إلى كل متأخره في الحمل .. تتفضل

السلام عليكم
إلى كل متأخره في الحمل انا تزوجت وعمري 20 سنة جلست 6 سنوات بدون اطفال انا من طبعي اعشق الأطفال من كنت صغيرة اعشق الاطفال اعشق رائحتهم ولعبهم وضحكهم وشقاوتهم
طبعاً كنا سليمين انا وزوجي بس مدري ليش مايحصل حمل! الي تزوجوا معي وقبلي وبعدي خلفوا ع طفلين ثلاثه ما شاءالله تبارك الله وانا كل ماجيت في الإجتماعات بس ينصحون فيني روحي حللي روحي سوي يمكن البلاء من زوجك! والي لسه معهم مواليد ع شهرين ثلاثة مايخلونهم قدامي يدسوهم ياما سوو معي حركات خوفاً من العين وكان يخز في خاطري ارجع مقهورة متحسره استغفرالله
كنت اتصفح بين هالمنتديات ادور عن حل عشان احمل و ناسيه الله سبحانه واجرب في نفسي واخذ من هالخلطات وولا شيء تغير! جربت الكلوميد وولا شيء!
وفي يوم رحت لموعد عند الدكتورة عشان تشوف وضعي وكانت دكتورة شاطرة وشوية زحمه عندها جلست بجانب وحده حامل في شهورها الأخيرة جلسنا نسولف وقلت لها وضعي وكذا >> نفضفض
قالت إنها لها 7 سنوات ما حملت وهذا اول حمل لها وتقول ماحملت إلا بفضل الله سبحانه وتعالى
قالت تقربت لله وسرت ما اترك صلاة الليل أقوم الليل وافضفض الي بقلبي لله والله رحيم رزقي بالحمل


طلعت من المستشفى وانا أحس في أمل وبديت أتقرب لله أكثر وأكثر ولا اترك صلاة الضحى والليل ولا اترك الاستغفار والصلاة عالنبي لدرجة لساني تعود ع الاستغفار وقررت استخدم الكلوميد وتوكلت على الله وبديت استخدمه ومر الوقت وانا أحاول اتناسى الحممل اشغل نفسي واطلع واروح وبسرعه مر الوقت وجاء موعد الدورة بس مانزلت!! انتظرت يوم يومين وحسيت بنفجر ماقدر انتظر أكثر واروح أخذ تحليل منزلي وقال لي زوجي انتظري لصبح احسن وفعلاً انتظرت والله مادري كيف صبرت لصبح وكل شوي اطل ع التحليل واشوف الساعة ونمت قمت الساعة 7 الصبح وطيران حتى ماغسلت وجهي ولا شيء وحللت ..........














طلعت (( حامل )) 🎉🎊🎉🎊
يازينها فرحه الله لايحرمني ولا يحرمكم هالفرحه
طبعاً مارح اقولكم وش قد فرحنا انا وزوجي ف الحمل عاد اول حمل بعد 5 سنوات زواج نشرنا الخبر بعد ماحللت دم
كان وحامي صعب متعب ورحت اراجع لما دخلت الشهر الثاني و سمعت النبض وشافت كيسين! قالت لي حبيبتي مبروك توأم!
ياربي وش هالفرحة الحمدالله الحمدالله شهقت وبكيت عند الدكتورة ومر حملي بس كان جدا صعب ومتعب طبعا طريحت الفراش ودخلت الشهر الرابع ورحت ابي اعرف الجنس قالت لي ما شاء الله توأم أولاد ❤ فرحنا فرحه لاتوصف ومن دخلت الشهر الخامس وانا في السوق اتقضى كم غرض لعيالي وارجع بس كنت اتبع بسرعه يالله أخذ كم لبسه وارجع ودخلت الشهر السابع و فجأة وبدون سابق إنذار قمت من نومي لقيت مياة الاجنة نزلت!!! طيران ع المستشفى إلا تقول مفتوح رحمك 5 سم ولادة !
ياربي طيب عيالي لسه ماكتملوا قفلت الدنيا بوجهي ياربي يا كريم كنت ادعي وابكي وقت الولادة وادعي ربي انهم يعيشون وافرح فيهم ويعوضني سنيني الي راحت
ولدت وكانوا صغار واحد وزنه كيلو وحالته كويسه اما الثاني 800 غرام وحالته تعبان
ي قلبي كانوا حلوين شفت ملامحهم تلمست ايديهم بس للاسف عاشوا شهرين و توفى الي وزنه ضعيف وعاش الثاني يوم وتوفى وكانت صحته ممتازة بس يقولوا انه ماقدر يعيش بدون توأمه 💔
ي ربي رحمتك كل شيء تحول لعزاء حالتي انا وزوجي انعدمت وابتعدت عن الله 💔


كأني فقدت ابوي أو امي
أهلي كانوا معي الله يخليهم لي وهونو علي والحمدلله بعد وفاتهم ب شهرين قدرت ارجع لبيتي ورفعت كل شي يخصهم فوق وحلفت ماافتح ولا اطل ع اغراضهم إلا إذا حملت
رجعت لوضعي الطبيعي لكن هالمرة رجعت لله وبقوة جلست سنة كامله ماحملت وفي يوم حلمت في حلم أن خالتي تعطيني خاتمين ذهب كبار
قمت من نومي وفسرته قالوا رح تجيبي توأم عيال!
و سبحان الله في نفس اليوم الي حلمت فيه كنت حامل ولا ادري ولا حسيت بشيء ابداً ورحت أخذت تحليل منزلي وحللت طلعت النتيجة












(( حامل )) 🎊🎉🎊🎉
رحت سويت تحليل دم وفعلا حامل ولي 5 أسابيع هالمرة قررنا مانخبر أحد ابدا غير أهلي وأم زوجي فقط
كانت مشاعري مشاعر فرح مع خوف وتوتر كنت خايفة تتكرر الولادة المبكرة معي!
كنت أذكر الله في كل دقيقة و انعزلت عن الناس وقلت بخلي فترة حملي كلها راااحه مارح أنزل لسوق كنت احسب الي في بطني توام أولاد بس كان وحامي خفيف جدا ما شاءالله دخلت الشهر الثاني ورحت بأسمع النبض فعلا سمعته بس كان جنين واحد!
مرت الأيام ودخلت الخامس ورحت اشوف الجنس طلعت بنوتة 😍❤
جاتني اختي المتزوجة قالت انا بتكفل بمقاضي البنوتة الله يسعدها وفعلا جهزت كل شيء انا اهم شيء ارتاح
ودخلت السابع وانا متخوفه وفي نفس الوقت متكله ع الله أعد الأيام والأسابيع عشان ادخل الثامن وفعلا بفضل الله دخلت الثامن والتاسع أخذت من التاسع أسبوعين وولدت طبيعي كانت ولادة سهله ميسره اللهم لك الحمد
فرحتي يوم ولدت بنتي ما اعتقد أحد بيحس فيها مثل ماحسيت انا وزوجي فيها الله يرزقكم هالفرحة


الحين مر ع زواجي 11 سنة وبنتي البكر عمرها 5 سنوات وعندي غيرها ولدين اعمارهم على 3 و سنتين والحين انا حامل الحمدالله


ي حبيبي ماكتبت قصتي إلا عشان تستفيدون تقربي لله وموب اذا خلصتي حاجتك خلاص لاادعي ربك ولاتخلين صلاة الليل و سوي الي عليك
وفي الأخير أسأل الله أن يرزق كل زوجين بالذرية الصالحه ❤ دعواتكم الله يرزقكم ماتتمنون.