إلى زوجات المساجين خصوصا وبنات حواء عموما

السلام عليكم ورحمه الله وبركاته


اخترت عنوان الموضوع عشان تدخله اختي وبنات تجمعها لأنها ماراح تقتنع إلا برأيهم وأتمنى منهم إنهم يقولون رأيهم بكل صدق وأمانه

وباقي بنات حواء الله يسعدكم عطونا رأيكم لأن السالفه معقده شوي


زوج أختي لما تقدم لها كنا نعرف إنه كان طالع من تجربه سجن سياسي وقال لنا إنه كان صغير ومتحمس ومندفع والآن كبر وعقل وتوظف وكل همه إنه يكون بيت وأسره

وافق الوالد وزوجه أختي وبعد أقل من سنه من الزواج قبضوا عليه وحطوه في السجن السياسي

في البدايه أهله قالوا أكيد اشتباه ولدنا ماسوى شي واصلا ترك عنه هالامور

وبعد ماكلم وزارته اختي سألته ليه يافلان وش صار قال ابدا ماسويت شي اتوقع بس اشتباه وقريب بطلع

مر على سجنه قريب سنتين واحنا كل شهر نقول الشهر الي بعده واختي تقول بيطلع اصلا ماعليه شي احنا ماشكينا قلنا عريس توه جاه ولد مهو حول هالامور بس الله يهديه قد ماعذب اختي

قبل فتره بسيطه عرفنا بطريق الصدفه ان الولد متورط في قضيه امنيه ومعترف بكذا بس ماقالنا

اختي مسكينه انصدمت وقالت له وقالها انا كنت ناوي اقولك < بعد ايش ناااوي

الوالد عصب مره وقال مااخلي بنتي معه واختي تقريبا مع راي الوالد تقول ليه خدعني وكذب علي
بس تقول ولدي اخاف يحرمني منه

احنا محتارين كثير وماندري كيف نتصرف

اكثر شي اختي شايله همه غير الولد كلام الناس لانهم مايقدرون وبيتكلمون من نفسهم ويالفون عليها انها ماصبرت على زوجها وانها تركته وانا محنا قاعدين نمشي ونعلم الناس الي صار
كل همنا انه الولد يروح بطريقه الله يستر عليه واحنا نروح بطريقنا لانه بينا شرط واخله الله يسامحه

اختي حالتها يرثى لها بس تبكي طوال الوقت وتقول الحيره عذبتني اخاف اطلب الطلاق الحين ياكلوني الناس بكلامهم واخاف اصبر والرجال مطول والوالد ماراح يخليني ابقى معه وبتروح علي السنين على الفاضي

طولت عليكم وكلامي مخربط ومحوس بس سامحوني

الي ابغاه حل وسط نقنع الوالد اننا نادب زوجها ونعطيه درس بس مايوصلها للطلاق

والله يكتب الي فيه الخيره