اااخ من زوجي

السلام عليكم
بنات انا اتهاةشت مع زوجي من الاحد اللي راح والين دحين وانا عند اهلي
والمشكلة مررة تافهة
اللي صار اني دقيت عليه يوم الاحد وقلتله ابغاك توديني لصحبتي وقال طيب جهزي ودقي علي قلتله طيب
وبعدها رحت نظفن المطبخ وغرفة النوم عشان اخلص
وجهزت نفسي عالسريع ودقيت عليه قلتله خلاص انا جاهزة وقاللي انا بعيد حجي بعد ساعة وقتها كانت الساعة 9 الا ربع في الليل
وقلتله بس كدا حيضيع الوقت وقاالي انتي من فين تفهمي ماني جاي دحين وقفل السماعة
وانا انقهرت وارسلتلله عالواتس لو سمحت اذا انت معصب من شي لا تطلع حرتك فيني انا مو عبدة عندك ولا اصغر عيالك
ومارد علي
وبعد ساعة دقيت عليه قلتله ها جاي ولا لا
وقاللي المفروض ما ارد عليكي بسبب رسالتك
وقلتله انت البادئ وقال مو جاي وقلتله ومتى حتجي وقاللي متى ما خلص دوامي قلتله مني يخلص دوامك قاللي مالك شغل وقلتله ليش تكلمني بهذا الاسلوب يقول بسبب رسالتك
وسكرنا الخط
وبعد ساعتين جاء وقاللي دحين ايش فيه ايش المشكلة
قلتله لو سمحت لا تكلمني لاني كنت معصبة وقتها واذا اتكلمت وانا معصبة حقول كلام ما ابغى اقوله
وقالي غصبا عنك اكلمك
وتركتله الغرفة ورحت غرفة تانية ولحقني وقاللي تاني مرة وانا اكلمك لا تسيبيني وتعطيني ظهرك اتعلمي كيف تتكلمي مع زوجك
وقلتله اسكت ماني فايقتلك وقالي ايش الرسالة ومدري ايش
قلتله انت السبب اللي خلاني اكتبها
وقاللي غصبا عنك انتي عبدة عندي
قلتله وقسما بالله اني مو عبدة لا عندك ولا عند غيرك
وقلتله مو كفياة متحملة دوامك الطويل واخوك في بيتي لان اخوه ساكن معانا في البيت
على اساس بس اسبوعين وصارت شهرين ونص
وقال معلييش هذا مو بيتك واخويا ماراح يطلع من البيت
قلتله معناها انا اللي اطلع وقال طيب اطلعي لو تبغي ودقي على اهلك خليهم يجو ياخذوكي
ورحت دقيت عليهم ودموعي اربع وقاللي اخويا ان جاي في الطريق
وبعدين لمن شاف ان الموضوع جد قام يقوللي انا مقلتلك اطلعي بس انا قلتلك ماراح اطرد اخويا من البيت
وراح اسيبك على راحتك
ولبست عبايتي استنى اخويا وقلت لزوجي اتاخرت عشان كنت انظف بيتك ولا تخاف دحين حطلع منه واريحك من وجهي واتهنى ببيتك وخلي اخوك والشغل ينفعوك
وقام قاللي هذا مو بيتي لحالي بيتك انتي كمان قلتله دوبك كنت تقول مو بيتي
وطبعا جالسة اكلمه وانا ابكي ماقدرت امسك دموعي لاني مرررة حساسة واكتر شي جرحني لمن قال هذا مو بيتك
وجاء اخويا ورحت معاه
وقلت لزوجي متى ما عدلت اسلوبك معايا هذيك الساعة ترجعني وقاللي زي ما رحتي بنفسك ترجعي بنفسك قلتله ومين قال اني راجعة
والين دحين ما اتصل ولا سأل مع العلم اني حامل في نهاية الشهر الرابع
ولسة عروسة صارلي اربع شهور ونص متزوجة
وانا ما اقدر اتحمل اكتر بصراحة ابغى ارجع لبيتي واهلي بدأو يكرهوه لان ماتصل ولا سأل
وقالو انه ما يستحي المفروض يتصل ويأل عشان ابنه اللي في بطني على الاقل
وانا اعرفه عنيييييييييييييد وعنده كبرياء وماراح يتنازل ويرجعني بس هو من النوع اللي اذا الشحص اللي قدامه اتنازل يقدر هذا الشي ويحاول يرضيه بس اهم شي ان مو هو اللي يتنازل
واهلي رافضين نهائيا انهم يرجعوني له اذا هو ماجاء من نفسه ورجعني
استنى ردودكم ايش اسوي وكيف اتصرف
لا تقولي اصبري مليت من الصبر
وكمان مين الغلطان انا ولا هو
ولو سمحتو بنات لا تدعو على زوجي ولا تسبوه