اااه ياوليدي تستقبلني بمصيبه وجدتك ترفع ضغطها وابوك مخالفه البلديه والى متى؟

هلا والله فيكم ياحوائيات

بدخل على طووول بالمشكله ..

ولدي السنه هذي دخلته تمهيدي يجي دايخ وينام الى العصر ومن عطل وهو شايل البيت على راسه بسبب وقت الفراغ الكبير يحاول يشغل عمره باي شيء انا مدرسه وما اكون عندهم الصبح ولا عندي شغاله وام زوجي عندي قاعده عشانهم لاجيت اثر الضغظ مرتفع عندها منه مشغلها اكثر من الصغير تعود على قومة الفجر واذا قام ماعنده شيء يحاول يلهي عمره بالفساد الاسبوع اللي راح جيت اثر ام زوجي معصبه الولد متصل على البقاله بدون ماتدري وطالب ايس كريم تقول مادريت الا الجرس يرن 8 الصبح والا البقاله ومرة جيت لقيت دروج المطبخ عافسها عفسه لاراحت ولاجت يوم هاوشته يقول ارتبهن واليوم مطلع سبحهم انا موزيته عنه ولاقيه ومطلعه ومعبيه الى راسه ويسبح بالشمس ويوم انتهي كابه بالحوش وماجاء زوجي من الدوام الا مخالفه البلدية ملزقه على الباب والالعاب يطلعها ويكبها بالصاله ويقوم ويتركها و24 ساعه يتكشخ كل مادخل الغرفه وطلع اثره بلبس والشراب والجزمه يطقم معها والله الدواليب ماعاد تقعد على ترتيبها وبيتي امتلى من الالعاب والاجهزة الغريبه ابيه يلهي وهو مافاد معه كل يوم اجي القاه مستقبلني بمصيبه حتى اخوه ماسلم منه صاير يحب يعانده ويفرفره واذا هاوشته قال امزح معه والله لو لابتوبي عطيته الصلاحية فيه بس يجلس ويهجد مافاد ولا همه لدرجه ان زوجي يقول والله لو اسمع ان فيه مدارس بالعطله لو بفلوس بادخله والله ماكان كذا قبل تغير من خالط الاولاد بالتمهيدي ولا حرمته الطلعه تقولون طفشان من اشوف زوجي بيطلع لزقته فيه ام زوجي اقول لها لا تطاوعينه وهاوشيه ما ترضى يرفع ضغطها ولا تقول له شيء واعاقب اهاوش احرمه من اللي يحبه اكافئه عادي عنده اتكلم معه بطريقه غير مباشرة يفهمها ويغير الموضوع

اللي عندها حل تسعفني الله يسعدها ويخلي لها من يعز عليها يارب
والله اني افكر ببكرة وش المصيبه اللي بيستقبلني فيها من ادخل البيت اول ما اسال عنه هو