إصابات الركبة

السلام عليكم ورحمة الله وبركاته . شحالكم خواتي ؟
بعد غياب رجعت لكم بخبر محزن ، لان صارت معي اصابة بركبتي اليمين وعملت أشعة رنين مغناطيسي من يومين وباجر ان شاء الله بروح عند دكتور العظام أشوف النتيجة . وأعيش في هم لا يعلمه إلا الله لان احتمال عندي اصابة بالغضروف وبكون اول شخص في عايلتي يسويها ، يعني ما عندي خلفية عن المضاعفات والنتائج . طبعا حركتي محدودة وللاسف ما عندي وقت اهتم بركبتي المصابة لان عندي طفلة عمرها 3 شهور . وما عندي حد يساعدني في رعايتها . واتخيل اذا عملت عمليه كيف بتصرف وانا عندي 4 اطفال محتاجيني . وما اقدر أأجل العملية لاني خايفه من تفاقم الوضع . طبعا للحين انا ما عرفت نتيجة التصوير المغناطيسي بس مبدئيا من الاعراض اللي عندي استنتجت ان معي اصابه غضروف مع الرباط الجانبي بالركبة ، لاني ما اقدر اثنيها ثني كامل ، ووضعيه القرفصاء صعبه علي ، بالاضافه الى تورم اعلى الركبة وهذا اصلا اللي مخوفني . لان التورم صار له أكثر من شهرين وما خف ، والمفروض ارتاح بس ما قدرت لاني موظفه وارجع البيت اهتم بأطفالي. وحتى لو قرر الدكتور عملية شكلي مضطرة اني اظل رابطتها في ظاغط حتى تكبر بنتي شوية . بس مخوفني وضع رجلي وكل اللي اسألهم في الدوام ما عندهم خلفية . وفتحت النت احاول اعرف شي عن الموضوع ما استفدت شي .
ياريت اللي عندها خلفية تطمني . منو عملت عملية ازالة جزء من الغضروف او خياطة غضروف ورجعت تمارس حياتها بشكل طبيعي ؟
طبعا انا حاليا ما اقدر اجلس على الارض وصلاتي كلها ع الكرسي . لاني ما اقدر اثني رجلي بعد السجود . ولا اقدر اوقف مباشرة بعد التشهد .
وفي الدوام لازم اوقف وامشي فترات طويلة بالاضافة الى صعدة السلم . يعني حياتي هالفترة صعبة واحاتي هل بقدر استعيد حركتي الطبيعية في الركبة ؟
قريت انه بعض اللاعبين يرجعون للملاعب بعد عملية الغضروف لكن لازم تأهيل صح . بس ياترا العملية مضمونه ؟
يعني الالم بيرجع مرة ثانيه ؟
والله افكر بأطفالي لان البارحة صار موقف لولدي وما قدرت ادافع عن ولدي وحسيت بالعجز فعلا . وما ابي اظهر ضعف قدام عيالي عشان ما يحسون ان امهم ضعيفة .
دعواتكم لي ان اصابتي تكون طفيفة?
واللي عدها خلفية عن اصابتي او حد في عايلتها كان مصاب مثلي وشفي تطمني وتفرحني وفي ميزان حسناتها ان شاء الله تعالى .