ام عبد الرحمن

انا تخصصي علوم ورياضيات

السلام عليكم ورحمة الله وبركاته
جزاك الله ألف خير أختي أم عبدالرحمن وجعله في ميزان حسناتك بصراحة أول مرة أدخل موضوعك وأقرأ مشاركاتك واستمتعت كثيرا بكل الأفكار المبدعة والراقية جزاك الله ألف خير

عزيزتي بما انك معلمة روضة ياليت تعطيني موجز في طريقة استقبالهم والتعامل معهم وطريقة تدريسهم

جزاك الله عنا كل خير

اهلا وسهلا بمدرسة العلوم والرياضيات انت عارفة اكيد انه مادة الرياضيات مادة بكرهها كثير من الطلاب لانها تحتاج لتفكير وانتباه وهادا مش موجود عند كثير من الطلاب لذلك لابد من تحبيب الطلاب بالمادة وانا رح احكيلك تجربتي في تدريس مادة الرياضيات

كنت اول ما ادخل الفصل ارسم على جنب السبورة دورقين واضع فوق كل دورق نسبة مئوية وهي نسبة ادبهم في الفصل يعني ابدا بـ 50 بالمية بعدين تزيد حسب ادبهم اثناء الحصة ولانه التنافس يكون بين الاولاد والبنات فيكن شديد والكل حابب يفوز كانت عاجباهم الفكرة وحتى لما كنت انسى احطها يحكولي ابلة نسبة الادب . فيذكروني فيها كنت بهالطريقة اضبط الادب في الفصل

بعدين لما مثلا انتهي من شرح هدف احكيلهم قيام جلوس اشوف الادب علشان ابدا بشرح حاجة حلوة الكم

احياناكنت لما انتهي من شرح شي معين اطفي الضو واحكيلهم يلا نامو علشان نبدا الفقرة الجديدة بس انتبهي من هالحركة شوي لانه ممكن في طلاب ما يصدقو ينامو فبتهيالي انها نافعة مع البنات اكثر من الاولاد لانهم بيسمعو الكلام لما تحكيلهم يلا ارجعو للدرس فكان هادا يضفي على الدرس شي من المرح اللي هم محتاجينه

بعدين كنت احاول اثناء الحصة احكيلهم يلا اربطو احزمة الامان واستعدو للاقلاع احنا الان رح ندرس شي جديد محتاجين في احزمة الامان

فالكل يربط حزام الامان ويستعدو بعدين كانت الطالبة اللي تجلس طول الحصة مشغولة في اشياء داخل الدرج مثلا او الكلام مع صديقتها تحكيلي ابلة انا ما فهمت احكيلها ادرسي لحالك في البيت انا ما بعيد الدرس لوحدة مش منتبهة من اوله علشان تتأدب ومرة تانية تنتبه ولما تتأدب بعيدلها الشرح

كنت اجلس معهم في الفسحة علشان احببهم في المادة اتسامر معهم انصحهم يعتبروني زي امهم التانية كله علشان يحبو مادتي :44: مضطرة احيانا كان جلوسي معهم على حساب فطوري اترك الفطور واروح اجلس معهم وكنت استمع لمشاكلهم وكنت زي صديقتهم

كله علشان خاطر المادة

مرة دخل عليهم مدرس احتياط بسالهم مين اكتر مدرسة بتحبوها حكولو مدرسة الرياضيات

فالحمد لله واي سؤال عيني انا حاضرة

اما بالنسبة للعلوم فحاولي انه دروسك تكون على البوربوينت والطلاب هم يعلمولك ياها

دمت بود

اهلا وسهلاما احلى تدريس الاطفال ممتع للغاية بالنسبة لطريقة استقبالهم طبعا لازم تبينيلهم الحب والحنان بدون صراخ ولا عصبية يعرفوك انك مثل امهم الحنونة ما تنسي البالونات ، اللعب ، الفسحة برة الصف ، وقت الطعام تجلسي معهم ، احرصي ما تعلميهم اي شي اول يوم ، هدايا طبعا ، حلويات ،

اما اللي يبكي فهادا رايي اهمليه وامام عينيه اعطي اصدقاءه الحلويات والهدايا علشان يغار ويسكت وينضم الكم بس الاهمال هو علاج حالات البكاء اناهادا رايي بالنسبة للبكائين وجربت الطريقة ما كانت تعجب الادارة لانه كان في واحد ببكي في الفصل لكن بالاخر انا كسبته صار يحبني ويحب الصف ويحب اصحابه

ودايما حاولي في تصرفك مع الطفل تجيدي فن التمثيل مع اضفاء شي من المرح عليه يعني مثلا بدك تحكيلهم انه في واحد تصرف تصرف حلو اليوم عارفين شو عمل طلعو علي شو عمل : تبداي بتمثيل ما فعله صديقهم مثلا تاخدي ساندويتش وتفتحيها امامهم وبعدين تاخدي الورقة وتحطيها في الزبالة وتبداي تاكلي وتمثليلهم الادب اللي كان في صديقهم وبالاخر تحكيلهم مين هادا الصديق


وفن القصص اي شي بدك توصلي الهم بالقصص وعلى قد ما بتعطيهم على قد ما المفروض يركزو معك و

وفهميهم انك بتحبيهم واللي بيعمل شي خطا الاستاذة ما بتحبو يعني لما يعمل واحد منهم خطا علىطول احكي انا في واحد في الصف ما بحبو عمل هيك وهيك وهيك ما تذكري اسمه هو رح يعرف نفسه ورح يستحي وما رح يعيدها لانه الطفل حريص على حب مدرسته وهادي الكلمة بتعطي دفء وحنان

افكار حلوة ..

ومنكم نستفـــــــيد ..