كيفكم يابنات وكيف إختباراتكم إن شء الله تمام
بصراحه في موضوع في بالي من فترة وكنتب حابه أكتب عنه بس أرجع وأقول بلاش وأخيرا قررت أنزله
من فترة طبعا مو بسيطه ومو بس هنا في المنتدى يمكن عند كتير من الناس من داخل المنتدى ومن خارجه ومن خارج
نطاق النت كمان تخرج فلانه السوق مو زوجها مع أخوها مع أبوها أو ممكن لحالها وترجع تصيح وتدعي الله يأخدهم
قليلا الحيا اللي ماعندهم دين ولاضمير ............ إلخ شيل من الشتايم طبعا أكيد عارفين لمين للبنات المتبرجات أو
اللي شايفينهم مع شلة شباب المهم البنات اللي في الضياع والأفضع من كده لمن تجي تنزل الموضوع هنا في المنتدى
وتعالي شوفي أنواع الدعاوي الله يشل يدينهم الله ياخدهم الله يحرقم بعيني شفت هادي الدعاوي في موضوع كتبته وحده من
العضوات وكانت جلسه دعائيه ماأعتقد إنه البنات المعنيين خرجوا منها سالمين لكن إيش الأدهى والأمر إنه كل الحريقه
هادي عشان زوج وإلا أخ وإلا ذكر خايفه عليهم لاينفتنوا يعني بتاتا مافي غيرة دينيه في الموضوع أو خوف من أخت
مسلمه على أختها المسلمه اللي ممكن يضيع مستقبلها أو تموت في وضع غير لائق بسبب طيشها وإللي يأكد كلامي إنه
كل وحده تنزل موضوع على هادي الشاكله تحشر زوجها في الموضوع يعني حتى ماأقدر أكذب عيني وأقول لا أكيد
تغار على دينها لأنها كاتبتها بالمفتشر صحيح أي وحده ماتحب إنه زوجها يشوف غيرها لكن زوجك إذا كان إنسان كويس
وفي دين يردعه مالي داعي تدعي على الناس مو خوفك عليه وبعدين ماأعتقد إنه في إنسان محترم يفكر في الإرتباط
بوحده ضربت الدين بعرض الحائط وإتبعت شهواتها ليش تتمنيلها الشر والموت وهيا على معصيه حطي نفسك مكانها أو
مابقول مكانها لو كل وحده فينا فكرت إيش عندها من ذنوب ومعاصي ومحد خالي هل تتمني للحظه أو تفكري إنه وحده
تجيكي وتقولك الله يأخدك أخد عزيز مقتدر أو شي ماشابه أكيد حتقولي أعوذ بالله وإلا حتقولي في نفسك لسا ماكفرت
عن ذنوبي هما كمان نفس الشي ويمكن أكتر لأنهم على ضلال وفواحش لها وفتنه لغيرها غير البنات اللي قلدوها
غير البنات اللي سحبتهم هيا كم من الذنوب شايله ماأعتقد إنك ترضي لأختك المسلمه إنه ربي يقبض روحها وهيا ماشيه
على هاذا الطريق ممكن بسبب دعوة منك عليها ولو كنتي مسلمه بحق وحقيق كان على الأقل دعيتيلها بالهدايه أو
نصحتيها إذا عندك مقدره وبعدين ماأحد يعرف إيش جوت نفس الإنسان يمكن هما مو راضيين عن نفسهم ليش مانعطيهم
بعض التبريرات يمكن ماتربوا في بيئه صالحه يمكن صحبات والصاحب ساحب يمكن ويمكن وأسباب ماأحد يقدر يجاوبنا
عليها غيرهم لازم يكون عندنا غير دينيه على أخواتنا وأخواننا المسلمين قبل لايكون عندنا غير على زوج وإلا أخ وإلا
أب لازم لمن وحده تنزل موضوع عن شي شافته مثلا في السوق تنزله من باب الخوف على أخواتها المسلمات موش
الشماته والغيره الزوجيه وحتى لو كان هيا عقلها صغير المفروض باقي العضوات مايعطوها مجال ويعطو غيرها
لكن اللي بشوفه العكس تلاقي عضوة ماشاء الله كبيرة وممكن جدا يكون عندها بنت في نفس سن هادي الفئه يعني
المفروض يكون عندها شفقه عليها تلاقيها أول وحده تدعي وإللي تقول كلمي الهيئه تأدبهم أحب أوضح شي إنه هيا إذا
ماسابت الطريق البطال اللي هيا تمشي فيه عن خوف من الله وإقتناع مستحيل تسيبه لاعن طريق هيئه ولاشرطه إلا
ممكن تزيد لازم إحنا نحتضن مراهقيننا بنات أو أولاد ونحاول نرجعم إذا ضلو بدال ماندعي عليهم ويموت فلان وينشل
علان وبعدين إيش بقي من المسلمين لكن لو كان العكس لو كان المجتمع كله يحاول يحتضن هادي الفئه ويرجعها عن
ضلالها شوفو كم مسلم حقيقي حنكسب
((مثل المؤمنين في توادهم وتراحمهم وتعاضدهم كمثل الجسد الواحد؛ إذا اشتكى منه عضو تداعى له سائر الجسد بالسهر والحمى))
((المسلم للمسلم كالبنيان يشد بعضه بعضًا)).
شفتوا إيش قال الرسول عليه الصلاة والسلام في توادهم وتراحمهم الرحمه أساس كل شي جربي تكلمي واحد
بأسلوب فض وكلميه مره تانيه بأسلوب طيب وشوفي الفرق
المسلم للمسلم كالبنيان يعني إحنا كلنا في مركب وحده يعني لو واحد من البنيان أختل حيطيح على الكل لكن
الشاطر اللي يحافظ على اللبنه السليمه ويحاول يصلح اللبنه اللي حصل فيها الخلل
أتمنى إننا كلنا نكون مسلمين بحق ويكون عندنا غيره على الدين وعلى المسلمين ومو غيره تانيه ننصحهم بحب وموده
وندعيلهم لالهدايه مش بالموت
وبعدين ماأعرف أنا أحس إنه الدعاء على الأخ المسلم لايجوز
الفتوى حكم الدعاء على الأخ المسلم بسوء السؤالس: ما حكم الدعاء على الأخ المسلم بسوء وهل يستجاب الدعاء ؟ مثلا يقول له: الله لا يوفقك ولا يرزقك الذرية، سواء كان الداعي مظلوما أو ظالما أو حاقدا؟ الاجابـــةنرى أنه لا يجوز ولو كان الداعي مظلومًا، فإن في دعائه على الظالم انتصارا وأخذا بحقه وتعجلا لظلامته، فعليه أن يصبر حتى يأخذ حقه في الآخرة كاملا إذا صدق أنه مظلوم، وهكذا أيضًا ورد النهي أن يدعو الإنسان إذا غضب على ماله أو على أولاده، فقال صلى الله عليه وسلم:
لا تدعوا على أنفسكم ولا على أولادكم ولا على أموالكم، لا توافقون ساعة لا يُسأل الله فيها شيئًا إلا أعطاه 
.عبد الله بن عبد الرحمن الجبرين
أتقبل نقدكم ليا بكل صدر رحب وطبعا ماأدري إذا كنت أخطأت في كلامي أو إني على صواب بس كلام حسيت إنه لازم أقوله وقلته وإذا أخطأت إن شاء الله إنكم توجهوني:26:
الله يرفع قدرك ..
وينفع بك المسلمين ..
لاحرمك الله الاجر ..