انا اي صندوق عندي في البيت ما برمي بغلفو وبعملو وسيلة تعليمية مثلا عندي
صندوق الحروف هادا كان عندي صندوق تايد وغلفته بما يناسب الروضة من صور
بعدين طبعت على الكمبيوتر الحروف الانجليزية ومع كل حرف صورة على الحرف ليست مفصولة عنه وعملت منهم مثل flash card
بعدين رح احطهم في الصندوق حسب الحروف اللي وصلولها الطلاب يعني مثلا وصلو لعند حرف eبحط بس لهذا الحرف
بعدين بحكيلهم يختارو حرف واللي بيختار عليه يقراها منه بيعرفو الحروف ومنه بيتسلو بلعبة الاختيار

وطبقيها ورح تشوفي المتعة في الموضوع

ايضا عملت للطلاب وسيلة تعليمية من غطاء النيدو وقطعة خشبية مستطيلة

دبست الغطا على قطعة الخشب بدبوس اللي بنستخدمه لتعليق الوسائل على الحائط الدبوس الصغير بعدين صار الغطا متحرك بتعرفي لما بنفتح علبة النيدو يعني الغطا بكون معه هدا الخيط البلاستيك اللي داير ما يدور يا ريت تكوني فهمت علي هادا ما رميته رحت اخدت اللي بنمسك منه علشان نفتح العلبة وعملتها مؤشر للقرص (غطا النيدو)
بعدين على محيط الدائرة يعني على الخشبة كتبت الحروف ومعها صور مع كل حرف صورة

الان امام الطلاب بحكي للطلاب لما يوصل المؤشر لهدا الحرف احكولي وقفي
بضل ادور بالقرص ادور بالقر ص حتى اوصل هادا الحرف وهم عليهم يحكولي stop
بعدين إذا ما حكولي بعيد إذا حكولي بشجعهم

طبعا عن طريق هادي الوسيلة بتقدري تعرفي وتحددي قدرات طلابك في اللي درسو

وممكن تعملي نفس الشيء قرص الارقام بنفس الطريقة

الان نيجي للعبة up & down
او فوق وتحت

بتخلي الاولاد لما يسمعو حرف معين مثلا الف او صوت الحرف ألف يرفعو ايديهم لفوق واي حرف تاني ينزلو إيديهم تقريبا هادي زي لعبة قيام جلوس بس باللي درسو

طبعا كتير منهم رح يتخربط اولها بعدين بتقدري تشجعيهم علشان تزبط الامور معك

والله يعينك هادي الاشياء اللي انا بستخدمها في صفي وإذا عندي افكار تانية رح اكتبلك ياها فورا بس استحضرها لاني صراحة عندي كتير افكار بس الله يعينا على تطبيقها بالطريقة الصحيحة

في شغلة نسيت احكيلك ياها إنو الاطفال في روضة اولى مش مطلوب منهم يتعلمو الكتابة لكن انا عملت ملزمة على الكمبيوتر قريبا رح انتهي منها بإذن الله تعالى علشان تعلم الاولاد الكتابة الصحيحة للحروف وعندي ملزمة تانية للارقام ورح انزلها بإذن الله تعالى في المنتدى ليستفيد ا لجميع بس لما اضغطها لانه حجمها كبير شوي هي 70 صفحة تقريبا

المهم هي بتعلم اطفال الروضة الطريقة الصحيحة لكتابة الحروف فقط
ولما اولياء الامور عرفو بهادا الامر انبسطو لانه اولادهم رح يتعلمو الكتابة في هادا السن

السلام عليكم ..

ماشاء الله عليكِ افكار رااااااائعة ..

الله يعطيكِ العافيةأم عبدالرحمن علي ...

جزاكِ الله خير
شكرااااااااا