السلام عليكم ورحمة الله وبركاته
أخواتي الغاليات كنت قبل مدة أقرأ قصص الولادة إللي يكتبوها أخواتي وأقول في نفسي متى يجي اليوم إللي أكتب فيه قصة ولادتي وأحسه بعيد بس الحمد لله الذي بلغني اليوم إللي جيت أكتب فيه قصة ولادتي في ولدي أنس (الله يخليه لي ولوالده وأخوانه محمد وأحمد) أنا طبعا قبل ولادتي بأكثر من أسبوع بدأ معاية الطلق وكنت أحسب خلاص ولادة لأنه في أولادي الإثنين إذا بدأ معاية الطلق خلاص يكون ولادة ماكان يجيني الطلق الكاذب أبدا فلما بدأ معاية آلام يوم السبت في الليل قلت خلاص أكيد بكرة بالكثير ولادة بس لما طلع النهار اختفى الآلام كلها :44: ويوم الأحد نفس الشي بس كانت الآلام أقوى فرحنا المستشفى الساعة 3 في الليل فكشفت الدكتورة وقالت فاتح 1 سانتي والتخطيط يبين إنه في طلق خفيف وقالت إنه عنق الرحم لسى سميك ورجعت البيت وطول الأسبوع وأنا يجيني آلام خفيفة وبعد أسبوع يوم السبت برضه رجعت الآلام بس أقوى صحيت زوجي وكانت الساعة 2ونص في الليل برضه ورحنا المستشفى بعد ما شربت حليب بالقرفة والقرنفل وزوجي صار يقوللي ما لقيتي غير الليل يجيكي الطلق كان إستنيتي للصباح وطلع الرحم للأسف فاتح 1ونص والتخطيط يبين إنه في طلق قوي نسبيا بس مو منتظم فسألتني الدكتورة إذا شربت شي قلتلها إيوة قالت عشان كدة الطلق حامي بس الرحم مو راضي يفتح لأنه سميك وسوتلي بيدها حاجة أظنه تحريض لأنها آلمتني ولما رجعت البيت نزل علية دم مع إفرازات مخاطية فرحت وقلت أكيد اليوم خلاص ولادة بس توقعاتي ما كانت في محلها فدخلت المنتدى وصرت أسأل متى يجي الولادة بعد نزول السدادة وعرفت إنه مو شرط في نفس اليوم إللي ينزل فيه الدم فصرت أمشي كل يوم ساعة تقريبا مشي متوسط لسريع ربع أو ثلث ساعة وبعدين أريح وجا يوم الإثنين صحيت الساعة 12 الظهر على آلام مرات قوية ومرات لا وطول اليوم ما وقفت الآلام فصرت أمشي وأمشي وبدأت تزيد بعد المغرب وتجيني كل 10 دقايق 12 دقيقة 8 دقايق يعني مو منتظمة برضه بس الألام قوية يعني إذا جات ما كنت أقدر أتحرك وزوجي يقوللي هادا شكله ما يبغى يجي غير في الليل ويصحينا برضه :mad: ولما صارت الساعة 11 رحنا المستشفى وكشفت الدكتورة وقالت 2 سانتي وسوتلي توسعة وقالت أسوي تخطيط للإطمئنان قلتلها ما يحتاج فقالتلي إذا بيتك بعيد لا تروحي لأنه عنق الرحم عندي صار لين والطفل نازل في الحوض مرة فممكن يفتح عندي الرحم بسرعة فإذا زادت الطلق تعالي على طول قلتلها طيب ورجعت البيت وأديت خبر لأمي الله يحفظها لية فقالت تجي تبات عندي بدل ما تفضل طول الليل قلقانة علية فجات على الساعة 12 وأنا الآلام عندي كل مرة أقوى من قبلها بس برضه مو منتظمة وصارت تجي كل 5 ، 7 ، 4 دقايق مو منتظم وصارت الساعة 2 قلت خلاص ما أبغى أجلس في البيت وأمي تقوللي لسى بدري قلتلها أخاف ما ألحق المستشفى فشربت حليب القرفة والقرنفل وصحيت زوجي ورحنا المستشفى كشفت الداية وقالت 4 سانتي فرحت قلت يعني الحمد لله خلاص أخيرا قرب الفرج وجات الدكتورة بعد نص ساعة تقريبا وفتحت موية الرأس عشان تنتظم الطلق والداية سوتلي إبرة في العضل ما أدري الظاهر مسكن ورجعت حطت في الإبرة في يدي حاجة قلتلها هادي طلق صناعي قالتلي لا هادي مسكن مع ملين لعنق الرحم وحتحسي دحين بالدوخة وفعلا صرت أحسن نفسي في عالم تاني وخفف الألم عني كتير الله يجزاها بالخير داية زي العسل لأنه في ولاداتي السابقة ما سولي الإبرة هادي وبعدين جات كشفت الساعة 3 تقريبا وقالت 6 سانتي و والساعة 3ونص تقريبا رجعت جات وكشفت ومع الكشف وسعت وقالت صار 8 سانتي إذا جاكي الدفع ناديني على طول فناديتها لما حسيت بالدفع ونقلوني لغرفة الولادة وجهزوني بس المشكلة صرت أستنى الطلق موراضي يجي خفت قلت الطلق راح قالتلي الدكتورة مافي مشكلة دحين ترجع وبالفعل ما في دقايق إلا رجعت وصرت أدفع وأدفع والداية تساندني وتقول إية كملي لا توقفي ومع تشجيعها صرت أدفع وأمسك حاجة حاطينها فوقي عشان أتقوى وقت الدفع وأمي عند رأسي تدعيلي إلى أن شرف البيه أنس الساعة 4 وربع وحمدت الله وصرت أسألهم ليش لونه أزرق خفت عليه لأنه كمان ما بكي على طول فطمنوني وبدأ يبكي والحمد لله وبعد خروجه ما حسيت بشي أبدا قالت أمي كملت الدكتورة خياطة وتنظيف إلى الساعة 5 وأنا مخدرة علما إنه ولاداتي السابقة كنت أحس بألم الخياطة زي الإبرة بس المرة هادي إرتحت مرة ونقلوني لغرفتي على طول وجو بابا وأخواتي يتحمدولي على السلامة وكانت الولادة يوم 4-2-1431هـ وشكرا لكم جميعا لمساعدتكم لي وردكم على تساؤلاتي وقرآءتكم لقصتي وأنصحكم جميعا بقراءة سورة يس ومريم والفتح وق وتبارك كل يوم وتكثرو من الاستغفار والصلاة على الرسول صلى الله عليه وسلم وأخيرا أتمنى من الله عز وجل أن يبلغكم جميعا ساعة السلامة ويرزقكم ما تتمنوه ويرزق كل محرومة وآسفة على الإطالة.
:26::26::26: والسلام عليكم ورحمة الله وبركاته :26::26::26:
rabiaaciyor @rabiaaciyor
محررة برونزية
يلزم عليك تسجيل الدخول أولًا لكتابة تعليق.
وعليكم السلام ورحمة الله وبركاته
حمد لله على سلامتك والله يخلي لك ابنك ويحفظه من كل شر .
وعقبالي يارب ..
حمد لله على سلامتك والله يخلي لك ابنك ويحفظه من كل شر .
وعقبالي يارب ..
الصفحة الأخيرة
بس ايش هذى الابرة الظاهرة انها تهدى الالم