ابشركم نظفت بيتي وتعبت تعب الله يكتب اجري ومشكورين لدعواتكم

يارب لك الحمد خلصت تنظيف البيت والحين نفسيتي رووووعه وزي العسل
والاهم زوجي انبسط وشكرني وهالشي يسوى عندي كثير

طبعا نزلت موضوع اعتقد الساعه 11 او 12 بالليل وحبيت اتحمس واشوف دعواتكم وانبسطت بدعواتكم لي الله لايحرمني منكم


والي سالت جيبي شغاله بالساعه وتنصحني بعدم تراكم الشغل والله ياعمري بمنطقتنا مافي شغالات بالساعه ابدا ولا كان ريحت راسي مافي الا الاستقدام وتعرفون غااااالي وميزانيه تكسر الظهر


عشان كذا مافي احد يساعدني الا ربك سبحانه ومع الحمل والنفسيه كرهت الشغل ومن ادنى حركه اتعب وجسمي يثقل

عشان كذا الشغل يتراكم وانا احب اشتغل الشغل كله مررره وحده ماحب اقسمه صح تعب لكن اريح لي لانو لو قسمت مستحيل ابدا بالشغل مره ثانيه اكسل مررره الحمدلله على كل حال




المهم اقولكم وش سويت بعد مانزلت موضوعي توكلت على الله وبديت بغرفة الجلوس الي نقعد فيها انا وسي السيد وكانت حووووسه لان بيتي صغير وهالغرفه جلوس لنا وغرفه لبنتي اغلب اغراضها فيها وهي تحب تحوووس وانا اروووح فيها نفضت الغبار عن الكنب ومسحت الكنب والمخدات حقته وكنست السجاد ومسحته بالشامبو الخاص للسجاد وخليته ينشف ومسحت اطراف السرامييك ولمعت المرايات ومسحت الدولايب بالمنشفه والصابون وصااار المجلس يلق لق ماشالله لاقوة الا بالله



تعبت مررره لاني نظفته من قلب من فوق لتحت وقلت دلعي نفسك شووويه اخذت لي كوب قهوه وشوية حلا حسيت بخمول وجاني نووووم اوم الكسل:hahaha:بس قلت مستحيل مدام بديت خلاص مافيها ورحت نقعت الحمام الله يكرمكم بكلووور وديتول وتايد وخليته دقايق وشطفته ومسحت المرايا وحطيت شامبوهات وكريمات صغنونه وحلو شكلها عالمغسله اعطت منظر حلو

ورحت عالصاله مسحت الطاوله ورفعت كل شي عنها خليت بس شمعتين وجك مويه بس وكنست السرامييك ومسحته وكملت عالمطبخ مسحت السراميك وكنسته ونظفت المواعين بكلووور ونشفتها ورجعتها لدواليب ومسحت دولاب المطبخ
من برا بس عاد من جوا يبغاله شغل جامد يبله يوم بحاله

واذن الفجر صليت وسويت لزوجي المصون نسكافيه ولبس بدلته وراح مابقى لي الا غرفة النوم كنست السرامييك ومسحته ومريت مرور سريع عالدولايب ومسحتها من الغبار ونظفت الفراش ورتبته وشغلت السديس وبخرت الغرفه وقفلت عليها



والحمدلله عالساعه 7 الصباح خلصت شغلي من الى يارب لك الحمد وبخرت بيتي كله بعووده حلوه ترد الروح

وبعد هالتعب دوخت دوخه مو طبيعيه سويت لي فطور خفيف وهو شاي بالنعناع وبيض وجبن وخبز والحمدلله بعد الفطور رجعت لي العافيه والحين دخلت اطمنكم والحمدلله مرتاحه كثير صح تعبت بس بعده راحه


وطبعا بنتي مو مقصره معاي انا ارتب وهي تخرب الله يصلحها وتعوض تعبي اذا كبرت وشوي جاني مغص على خفيف واختفى الحمدلله كله باجره


وهذا يومي الله ييسرلنا الصحه والقوه والهمه وراحة البال اجمعين