إعادة الامل

راح اكمل موضوعي واتمنى لكم أن تستفيدوا ..
بداية باتكلم قليل عن نفسي وكيف بدأت بخطتي هذي..انا مريت بظروف قاسية وفقدت شخصين عزيزين علي وبغض النظر عن أي شي انا مؤمنة بالقضاء والقدر والحمد الله لكن الحزن شي ليس لنا القدرة على منعه وهذا دخلني في دوامة الاكتئاب وفقدت الرغبة في الحياة ولم أعد أشعر بطعم ولذة أي شي كنت استغفر وابكي وادعي وابتهل ولكن يعلم الله انه كان شي فوق طاقتي..ولكن الحياة تمضي والايام تمر هناك أطفال انا مسؤولة عنهم يذهبون لمدراسهم يريدون أن ياكلون أن تكون اشياؤهم جاهزة وهناك زوج قد يكون صامت ويراعي حالتي النفسية ولكن إلى متى الصبر له حدود وهناك أشخاص في حياتي اكتشفت اني بسبب الفوضى الغير مقصودة في بيتي أصبحت أتجنب زيارتهم واتهرب منهم حتى لااضطر اعزمهم فبيتي ليس بحالة جيدة
اشتري واكوم الاغراض وتتكدس في الثلاجة ليكون مصيرها الزبالة اكرمكم الله لاني ليس لي الرغبة في الطبخ واصبح اعتمادي على اكل المطاعم وارى في اطفالي نظرة العتب فهم لايرغبون بهذا الاكل كل يوم وهذا الزوج يراعي ويداري واحيانا يعصب يتحلطم وانا اغرق في تانيب الضمير وكل هذا وياليت المطبخ في حالة جيدة واعلم انهم يشتاقون لطبخي وتفنني ولكن انا في حالة فوضى نفسية وعقلية..
في الصباح اركض هنا وهناك وكأني دجاجه مقطوع راسها اكوي قميص هذا وابحث في كومة الغسيل اللي له اسبوع في السلة عن شراب هذا وفي نفسي حديث وعتاب لو اني رتبت من ليلي ماكان هذا حالي وياويل اللي يكلمني لاني معصبة ومحبطة
واحيانا اتنشط يومين وانا في حالة غسيل وترتيب وهمة ولكن للاسف يومين اخرين ويرجع الحال أشد من قبل ..احباااااااااط
اجرب الجدول الفلاني والطريقة الفلانية ولكن المشكلة ماهي في الجداول ولا في بيتي ضيق او كبير ولا في زوجي ولا في عيالي المشكلة في راسي...ومخي ....ونفسيتي اللي من جوا هي فوضى
يتبع...

وفي يوم خلاص تعبت من الركض على غير سنع انا اكثر وحدة تتعب وما فيه نتيجة تخبط بدون شعور الى متى ؟؟!!
الى متى في حالة هلع انه يجي زائر فجأة وبيتي كذا
الى متى وتانيب الضمير عشان زوجي واطفالي والاهم ايامي اللي تمر وعيالي بيكبرون وهذي ذكرياتهم عني..
الى متى وانا اقول بكرة وبكرة ويجي بكرة والحال هو الحال
الحين انا عارفة ان فيه مشكلة وان المشكلة في عقلي وراسي ولازم اشوف حل
وكانت خطة اعادة الامل..لروحي ولبيتي من اول وجديد اتعلم المهارات وابني عادات جديدة خطوة خطوة عشان انا احب نفسي واراعيها وأخذ وقتي واطبطب على نفسي واكافئها
قسمت الخطة على ثلاث خطوات او مراحل وخلوكم معي ان شاء الله اكون خفيفة عليكم ...
يتبع

اول مرحلة /عقلي الجميل..ابغاك في كلمة راس:
اولا لازم نعرف قبل كل شي ان العقل او الدماغ بمعنى اصح خلقه الله بطريقة هو المسؤول عن حماية هذا الجسد وهذا الروح فلما تكونين بحالة حماس ومتحفزة وخلاص مسوية جدول وبتمشين عليه امورك في الورق تمام التمام والامور سهلة تتفاجئين وقت التنفيذ بحالة الكسل والخمول ومانتي قادرة تسوين شي السبب ببساطة
ان الدماغ يشعر بحالة الهلع اللي تصيب الجسم يوم تشوفين الكركبة وماتدرين من وين تبدين وهنا يبدأ الدماغ يحس ان الموقف خطر ويبغا يحميك فيقول خلاص اتركي كل شي وارتاحي..اتمنى وصلت المعلومةهنا قلت عقلي الجميل الحلو تعال الامور طيبة وسهالات انا انسانة احب التنظيم والترتيب وهي صفة بسيط اكتسابها مثلها مثل أي مهارة تحتاج ممارسة...ولازم اتعلم استرخي وأخذ الموضوع ببساطة وماهو لازم اكون انسانة كاملة احيانا البحث عن الكمال هو سبب انك ما تقدرين تسوين شي
ثانيا /باحط تقنيات وخطط يومية وامشي يوم بيوم عادي لو اجلس شهر لين اخلص المهم اني انجز لو شي بسيط وتذكري انجاز بسيط يحسب لك
ثالثا /أستعين بالله واعقد النية اني اخلص في عملي واعلم داخلي ان هذا البيت مملكتي الجميلة واتخيلها بالطريقة اللي ترضيني مهما كانت صغيرة كبيرة بيت ايجار المهم انها تحت تصرفي انا وتحت اداراتي وانا قدها وقدود
رابعا/اشيل من قاموسي ان عيالي فوضويين او زوجي ما يتحمل المسؤولية لاني انا اتحمل مسؤولية ذلك هم فوضويين لاني كذلك وانا علمتهم لذلك اعقد النية اني ساصبر عليهم وأكون معهم خطوة بخطوة وبهدوء حتى ازرع فيهم العادات التي اريد
بس في البداية انا الاساس اتغير من داخلي ليتغير ماحولي وازيل اي معتقدات او برمجة سلبية من داخلي فانا قوية وقادرة وملتزمة وساحقق ماريد باذن الله
يتبع

ثاني مرحلة/انا سيدة هذا البيت"بصوت خالتي قماشة "ههههههه(مرحلة التخطيط):
الحين اخذ شاور منعش والبس لبس مريح وابدأ المرحلة اللي باعرف فيها راسي من رجليني😂
بداية عمل البيت او التدبير المنزلي في نظري يندرج تحته ثلاث اشياء
١-المطبخ(تحته عشرة آلاف خط )
٢- البيت وروتينات اليومية والاسبوعية والشهرية
٣-الغسيل
الحين ابدا اقسم البيت لمناطق او زونات قسم الرجال قسم الحريم غرف النوم وهكذا قسمي بالتقسيم اللي يناسب بيتك..
الان قبل ماسوي الروتينات او الجداول لازم ارتب البيت كله واخلص شغلي بالتدريج وبعدها ومع هذا التنظيم أضيف جداولي وروتيناتي كل يوم عادة او عادتين لانني ادرب نفسي على اكتساب المهارات وهذا الهدف وليس فقط ترتيب روتيني يضل ليومين وترجع حليمة لعادتها القديمة اريده يكون أسلوب حياة
يتبع..

المرحلة الثالثة/انت غرايندزر لست سالي (التنفيذ):
عزيزتي بداية شيلي من نفسك هوية الضحية والتشكي والبلبلة من غير فايدة اللي صار صار والدنيا حووسة والأمور خرجت عن السيطرة اعزمي وتوكلي على الله صلي ركعتين اطلبي الله ان يسهل عملك ويساعدك..لاتفكرين تقولين عيالي يحوسون وانا خلاص ماعاد اقدر تراهم عقبالكم انتي المسؤولة الاولى والاخيرة حتى لو يحوسون وكذلك زوجك لان مالقيوا اللي يتابعهم لان مافيه شي له مكانه المحدد ..
إذن الترتيب والتنظيم ثم متابعتهم

لاتفكرين تقولين لو عندي شغالة وانتي بالاساس ماتبينها وتحبين تسوين كل شي بنفسك خطوة جريئة لكن ماهي مستحيلة
ولاتفكرين الكل يتمشى ويغير جو وانا بين هالحووسة ارتب ارجع واقول انتي السبب فلا تصيرين سالي بس تبكين وتولولين وتطلعين السلبيات وتحمل نفسك كل عقد الدنيا..ريلاكس نفس عميق وادخلي بقلب حامد..