقرا علي وكان فيه ممرضات غيرها وكنت انا مصره اقول نادولي دكتوره وكان مافيه إلا المناوبه لانه مابعد بدا الدوام كانت الساعه تقريبا مابين 6 و6نص بس قالو لي المناوبه عندها ولاده تولد وحده ولما طولت وانا كل ساعه اناديها واقول ماصارت ولاده قالوا خلصت ولاده ألحين قاعده تخيط المريضه ولما خلاص شافوا يديني مارجعت حالتها الطبيعيه وانا خايفه تعاطفوا معاي ثنتين وقالوا لوحده هنديه شكلها رئيستهم نادي الدكتوره (طبعا قالوها بالإنجليزي وردت عليهم بالإنجليزي على بالهم ماأفهم ) وردت قالت لهم لا عادي خلوها الدكتوره تقول طبيعي!! وبعدين مع إلحاحي تكرمت الدكتوره وجتني وطلعت هي نفسها ريما ام المكياج ألي صرفت لي المضاد وسمحت لي بالبندول (عرفتها من كحلتها ومن قصتها الشقرا) ووالله يابنات قلبت يدي بيدها وكأنها تسكتني وبثواني حتى ماكملت دقيقه وقفت وقالت لي وهي تمشي عادي طبيعي بيروح بعد شوي وكأنها طايره حتى ماكلفت نفسها تناظر وجهي او تطمني وقبل لا تبعد قلت لها دكتوره شيلي القسطره اقدر اروح الحمام لانها تعورني ورجعت تتكلم انجليزي على بالهم ماأفهم ووالله يابنات اني شفتها بعيني وبطريقة استهتارتقول للممرضه شيليها عادي بس الممرضه عيت تقول الدكتوره سحر تقول لا أحد يشيليها وهزت اكتوفها وراحت!! وبعدين بدا دوام الدكتوره سحر (دكتورتي)وقالت لهم يشيلون الشاش ألي حاطينه داخل والقسطره ومااصدق على طول الشاشه ألي سحبوها حسيت روحي تطلع وراح صوتي من الصراخ وشالوا القسطره وعلى طول نزل معاي مويه والدم والمويه مش عاديه إلا سيل من المياه ومنعتني من الحركه وراحت وصرت لما أبغى الحمام يجيبون لي قيصريه وانا بمكاني منسدحه وأنا مدري ايش مصيري ولا ادري وش سالفة هالمويات والدم وبعدين خلوني اشرب مويه كثيييييييير عشان يسون لي سونار يشوفون عنق الرحم والجنين وجت دكتورتي ودكتورةالسونار وقعدوا يتكلمون بمصطلحات طبيه مافهمتها الشي الوحيد ألي فهمته من كلام دكتورتي كانت تقوله أصلا المنطقه ألي اشتغلنا عليها كانت كثير ضيقه وكانت تقولهم ان الدكتور مش راضي ويقول لازم نبعثها وقالت لهم بالإنجليزي انه غاضب جدا فالتفتت علي وقالت لي حبيبتي لازم نبعثك على ارامكو لانو أناماكنت عارفه انك من ارامكو (سبحان الله شلون دريتي الحين) ومن سياسةارامكو لما مريضه بتجيها ولاده قبل 37 إسبوع لازم نبعتها ليهم مع انو كان نفسي تظلي معانا(وش ناوين اكثر) المهم قبل لا اروح دخلتني غرفةالولاده عشان تفك الربط ألي سوتها(تخيلوا وانا مابعد حتى كملت 24ساعه تحربشوا فيني مره ثانيه)وهالمره بدو بنج شوفوا المعاناه(ان شاء الله تخفيف ذنوب) وأول كلمه قالتها بعدماخلصت العمليه(its rainning)وهي مكشره وطلعت وتركتني!!(يقتل القتيل ويمشي بجنازته) متخيلين الوضع؟وبعدين طلعوني بالإسعاف لمستشفى ارامكو وكان معاي الدكتوره الهنديه المشاركه بالعمليتين الربط وافك(د0بريما)وممرضه وقبل لا اطلع والله يابنات ان الممرضات غيروا لي قميصي ولبسوني واحد انظف ولبسوني قبعه وكانوا شايلين من يدي ابرةالمغذي ورجعوا حطوها وانا عند باب الغرفه بطلع وهم يضحكون بينهم ويقولون بالإنجليزي ان ارامكو شديدن لازم نسوي كذا!!(تخيلوا المهزله!!) وطلعت ورحنا بالإسعاف وهناك كان الفرق بكل شي عند ارامكو كان كل شي غير حتى الألم كان غير وربي ماكان شي عندهم يعور لا ألالات ولا قسطره ولاحتى لما طلعوها مني بعد الولاده ونفسيات الممرضة ولا اروع فرق السماء والأرض
المهم قبل لا تروح دكتورةالمانع والممرضه عطوا الممرضه الجديده حقت ارامكو بعض المعلومات ووروها الملف تطلع عليه وبعدها راحوا وظليت انا بغرفةالولاده وكان زوجي معاي وجنبي طول الوقت (عكس المانع) ولما قعدت تسالنا الممرضه عن وقت العمليه حقت الربط متى كانت ومتى فكوها تدرون وش صار! تفاجأت لأن اقوالنا كانت غير اقوالهم لدرجةانها عادت السؤال اكثر من مره لدرجة انها نادت زميلتها عشان تتكلم معنا عربي تحسبنا مش فاهمين انجليزي!! يعني وإلى آخر لحظه مازالوا المانع يتلاعبون!! ولا حتى جابوا طاري الحبوب البرتقاليات ألي سببت لي تشنجات والدكاتره تفاجأوا لما قلت لهم عنها وجاني الدكتورالمناوب وكان دكتور وقور ومحترم وفاهم حتى ان كل الممرضات كانوا يقولون لي(احمدي ربك انك جيتي على مناوبةالدكتور عواد دكتور ممتاز وقدير)فعلا الحمدلله ألي اخرجني من ذيك المجزره وقالي الدكتور إحنا راح نحاول نخلي الجنين يقعد اطول فتره في بطنك حتى لو قعدتي عندنا شهر او شهرين مالم ترتفع درجةحرارتك اويرتفع ضغطك او يتعب الجنين لكن جنيني تعب ونبضات قلبه ضعفت فكان لازم يولدوني وكان باقي لي يوم وادخل السابع وشاء الله اني اولد في آخريوم من السادس بعمليه قصيريه وطلع طفلي للدنيا خديج يعاني من ثقب في القلب فوق المعدل الطبيعي ونزيف في الرئه والدماغ واجريت له عمليه بالقلب(وسمعت بعدهامن الكثير ان البندول سبب في الثقب لدى الأجنه) والحمدلله نجحت
ولكن تنفسه لايزال مضطرب ودماغه على حاله! ومنذ تاريخ ولادته 4-4-2005 الموافق 25-2-1425 وإلى الآن لا زال حبيس الحاضنه الزجاجيه في العنايه الفائقه للأطفال حديثي الولاده في مستشفى ارامكو اسئل الله له العافيه والصحه ليل نهار00
لو كانت احداكن مكاني ماذا تفعل تجاه ذلك الإهمال والتقصير من د0سحر في مستشفى المانع حين اهملت عمليةالربط في الاشهر الأولى؟ واصرت ان تعملها في الشهرالسادس بعد ماكبرالجنين!! ماذا تفعلون حين تعلمون بأن جميع الأطباء والممرضات ايضا وعامةالنساء من ذوي الخبره اجمعوا ان لاتجرى ابداااا عملية ربط بالشهرالسادس؟؟؟ لماذا اذا هي غامرت واستهانت بحياتي وحياة ابني وصحته جعلتنا حقل تجارب لأهوائها؟؟؟
إلى اللحظه هذي وانا اشعر بقهري وضعفي لاني لم استطع ولا اعرف كيف اقاضيها واترك لها بصمه في حياتها بأن ارواح الناس ليست مجرد لعبه وان الاجساد المريضه حين تستلقي بين يديها طالبةالشفاء بعد رحمة الله من تلك الأيادي البيضاء ليست دواجن ولا حشرات تشريح وتجارب انما هي انفس بشريه وامانه في اعناقهم إلى يوم الدين(حسبي الله ونعم الوكيل)
وأخيرا اخواتي00
هذه نصيحتي من القلب إلى القلب ولإني احب لأختي المؤمنه مااحبه لنفسي حبيت ان انصحكم عشان تحذرون التعامل مع هذه الدكتوره وقسم الولاده عند هذا المستشفى (لاني ماأدري عن الأقسام الثانيه ومااحب اظلم احد) وهذي تجربتي وهذي نصيحتي والله شاهدي على كل كلمه وكل حدث قلته بأني مازودت ولا نقصت وأنا قررت ما ارجع لهالمستشفى مع انه باقي لي عندهم خمس شهور بس قدمنا شكوى لشؤون الموظفين لأرامكو ونظروا في شكوانا وقالوا ان الدكتوره غلطانه وسووا معاها اجتماع واعترفت بغلطها(وش يفيد الإعتراف) وسمحولنا نغير المستشفى وقالوا مستحيل ترجعون لها00
هذي تجربتي ونصيحتي واضحه ولكم حريةالإختيار
اللهم بلغت اللهم فأشهد00 والله يشفي لي ولدي ويطلعه لي سالم وبأتم صحه وعافيه ويشفيه برحمته اللهم آمين ويبعد عنكم كل ضر قولوا آمين